Mga Saksi sa Pagkabanhaw

Ni Eric B. Murdock

Mga Magasin sa Simbahan

Ang mga saksi diha sa Bag-ong Tugon sa nabanhaw nga Manluluwas makatabang kaninyo sa pagpangita usab sa inyong kaugalingong pagsaksi.

nabanhaw nga Jesukristo uban ni Maria Magdalena

Sa buntag sa Domingo human sa Paglansang sa Krus ni Jesukristo, si Maria Magdalena miadto sa lubnganan diin gibutang ang Iyang lawas. Iyang nakaplagan ang dako, bug-at nga bato nga giligid ug ang lubnganan walay sulod.

Nagtuo nga ang lawas sa Manluluwas gikuha, si Maria mihilak. Adunay miduol kaniya ug nangutana, “Babaye, nganong nagahilak ikaw?”

Si Maria wala makaila sa tingog nga nakigsulti kaniya. Naghunahuna nga kini mao ang magbalantay sa tanaman, siya miingon, “Tug-ani ako diin mo siya ibutang, ug ako siyang kuhaon.”

“Maria,” mitubag ang tingog.

Si Maria nahibalo dayon kong kinsa ang nagtawag sa iyang ngalan. Kadto mao ang Manluluwas—karon gihimaya ug nabanhaw! (tan-awa sa Juan 20:15–16).

Si Maria nahimong kinaunhan nga nakakita nga si Jesukristo buhi. Ang mga kasulatan nagsulti kanato nga ang uban usab nakasaksi nga Iyang gibuntog ang kamatayon. Sa unsang paagi nga ang ilang mga kasinatian makapalig-on sa imong pagtuo? Sa unsang paagi ikaw, bisan og wala makakita Kaniya sa pisikal, makasaksi nga ang Manluluwas buhi?

Duha ka Disipulo diha sa Dalan padulong sa Emaus

Si Jesus uban sa mga disipulo diha sa dalan padulong sa Emaus

Usa ka adlaw, wala madugay human sa Paglansang sa Krus ni Kristo, duha ka mga disipulo nga mibiyahe ngadto sa Emaus giubanan sa usa ka estranghero. Magkauban, nagsultihanay sila og mga panagna mahitungod sa Pagkabanhaw. Kini nga panag-istoryahanay mipuno sa nagsubo nga mga disipulo sa hingpit nga kalipay.

Pag-abot nila sa Emaus, gihangyo sa mga tinun-an ang langyaw nga magpabilin uban kanila. Atol sa ilang panihapon, ang estranghero mipanalangin ug misilbi sa pagkaon. Sa kalit lang, ang mga disipulo nakaila sa estranghero, apan sa wala pa sila makasulti og bisan unsa, ang estranghero nahanaw. Ilang naamgohan nga ang Manluluwas nag-uban kanila sa tibuok panahon!

“Dili ba ang atong mga kasingkasing nagdilaab man sa sulod nato?” nangutana sila sa usag usa. Ang Espiritu mipamatuod nga si Jesus gayod ang kauban nila (tan-awa sa Lucas 24:13–34).

Ang Napulo ka Apostoles

Si Jesukristo mipakita ngadto sa 10 sa Iyang Apostoles samtang sila naghisgot mahitungod sa mga pagpamatuod nga ilang nadungog mahitungod sa Iyang Pagkabanhaw.

“Ang Kalinaw maga-uban kaninyo,” Siya misulti. “Tan-awa ninyo ang akong mga kamot ug akong mga tiil, nga mao gayod ako: hikapa ninyo ako, ug tan-awa, kay ang espiritu walay unod ug mga bukog, ingon sa inyong nakita nga ania kanako” (Lucas 24:36, 39). Ang matag Apostol nakakita ug mibati sa nilansangan nga mga kamot ug tiil sa Manluluwas.

Si Apostol Tomas

Si Tomas wala didto sa dihang ang Manluluwas mipakita ngadto sa ubang Apostoles. Dili siya makatuo nga si Jesus tinuod nga nabanhaw. Siya miingon, “Gawas kon makita ko ang inagian sa mga lansang diha sa iyang mga kamot, … ako dili motuo” (Juan 20:25).

Paglabay sa walo ka adlaw, si Jesus mipakita ngadto sa Apostoles pag-usab. Niini nga higayon si Tomas anaa uban kanila ug mituo. Ug si Jesus miingon kang, Tomas, “Tungod kay nakita mo ako, nagmatinoohon ka: dalaygon kadtong wala managpakakita, ngani nanagpanoo.” (tan-awa sa Juan 20:26–29).

Pagpangita sa Inyong Kaugalingong Saksi

Si Jesukristo mipakita ngadto sa uban human sa Iyang Pagkabanhaw (tan-awa sa Mateo 28:9–10; Mga Buhat 9:4–8; 1 Mga Taga-Corinto 15:6). Bisan kon wala kamo makakita Kaniya sama kanila, mahimo kamo gihapon nga usa ka saksi.

Ang Manluluwas nangutana sa Iyang mga disipulo, “Sumala sa sulti sa mga tawo, kinsa man kuno ang Anak sa tawo?” Sila miingon, “Ang uban nagaingon nga si Juan nga Bautista kuno … o usa sa mga propeta.”

Si Jesus dayon nangutana, “Apan kamo, unsa may inyong sulti kinsa man ako?”

Si Pedro mitubag, “Ikaw mao ang Kristo, ang Anak sa Dios nga buhi.”

“Dalaygon ikaw,” mitubag si Jesus kang Pedro. “Kay wala kini ipadayag kanimog tawo, kondili gipadayag kini kanimo sa akong Amahan nga anaa sa langit” (Mateo 16:13–17).

Nagtindog si Jesus sa atubangan ni Pedro. Si Pedro naglakaw ug nakigsulti Kaniya ug nakakita sa daghan sa Iyang mga milagro, apan wala kana makahatag kang Pedro sa iyang pagsaksi. Gipasabot ni Jesus nga ang pagsaksi ni Pedro gipadayag sa atong Amahan sa Langit. Mitudlo usab siya nga kana nga pagsaksi mas segurado kay sa pagkakita pinaagi sa atong mga mata lamang.

Bisan og wala makakita ni Jesukristo sa pisikal nga paagi, makapangita kamo Kaniya sa personal nga paagi ug makakat-on pa og dugang mahitungod Kaniya. Mapakita ninyo ang inyong hugot nga pagtuo diha Kaniya pinaagi sa pagtuman sa Iyang mga sugo. Ang Espiritu makahikap sa inyong kalag ug makahatag kaninyo og pagsaksi. Sama niadtong nakakita gayod sa nabanhaw nga Manluluwas, makabarog ug makapamatuod usab kamo nga Siya buhi, nahigugma kanato, ug anaa alang kanato karon.