« I te tahi taime e mana’o vau ē e mea fa’ahapa rahi roa ’ino tō’u nā metua iā’u. « E nāhea vau e pāhono ai ma te fa’atura ? », Nō te Pūai o te Feiā ’Āpī, Tēnuare 2023.
Uiraʼa ’e Pāhonoraʼa
« I te tahi taime e mana’o vau ē e mea fa’ahapa rahi roa ’ino tō’u nā metua iā’u. E nāhea vau e pāhono ai ma te fa’atura ? »
Fa’ata’a i te taime nō ’outou
Tē a’o nei ’e te fa’atītī’aifaro nei tō ’outou mau metua ia ’outou nō te mea ’ua here rātou ia ’outou ’e tē hina’aro nei rātou e tauturu ia ’outou ’ia manuia. Mai te mea ’aita taua fa’atītī’aifarora’a i tano ia ’outou, ’a rave i te taime nō te ’aparau te tahi i te tahi ’e tō ’outou nā metua, i te taime e hau ai ’outou. E nehenehe ’outou e fa’ata’a i te hō’ē taime e rave ’outou i te hō’ē mea tā ’outou e au roa ’ia rave ’āmui, mai te tunura’a mā’a ’e ’aore rā te fa’a’eta’etara’a tino. E tauturu te reira i te tītaura’a manihini i te Vārua i roto i te ’āparaura’a.
Rebekah M., 17 matahiti, Maryland, Marite
’A ha’amana’o ’ua here rāua ia ’outou
Mai te mea e ha’amana’o ’outou ē, e fa’atītī’aifaro tō outou nā metua ia ’outou ’e e ’āparau ato’a ho’i ia ’outou nō te mea ’ua here rātou ia ’outou, e mea ’ōhie ia ’outou ’ia fāri’i i tā rātou fa’atītī’aifarora’a. Te paraura’a i te tahi pure iti ha’iha’i nō te ’ani i te Vārua i te tauturu ia ’outou ’ia vai tura noa ’e te ha’eha’a, e mea maita’i ïa nō te ’āparau ia rāua.
Lauren M., 16 matahiti, Texas, Marite
E ’ohipa ora te ha’avare-’ore-ra’a
E nehenehe te ’āparaura’a ha’avare ’ore e fa’a’āfaro i te mau huru pe’apea ato’a. ’A pārahi i pīha’i iho i tō ’outou nā metua ’e ’a paraparau ia rāua. ’A parau atu ia rāua e aha te mea e ha’amāuiui nei ia ’outou, ’e ’a fa’aro’o e aha te mea e fa’atupu i te ’oto ’e te ’ino’ino i roto ia rātou. ’A fa’ata’a i te tahi taime ’āmui nō ’outou, ’e ’a fa’atupu i te here ’e te hau i roto i tō ’outou auta’amura’a ’e te ’utuāfare. ’Ia riri ’outou, ’a ani i te Metua i te ao ra ’ia tāmarū ’oia i tō ’outou ’ā’au.
Rafaella P., 17 matahiti, São Paulo, Peretīria
’A parau ia rātou ē, ’ua here ’outou ia rātou
E nehenehe ’outou e pāhono ma te fa’atura, noa atu e mea huru pa’ari. ’A parau i tō ’outou nā metua ē ’ua here ’outou ia rāua, tē mana’ona’o nei ’outou nō rāua, ’e ’ua ’ite ’outou ē ’ua here rāua ia ’outou. ’A fa’a’ite ia rātou ē ’ua riro tā rātou parau ’ei ha’amauiui i tō ’outou manava, i te pae vārua ’e i te pae ferurira’a. ’A pure pinepine. E tauturu mai iho ā te Metua i te ao ra ia ’outou.
Wellie S., 13 matahiti, Luanda, Angola
’Ua ’ite rātou i tō ’outou fāito pūai
Tē tīa’i nei te Atua ’ia hōro’a mai tātou i te mau mea maita’i roa a’e ’e e nehenehe ’oia e ’ite i tō tātou fāito pūai mau. Nō reira ’oia e tītau rahi ai ia tātou. ’Ua ’ite ato’a tō ’outou nā metua i tō ’outou fāito pūai ’e tē hina’aro nei rāua i te mea maita’i roa a’e nō ’outou ’e ’ia manuia ’outou ! E ’ere paha rāua i te mea maita’i roa nō te fa’aitoito i tō ’outou haerera’a i mua, ’e ’aita ’outou i maita’i roa i te ravera’a i te reira. ’A tāu’aparau ma te ha’avare ’ore ’e ma te here i to ’outou nā metua, ’e nā te Vārua e arata’i ia ’outou ’ia noa’a mai i te hāro’aro’a.
Brooke T., 18 matahiti, Arizona, Marite
’Ei ta’ata ha’eha’a ’outou tei fa’aro’o
’Aita i maoro a’enei, ’ua tamata vau i te ha’amaita’i iā’u ’ei ta’ata fa’aro’o maita’i a’e. Tē tāmata nei au i te fa’aro’o ma te muhu i te mea tā tō’u nā metua e parau ’eiaha rā e mārō ’e ’aore rā e pāhono tā’ue noa ia rātou. E tītauhia te fa’a’oroma’i rahi ’e te ha’eha’a, e nehenehe rā teie huru ravera’a e ha’apūai atu i tō ’outou autā’amura’a i tō ’outou nā metua ’e e fa’ati’a ’ia hāro’aro’a rahi atu ā i nā pae e piti.
Erin F., 18 matahiti, Utah, Marite