“Ang Gasa sa Imong Pagtagad,” Alang sa Kalig-on sa mga Kabatan-onan, Abr. 2023.
Ang Gasa sa Imong Pagtagad
Ang imong abilidad sa pagtagad maoy gasa gikan sa Dios. Ania ang pipila ka mga ideya aron mapahimuslan kini.
Paghulagway pinaagi ni Dave Klüg
Ang imong abilidad sa pagtagad talagsaon gayod. Tugoti ako sa paghulagway:
Unsa ang mga butang nga anaa sa imong wala ug tuo? Unsay paminaw nimo sa imong panit nga gisul-oban sa imong sinina? Unsa man nang mga kasaba sa background? Unsa man nang nanimaho? Unsa ang kasamtang lasa diha sa imong baba?
Tingali wala ka maghunahuna bahin sa bisan unsa ani nga mga butang hangtod karon. Ang imong pagtagad naa niini nga artikulo (diin ako mapasalamaton nimo sa tibuok nakong kasingkasing). Ang kamatuoran nga nakahimo ka sa pagtak-op sa tanan nga uban pang impormasyon talagsaon gayod.
Ang imong mga pamati modawat ug toneladang impormasyon, apan ang imong utok naghashas sa tanan ug nagtabang kanimo sa pagpokus sa unsay importante kanimo. Kon wala kini nga paghashas, naa ka sa usa ka kahimtang nga kanunay adunay sobra nga pagpadasig ug sobra nga kasayoran. Ug kana gikan ra sa gawas nga kalibotan. Ikaw usab adunay mga panumdoman, mga hunahuna, ug mga pagbati sa sulod nimo nga makakuha sa imong pagtagad.
Si Presidente Russell M. Nelson mitudlo: Gibuhat sa Dios isip gasa kaninyo, [inyong lawas] talagsaon gyod kini kaayo! … Ang inyong utok nagtugot kaninyo nga makakat-on, makahunahuna, ug makarason.”1
Usa ka paagi sa pagtabang kanimo sa imong utok mao ang imong abilidad sa pagtagad. Kini naghimo sa kinabuhi nga mas luwas, mas yano, ug mas makahuloganon. Kini usa ka gasa gikan sa Langitnong Amahan nga makatabang nimo samtang mohimo ka og mga pagpili ug nagkat-on.
Apan dili kanunay sayon ang paghatag og pagtagad—o ang pagkahibalo kon unsa ang angayan sa imong pagtagad.
Usa kini ka Gasa—Mao nga Angkona Kini
Ang moderno nga kinabuhi mahimong mapuno sa daghang mga butang nga nag-ilog sa imong pagtagad. Ubos niini nga mga kondisyon, pipila ka butang ang mahimong mahitabo: (1) mahimong maglisod ka sa paghan-ay kon unsa ang importante ug unsa ang dili, ug (2) mahimong magkaproblema ka sa paghatag og pagtagad sa bisan unsa nga butang sulod sa dugay nga panahon.
Si Satanas nahimuot sa bisan hain niini nga mga sangpotanan. Siya dili gusto nga magpokus ka sa kon unsa ang tinuod nga importante, busa kon ang imong bug-os nga pagtagad gitumong ngadto sa gagmay nga mga butang, malipay siya. Sa laing bahin, ganahan usab siya nga kanunay kang mabalda aron ang imong pagtagad mabalhin gikan sa usa ka butang ngadto sa lain. Unya ang imong mga kasinatian dili kaayo makahuloganon ug dili ka kaayo makat-on ug molambo.
Ania ang pipila ka mga ideya sa pag-angkon sa gasa sa imong pagtagad:
-
Pamalandong ug pag-ampo. Paduol ngadto sa imong Langitnong Amahan. Paghunahuna sa mga kamatuoran ug mga pagtulon-an mahitungod Kaniya ug sa Iyang plano. Pag-inusara uban Kaniya diha sa pag-ampo. Pangayo Kaniya og tabang.
-
Pagbasa. Ang pagbasa maoy usa sa labing maayong butang nga imong mahimo aron ma-ehersisyo ang imong utok ug madisiplina ang imong kaugalingon sa pagtutok. Pagbasa sa mga kasulatan. Pagbasa og ubang “labing maayo nga mga libro” nga gusto nimo (Doktrina ug mga Pakigsaad 88:118). Pagbasa og lain nga artikulo niini nga magasin. Paggahin lamang og panahon ug pagbasa.
-
Pagmahunahunaon ug magbaton og katuyoan. Sulayi nga makahibalo kon unsa ang makakuha sa imong pagtagad, kon unsa ang tinuod nga nakapainteres nimo, ug kon unsa ang makabalda nimo. Tuyoa nga maghatag og mapadayonong pagtagad sa importante nga mga butang. Paggahin og panahon sa imong adlaw aron sa pagpokus. Disiplinaha ang imong kaugalingon sa pagtagad sa unsay imong nahibaloan nga importante. Ug hinumdomi, “Ang kalig-on … moabot kini gikan sa pagpahimutang sa atong pagtagad ug mga paningkamot sa mga sukaranan sa gipahiuli nga ebanghelyo ni Jesukristo.”2
-
Pagpalong [off] sa mga butang o ihiklin kini. Palonga o ihiklin ang bisan unsa nga nahibaloan nimo nga makabalda kanimo—mga himan, telebisyon, musika—bisan unsa. Ang pipila ka mga tingog sa background mahimong makatabang nimo sa pagpokus, apan ang uban dili.
Pagpokus diha sa Hingpit nga Kalipay
Ang imong abilidad sa pagpokus motabang nimo nga makat-on, ug motabang usab nimo nga makasinati og hingpit nga kalipay. Si Presidente Russell M. Nelson miingon:
“Ang kalipay nga atong gibati dili kaayo konektado sa mga sirkumstansiya sa atong kinabuhi ug apan ang tanan konektado kaayo sa gitutokan sa atong kinabuhi.
“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”3
Gamita ang gasa sa pagtagad sa bug-os niini. Pagbantay sa mga kapeligro sa sayop nga direksyon ug pagkabalda. Ug pangitaa ang hingpit nga kalipay diha sa paghatag sa imong pagtagad ngadto sa mga butang nga labing mahinungdanon.