Patuhia i ni’a i te repo pa’ari

Hōho’a

tamāhine ’e te tuiō pape

Fa’ahōho’ara’a nā Emily Jones

’Ua hi’o noa vau, ma te ta’a ’ore, i te fa’ararirarira’a tō’u ’utuāfare i te niu tīmā ho’i o tō mātou fare. ’Ua huru ma’au hia vau. ’O vai tei fa’aro’o a’enei i te parau nō te fa’ararira’a i te hō’ē fare ? I tō mātou fa’anu’ura’a i Texas, i te fenua Marite, ’ua fa’ata’a mai tō mātou ta’ata tupu ē, i terā vāhi ta’a ’ē, e tītauhia ’ia fa’ararirari i te niu o tō mātou fare ’ia ’ore te reva e fa’ahuru ’ē e ’e fa’a’āfāfā i te tīmā. Nō reira, ’ua fa’ararirari au i te fare, noa atu ē, tē mana’o nei au ē e ’ohipa ma’ama’a tā’u e rave ra.

’Ua tauturu te fa’ararirarira’a nō te hō’ē taime, i te pae hope’a, ’ua ha’amata tō mātou fare i te ’āfāfā. ’Aita i maoro roa i ’ite ai mātou ē, ’aita tō mātou fare i patuhia i ni’a i te repo pa’ari ’Ua patuhia ra i ni’a i te tahi fenua pehu, tei fa’atupu i te murera’a o tō mātou fare i te mea ē tē pē noa ra te mau pehu tei tāpo’ihia e te repo fenua mai te tau mai ā. ’Ua tāmau noa mātou i te fa’ararirari i te niu, terā rā, te ’āfāfā noa ra tō mātou fare. I te hope’a, ’ua reva ’ē atu mātou.

Tē fa’aha’amana’o mai nei teie ’ohipa iā’u nei i te faufa’a rahi nō te patura’a i tō’u papa pae vārua i ni’a i te repo pa’ari o te ’evanelia a Iesu Mesia. E tau ’aita tō’u ti’aturira’a pāpū nō ni’a i te ’evanelia. Nā roto i te mā’itira’a ’ia ti’aturi, ’ua « fa’ararirari vau i te niu » o tō’u fa’aro’o ē tae roa atu i te taime ’ua ti’a ia’u ’ia patu i te hō’ē ’itera’a pāpū i ni’a i te repo pa’ari o te ’evanelia. ’A mā’iti ai au i te ora i te ’evanelia a Iesu Mesia, ’ua patu vau i te tahi niu pūai e’ita e ’āfāfā.

Ann J., Maryland, Marite