“Tana Managat Na Kita,” Alang sa Kalig-on sa mga Kabatan-onan, Abr. 2023
Tana Managat Na Kita
Usa ka giya alang sa mga kapangulohan sa korum ug sa klase.
Mga paghulagway pinaagi ni Jarom Vogel
Daghan sa nag-unang mga disipulo ni Jesukristo sa orihinal nagtrabaho isip mga mananagat. Sa dihang gitawag sila sa Manluluwas, Siya miingon, “Kuyog kamo kanako, ug tudloan ko kamo sa pagpanagat og mga tawo” (Mateo 4:18–20).
Ang Manluluwas wala maghangyo sa iyang mga disipulo nga magbutang og paon sa pasol, iitsa ngadto sa pundok sa katawhan, ug birahon kon si kinsa ang mopaak sa paon. Hinoon, ang Manluluwas nagpasabot nga isip Iyang mga disipulo, obligasyon nila ang pagtabang sa katawhan sa pagduol ngadto kang Kristo ug pagkaplag og kalinaw diha Kaniya.
Ikaw usab “mananagat og mga tawo”! Ug kon ikaw anaa sa kapangulohan sa korum o sa klase, ikaw gitawag, gi-set apart, ug gihatagan og awtoridad sa pagkapari sa pagtabang sa pagdala niadtong anaa sa imong korum o klase ngadto sa Manluluwas. Mao nga tana managat na kita!
1. Sakay na sa Bangka
Sige, kadiyot lang. Una itaod ang life jacket ug pagbutang og sunscreen. Pagdala sa imong paniudto ug bugsay. Dayon seguroha nga makasakay sa bangka! (Kon ingnon pa, syempre.) Isip mananagat og mga tawo, ang una nimong kabigon mao ang imong kaugalingon. Isip usa ka batan-ong lalaki o batan-ong babaye kinsa nagsunod sa Manluluwas mao ang imong numero uno nga prayoridad.
2 Kuhaa ang Imong Gamit sa Pagpanagat
Lisod ang pagpanagat kon walay gamit para panagat, o pingwit. Niini nga kahimtang, matag usa sa pingwit nagrepresentar sa usa sa imong nag-unang mga responsibilidad isip miyembro sa kapangulohan sa korum o klase.
1: Pangitaa ug tinguhaa ang personal nga pagpadayag.
Pag-ampo ngadto sa Langitnong Amahan mahitungod sa imong calling. Pangutana Kaniya, dayon lihoka ang mga hunahuna ug mga pagbati nga moabot sa imong hunahuna. Gusto Niya nga mogiya kanimo sa imong pagserbisyo.
2: Paghigugma ug pangalagad.
Paggahin og panahon sa pag-ilaila ug pagpangalagad sa matag miyembro sa imong korum o klase. Ang pipila kanila tingali anaa sa malisod kaayo nga mga pagsulay. Sa unsang paagi nga ikaw makapangalagad kanila, mohigugma kanila, mahimong ilang higala, ug motabang kanila sa pagduol ngadto kang Kristo?
3: Pagpahigayon og mga miting sa kapangulohan.
Isip mga kapangulohan sa korum ug sa klase, kamo ang kapitan sa barko, sa pagkasulti. Pagpundok kanunay uban sa inyong kapangulohan ug hamtong nga mga tigtambag. Pag-istorya kabahin sa mga panginahanglan sa inyong korum o klase, hisgoti kon sa unsang paagi kamo makaapil sa buhat sa kaluwasan ug kahimayaan, pagplano og mga kalihokan ug mga leksiyon sa Dominggo, ug pagdesider kon unsaon ninyo pagtudlo sa inyong mga responsibilidad.
4: Pagpangulo ug pagpahigayon og mga klase sa Dominggo.
Ang Dominggo usa ka importante nga adlaw sa pagkahimong usa ka mananagat og mga tawo. Pagpahigayon og mga miting sa Young Women o sa korum sa Aaronic nga Pagkapari ug mangulo sa “Pakigtambag og Dungan” nga seksiyon sa Dali, Sunod Kanako sa dili pa ang leksiyon.
5: Pagplano ug buhata ang pagserbisyo ug mga kalihokan.
Ang maayo nga pagpanagat naglakip og maayo nga pagplano. Pag-andam og serbisyo ug mga kalihokan nga adunay makahuloganon nga katuyoan—mga butang nga dili lang para sa kalingawan, apan makatabang sa inyong korum o klase sa pagkat-on og butang nga bag-o o mahimong mas sama sa Manluluwas.
3 Panagat Na
Andam na ba ka nga mahimong mananagat og mga tawo? Samtang magtabang ka sa mga miyembro sa inyong korum ug klase nga mobati nga gihigugma ug nalakip, makaangkon sila og kahigayonan nga mas maduol sa Manluluwas ug makakaplag og kalinaw diha Kaniya. Ug makakaplag ka og kalinaw ingon man usab makatabang sa Manluluwas sa Iyang buhat.