« Pe’e i te māramarama mau », Nō te Pūai o te Feiā ’Āpī, Tēnuare 2023.
Mai, pe’e mai
Pe’e i te māramarama mau
Tei reira noa te māramarama o Iesu Mesia nō ’outou—i nanahi, i teie mahana ’e a muri noa atu.
Hi’o na i te mau lys, nā Haley Miller
’A topa ai te mahana i te tahi atu sābati o te matahiti 1948, tē haere ra vau nā te ’ānāvai Trent i Nottingham, Peretāne. E 20 matahiti tō’u ’ei misiōnare i taua taime ra. E mahana roa ’e te rohirohi roa, ’ua ’oa’oa rā vau ’e ’ua māuruuru vau i roto i teie ’ohipa.
’A haere ai au nā te ’ānāvai, ’ua pure au i roto i tō’u ’ā’au. Nō tō’u hina’aro ’ia fāri’i i te tahi arata’ira’a nō ’ō mai i te Fatu ra, ’ua ui au, « tē rave ra ānei au i te mea tā ’oe e hina’aro ? »
’Ua tae tā’ue mai ra te hō’ē mana’o hau ’e te hāro’aro’ara’a i ni’a iho iā’u. I taua taime mau ra, ’ua ’ite a’era vau ē, ’ua ’ite Iesu Mesia iā’u ’e ’ua here ’oia iā’u. ’Aita vau i ’ite i te hō’ē ’ōrama ’aore rā i fa’aro’o i te hō’ē reo, ’aita rā vau i ’ite pāpū a’e i te ti’ara’a mau ’e te hanahana o te Mesia, ’āhiri ’oia i ti’a i mua iā’u ’e i te pi’ira’a mai i tō’u i’oa.
Mai taua mahana ra e tae roa mai i teie mahana, te mau fa’aotira’a faufa’a ato’a tā’u i rave, ’ua ha’amaita’ihia ïa nā roto i tō’u ’itera’a ē, o Iesu Mesia te Tamaiti a te Atua. ’Ua here roa vau iāna ma te pūai rahi a’e i tā te mau parau e nehenehe e parau. ’O ’oia tō’u Fatu, tō’u Fa’aora, tō’u Tāra’ehara, ’e tō’u hoa.
Nā roto i te mau matahiti e ati a’e te ao nei, ’ua fa’a’ite pāpū vau nō ni’a i te Fa’aora. ’Ua ’ite au ē ’o ’oia te māramarama mau ’e te mure ’ore ’o tē « ’ana’ana mai na […] i te pōuri » (Ioane 1:5). E ha’amaita’ira’a nō tātou ’ia haere iāna ra, ’ia pe’e iāna ’e ’ia ’ite i tōna māramarama i roto i tō tātou orara’a.
Te parau mau nō ni’a i te māramarama
Pauroa te 24 hora, e huri te ao i te pō ’e i te pō e huri i te ao. ’Ia ’ite ana’e tātou i te pōiri o te pō, e’ita tātou e ha’ape’ape’a ē, ’ua reva ’ē te mahana. E ’ite tātou ē, e fa’a’ohu te fenua ’e e ’ana’ana fa’ahou mai te mahana i ni’a ia tātou. E’ita paha tātou e nehenehe e ’ite ’aore rā e fāri’i noa i te māramarama, e vai noa rā te reira i mau taime ato’a.
Nā reira ato’a i te pae vārua. ’Ua ha’amana’o vau i te reira e rave rahi matahiti i ma’iri a’e nei, i te hi’o-māere-ra’a māua tā’u vahine o Barbara i te ra’i i te pō. E au ē ’ua ’ana’ana roa nā milioni feti’a ’e te nehenehe ato’a. I muri iho ’ua fāriu tō’u mau mana’o ma te māere ia Iesu Mesia.
« I te Atua ra ho’i […] i te mātāmua ra » (Ioane 1:2). I raro a’e i te arata’ira’a a te Metua i te ao ra, ’ua hāmani ’oia i te fenua ’e te mau ao ’aore e nūmera (hi’o Mose 1:33). ’O ’oia te mana ’o tē tūrama i te mahana, te ’āva’e ’e te mau feti’a (hi’o Te Ha’api’ira’a Tumu ’e te mau Fafaura’a 88:7–10). ’O ’oia te puna nō te māramarama ’e te ora nō te mau mea ato’a (hi’o Ioane 1:3–4 ; Te Ha’api’ira’a Tumu ’e te mau Fafaura’a 93:10). ’Ua parau ’oia : « ’O vau te māramarama o teie nei ao, ’o tē pe’e mai iā’u ra, e ’ore ïa e haere noa i te pōuri, e māramarama ora ïa tōna » (Ioane 8:12).
I tō tātou nei ’anotau, tē rave maoro nei Sātane nō te tāpiri i te māramarama o te Fa’aora. E’ita rā e nehenehe ia ’outou ’ia vai i roto i te hō’ē vāhi pōiri mau e ’ore roa e ti’a i te māramarama ’o Iesu Mesia ’ia ’ana’ana nō ’outou mai te mea ē, e haere mai ’outou iāna ra. Tei reira noa tōna māramarama.
Mau fa’ahōho’ara’a nā Adam Nickel
E tūrama ’oia i tō tātou ’ē’a
’Ei Tamaiti nā te Atua, ’ua roa’a ia Iesu Mesia te hanahana i te Atua te Metua « hou teie nei ao ra » (Ioane 17:5). ’Ua ha’apa’o maita’i roa ’oia i te parau a tōna Metua (hi’o Ioane 5:30) ’e ’ua haere mai i te fenua nei ma te hina’aro mau. ’Ua fa’aru’e ’oia i tōna hanahana ’ia fānauhia ’oia i roto i te hō’ē fare vaira’a mā’a ha’eha’a i reira tōna metua vahine i « vehi ihora i te ’ahu, tu’u atu ra i tā te pua’a vaira’a mā’a » (Luka 2:7).
I tōna ’āpīra’a, ’ua rave ’oia « i tā [tōna] Metua » (Luka 2:49) ’e ’ua māere te feiā tei fa’aro’o i tāna mau ha’api’ira’a. I roto i tāna tāvinira’a, e mana tōna nō te fa’atupu i te mau semeio, nō te ha’amaita’i ’e nō te fa’aora i te feiā ma’i, nō te fa’atae i te pohe i te ora, ’e nō te hōro’a i te tāra’ehara hope ’ore.
I roto i te mau mea ato’a tā te Fa’aora i parau ’e i rave, i roto iho ā rā i tāna tusia tāra’ehara, ’ua fa’a’ite mai ’oia ia tātou i te ’ē’a nō tō tātou Metua i te ao ra. E tūrama tōna hi’ora’a ’e tāna mau ha’api’ira’a i te ’ē’a e ti’a ia tātou ’ia pe’e nō te ho’i i tō tātou fare i te ra’i ra.
Fa’a’ite i tōna māramarama
’Ia ’ite ana’e tātou i te māramarama o te Tamaiti a te Atua i roto i tō tātou orara’a, e ti’a ïa ia tātou ’ia tūtava i te fa’a’ite i te reira māramarama ia vetahi ’ē. ’Ua au roa i te rirora’a ’ei misiōnare i Peretāne. ’Ua au roa i te rirora’a ’ei peresideni misiōni i Canada. ’E e mea au nā’u tō’u pi’ira’a i teienei ’ei melo nō te pupu nō te Tino ’Ahuru Ma Piti ’āpōsetolo, ’o tē fa’ati’a nei iā’u ’ia fa’a’ite pāpū nō Iesu Mesia nā te ao ato’a nei.
’Ua ha’api’i mai te Fa’aora ē, « Inaha, ’o vau nei te māramarama tā ’outou e fa’ateitei atu i ni’a—te mea tā ’outou i ’ite iā’u i te ravera’a » (3 Nephi 18:24).
Tē ’ana’ana nei te māramarama o te Fa’aora i roto ia tātou i te mau taime ato’a e pure tātou ’e e ’imi tātou i tāna parau i roto i te mau pāpa’ira’a mo’a. E ’ana’ana tōna māramarama mai te mea ē, e here tātou mai tāna e here nei, e fa’a’ite i tō tātou ’itera’a pāpū, ’e e hōro’a i te tāvinira’a pipiri ’ore. E ti’avaru te reira i te pōiri i rāpae i tō tātou orara’a ’e e huti mai i te ta’ata e ’imi nei i tōna māramarama.
E vai noa tōna māramarama e a muri noa atu
Tei reira noa te māramarama o Iesu Mesia nō ’outou. ’Aore roa hō’ē mea—’aore roa hō’ē mea—e nehenehe e upo’oti’a ’aore rā e tūpohe i tōna māramarama. E vai noa ’oia e a muri noa atu ’O Iesu Mesia « te māramarama ’e te ora o te ao nei […] te hō’ē māramarama hope ’ore, ’o tē ’ore roa e pōiri » (Mosia 16:9).
Tē māuruuru nei au ē a muri noa atu nō te ’ohipa i tupu i ni’a iā’u ’ei misiōnare ’āpī i te taime ’a ’ite ai au i te reira nō’u iho nei. ’Ua ’ite pāpū atu ā vau i te reira i teie mahana ’a ora ai au i te orara’a ’e tōna mau tāmatara’a ’e tōna mau ’oa’oa ato’a.
Mai te mea ’aita ’outou i ’ite e haere i hea ’aore rā e aha tē rave, ’a fāriu atu i ni’a i te māramarama mau o te Tamaiti a te Atua. Mai te mea e hina’aro ’outou e haere iāna ra ’e e pe’e i tōna māramarama, e tūrama ’oia i tō ’outou ’ē’a.