“Unsaon man nako sa pag-ila ang matag adlaw nga espirituhanong mga kasinatian sa akong kinabuhi?” Alang sa Kalig-on sa mga Kabatan-onan, Abr. 2023.
Mga Pangutana ug Mga Tubag
“Unsaon man nako sa pag-ila ang matag adlaw nga espirituhanong mga kasinatian sa akong kinabuhi?”
Isulat ang mga Pagbati ug Pag-aghat
“Pangitaa ang mga pagbati sa kahupayan, kalipay, ug mga pag-aghat sa pagbuhat og maayo. Kini nga mga butang nagagikan sa Espiritu Santo. Kon makit-an ninyo kini, isulat kini. Ang pagbasa pag-usab sa inyong gisulat makatabang kaninyo nga makaila sa mga paagi nga ang Espiritu nakigsulti kaninyo. Makahatag usab kini og kahupayan sa lisod nga mga panahon.”
Jordan P., 15, Virginia, USA
Pagpokus diha sa Manluluwas
“Kinahanglan natong ipadayon ang atong pagpokus sa Manluluwas ug pangutan-on ang atong kaugalingon kon unsay atong makat-onan gikan sa atong mga kasinatian.”
Chloe P., 14, Idaho, USA
Ipha ang Imong mga Panalangin
“Kon kita mobati og kahadlok, pagduhaduha, o nabug-atan, atong mabati ang Espiritu pinaagi sa pag-ihap sa atong mga panalangin. Kini nagtugot kanato nga makabaton og pagpamatuod kon unsa ka dako ang gugma sa Dios kanato, ug kini nagpakita kanato sa mga paagi nga Siya nagpanalangin kanato. Kon kita makaila niini nga mga panalangin, kita mahimong mas makahimo sa pagpatalinghog sa mga pag-aghat sa Espiritu Santo. Atong makita ang espirituhanong mga kasinatian nga gihatag ngari kanato ug kon sa unsang paagi kini nakapalig-on kanato atol sa atong mga pagsulay.”
Bella R., 14, Arizona, USA
Magmapasalamaton ug Maminaw
“Nakaila ko sa matag adlaw nga espirituhanong mga kasinatian pinaagi sa pagkamapasalamaton, pagpaminaw sa mga pag-aghat sa Espiritu sa pagkamasulundon, ug pagsuporta sa akong pamilya sa buntag ug gabii nga mga debosyon.”
Richard A., 12, Nigeria
Magtinguha ug Maglaom alang sa mga Milagro
“Ang propeta midapit kanato nga magtinguha ug maglaom alang sa mga milagro. Pinaagi sa pagsunod sa tambag sa propeta, atong makita ang kamot sa Dios sa tanang butang imbes nga isipon ang mga milagro sa atong kinabuhi nga sulagma lang.”
Evelyn L., 20, Brazil
Ang Dios Nahibalo Unsay Labing Maayo alang Kaninyo
“Pangitaa ang maayo diha sa tanan. Usahay morag supak ninyo ang kalibotan, pero ang Dios nag-uban ninyo. Ayaw kalimti nga ang labing daotan nga mga adlaw mahimo nga labing maayo alang kaninyo. ‘Ang pagsulay sa [inyong pagtuo] … bililhon pa kay sa … bulawan’ (1 Pedro 1:7).”
Broc C., 17, Utah, USA