Tabang sa Kinabuhi

Ang Gasa sa Dios sa Pagtabang Kanimo nga Makakat-on

Ni Amanda Penrod

Mga Magasin sa Simbahan

Dugangi ang imong pagkat-on pinaagi sa pagsabot sa tahas sa Espiritu Santo niini.

Gusto ba nimo nga makakat-on og bag-ong pinulongan, apan wala gayod mosulay tungod kay wala ka maghunahuna nga mahimo nimo? Gusto ka bang mosulay og bag-ong resipe, mahimong mas maayo sa matematika, o makakat-on unsaon paglangoy? Tag-ana kon unsa? Uban sa tabang sa Espiritu Santo, ang ikatulo nga miyembro sa Dios nga Kapangulohan, ang imong abilidad sa pagkat-on mahimong molambo!

Ang espiritu sa pagkat-on ug kahibalo mao ang usa sa daghang mga gasa sa Espiritu Santo. Makatabang Siya kanimo sa daghang paagi, lakip sa imong pagkat-on.

Unsaon sa Espiritu Santo sa Pagtabang Kanimo nga Makakat-on

Mga paghulagway pinaagi ni Emily E. Jones

1 Nagpamatuod nga tinuod ang imong nakat-onan

(Tan-awa sa Moroni 10:5.)

Pananglitan: Mibati ka og kalinaw sa imong kasingkasing ug hunahuna human makat-on og usa ka butang nga tinuod sa seminary.

2 Makatabang kanimo sa paghinumdom sa imong nakat-onan

(Tan-awa sa Juan 14:26.)

Pananglitan: Samtang nakigsulti sa usa ka higala, mahimo nimong mahinumdoman ang usa ka butang nga wala nimo mahunahuna sa dugay nga panahon. Kana nga hunahuna mahimong tubag sa ilang pangutana o makahatag kanila og kahupayan.

3 Naglamdag sa imong hunahuna ug pagsabot

(Tan-awa sa Doktrina ug Pakigsaad 6:15; Alma 32:28. Ang paglamdag nagpasabot sa pagsabot sa usa ka butang nga mas maayo.)

Pananglitan: Nanglimbasog ka sa pagkat-on og bag-ong pormula sa matematika. Human sa pagtuon ug pagpangayo og tabang, sa kataposan nasabtan nimo kini ug kon unsaon kini paggamit sa tinuod nga kalibotan.

4 Makapuno nimo og kalipay!

(Tan-awa sa Doktrina ug mga Pakigsaad 11:13.) Siya makapuno nimo og kalipay ug makatabang nimo nga makahibalo nga ikaw nag-uswag ug nahimong mas sama sa Dios.

Pananglitan: Ang usa ka minahal moabot aron itudlo nimo ang ilang sikat nga resipe sa sabaw. Mibati ka og kalipay tungod sa panahon nga imong gigahin ug tungod kay nakakat-on ka ug bag-ong butang!

Mga Ideya sa Pagdapit sa Espiritu Santo nga Mag-uban Kanimo

1. Pagtuman sa mga sugo (tan-awa sa Moroni 8:25–26). Kon gusto nimo nga ang Espiritu Santo mahimong imong kauban, kinahanglang maningkamot ka sa pagsunod sa Dios ug sa pagtuman Kaniya. Dili kinahanglan nga mahimong perpekto ka, apan makatabang kini kon maningkamot ka.

2. Pag-ampo nga kinasingkasing. “Ug ang Espiritu ihatag nganha kaninyo pinaagi sa pag-ampo diha sa hugot nga pagtuo” (Doktrina ug mga Pakigsaad 42:14). Pag-ampo alang sa Espiritu Santo nga magauban kanimo ug motabang sa unsay imong nakat-onan.

Sugyot: Pangita og hilom nga lugar aron regular nga magtuon. Pangita og lugar nga makatabang nimo nga mabati ang Espiritu Santo.

3. Paminaw, pagkat-on, ug mosalig sa mga paagi sa pagpakigsulti sa Espiritu Santo kanimo. Ang espiritu sa pagkat-on ug kahibalo maoy usa sa mga gasa sa Espiritu Santo. Diha sa mga kasulatan, gitudloan kita nga ang Espiritu Santo mamulong sa atong mga hunahuna ug sa atong mga kasingkasing (tan-awa sa Doktrina ug mga Pakigsaad 6:15, 22–24; 8:2; 9:7–9).

   Ang Espiritu Santo mahimong mamulong usab kanimo sa ubang mga paagi.

4. Paningkamot. Si President Russel M. Nelson miingon, “Ang Ginoo ganahan og paningkamot” (diha sa Joy D. Jones, “Usa ka Talagsaong Balaanon nga Tawag” [ Liahona, Mayo 2020, 16]). Samtang magtuon ka pag-ayo, buhata ang imong labing maayo, ug buhata ang gikinahanglan nga trabaho aron makat-on og usa ka butang, ang Dios motabang kanimo.

Pag-abli sa mga Pultahan sa Oportunidad

Ang edukasyon ug tibuok kinabuhi nga pagkat-on makatabang nimo sa pagpangita og mga paagi sa paghigugma ug pagserbisyo sa uban nga mas maayo kay sa imong gihunahuna nga posible. Sa imong pagtinguha sa Espiritu Santo samtang ikaw nagkat-on, ang Dios makapalambo sa imong mga paningkamot.