« Te fa’aro’o i roto i te mau taime pe’ape’a », Nō te Pūai o te Feiā ’Āpī, Tītema 2022.
Fa’aro’o i roto i te mau taime pe’ape’a
Teie te tahi mau mana’o tei tauturu iā’u i te mau uira’a ’e te mau fē’a’ara’a.
Hōho’a nā Getty Images
I tō’u ’āpīra’a, pinepine tō’u ’utuāfare i te tere i Basin National Park i Nevada, i te fenua Marite. Hō’ē ’ohipa fa’ahiahia i roto i te ’āua, o te ana Lehman ïa.
Nā te hō’ē arata’i nō te tere māta’ita’i e arata’i hōhonu ia ’outou i roto i te ana, ’e i te tahi taime, e tūpohe ’oia i te mau mōrī ato’a. E ’ite ’outou i te pōiri rahi. E mana’o teimaha te reira, ’e te ferurira’a ’ia ’imi i tō ’outou ’ē’a i rapae i te ana ma te mōrī ’ore e mea taiā mau. ’Aua’e rā, e tū’ama fa’ahou te ta’ata arata’i i te mōrī ’e e arata’i atu ia ’outou ma te pāruruhia.
I te tahi taime, tē fa’aruru nei tātou i te mau uira’a ’e te mau fē’a’ara’a ato’a nō ni’a i te ’Ēkālesia ’e tō tātou ’itera’a pāpū. E nehenehe te reira e riro ’ei mea teiaha ’e te pāpū ’ore, mai te vaira’a i roto i te ana pōiri.
’Aita e fifi ’ia fāri’i i te mau uira’a ’e te mau māna’ona’ora’a. Te mea e fa’atupu i te ta’a-’ē-ra’a rahi roa a’e, ’o te huru ïa tā ’outou ha’afātatara’a atu i te reira.
Teie te tahi mau mana’o tei tauturu iā’u.
Fa’a’ohipa i te fa’aro’o
’Ua ’ite au ē, mai te mea e hi’o vau i te mau uira’a ’e te mau māna’ona’ora’a nā roto i te hō’ē ti’ara’a fa’aro’o, e ’ite noa ïa vau te hō’ē ’ē’a i mua. « E ’ere te fa’aro’o i te ’ite pāpū mau i te mau mea e vai nei » (Alama 32:21). ’E « noa atu ’aita i ti’a ia ’outou, maori rā ’o te hina’aro noa ’ia ti’aturi ; ’a vaiiho i taua hina’aro ra ’ia tupu i roto ia ’outou » (Alama 32:27).
E parau mai tō te ao ia ’outou ē, mai te mea ē, e’ita tā ’outou e nehenehe e fa’a’ite i te hō’ē mea nā roto i te hō’ē fa’aturera’a ihi, e ’ere ïa i te parau mau. E ’ere teie te fa’anahora’a a te Fatu. Mai tā te Fa’aora i parau ia Toma, o te ’ore e ti’aturi maori rā ’ua ’ite ’oia i te mau puta o te Fa’aora tei ti’afa’ahou nōna iho, « ’Eiaha e fa’aro’o tai’atā, e fa’aro’o rā » (Ioane 20:27).
E ani, e ’imi, ’e e pātōtō
Te parau « E ani, e ’imi, e pātōtō », tē parau-fa’ahou-hia nei i roto i te mau pāpa’ira’a mo’a (hi’o Mataio 7:7 ; Te Ha’api’ira’a Tumu ’e te mau Fafaura’a 88:63). Te rāve’a a te Fatu nō te tauturu ia tātou i tā tātou mau uira’a, o te anira’a ïa iāna i te mau uira’a.
« Tē ’ere ra rā te hō’ē o ’outou i te ’ite, e ani ’oia i te Atua ra » (Iakobo 1:5). ’A haere ti’a atu i ni’a i te puna o te mau parau mau ato’a. ’Ua here te Atua ia ’outou ’e e tauturu ’oia ia ’outou.
’Ia riro ’outou ’ei ta’ata ’imi i te parau mau
’Ua ’itehia iā’u ē, te feiā e ’imi mau nei i te parau mau ma te ha’avare-’ore ’e te ha’eha’a, e ’ite pinepine rātou i te mau pāhonora’a i tā rātou mau uira’a i te pae hope’a. I te tahi pae, o rātou o tē ’imi noa nei i te hape, e fa’a’ātea noa atu ïa rātou i te parau mau.
’Ia riro ’outou ’ei ta’ata ’imi i te parau mau. Tē vai nei te parau mau, ’e e ’itehia te reira ia ’outou.
Hāmani i te hō’ē ’āfata « ’ia pāhonohia mai i muri iho »
Nō reira, e aha tā ’outou e rave mai te mea ē, ’ua ’imi ’outou ma te ha’eha’a ’e te ’ā’au tae i te mau pāhonora’a ’e e au ra ē, ’aita rātou e tae mai nei ?
Fa’ahou ā, tē mā’iti nei au e hi’o i te reira ma te fa’aro’o. ’Ua hāmani au i te hō’ē ’āfata na’ina’i i ni’a i te hō’ē pa’epa’e i roto i tō’u ferurira’a—mai te hō’ē ’āfata tao’a nehenehe. ’Ua pāpa’ihia i ni’a iho te mau parau « ’Ia pāhonohia i te hō’ē tai’o mahana i muri mai. »
I te mau taime ato’a e uira’a tā’u ’aore rā e māna’ona’ora’a e’ita e nehenehe iā’u e fa’a’āfaro, e pāpa’i au i te reira i ni’a i te hō’ē ’api parau moemoeāhia, e tūfetu maita’i āu i te reira, ’e e tu’u atu i roto i te ’āfata. Muri iho e fa’aho’i au i te reira i ni’a i te pa’epa’e.
’Ia nā reira vau, tē ha’a nei au ma te fa’aro’o ē, ’ia tae i te hō’ē mahana, e pāhono mai te Fatu i te reira. Penei a’e paha e nā reira ’oia, penei a’e e’ita paha ’oia e nā reira. Tei iāna ra ïa i roto i tōna pa’ari hopea ’ore.
’Ia hi’ohia, ’ua pāhonohia mai te tahi o tā’u mau uira’a. E rave rahi rā tei roto noa ā i te ’āfata. ’E e mea maita’i nō’u te reira.
E au mau hoa here i te Mesia, ’a riro ’ei feiā ’imi i te parau mau.
’A rahi noa ai tō ’outou fa’aro’o, e pārahi mai te Fatu i pīha’i iho ia ’outou. ’E ’a ha’afātata ai ’outou iāna ma te fa’aro’o, e heheu mai ’oia ia ’outou i te mau mea e ti’a ia ’outou ’ia ’ite i te taime tano.