“Kon Ikaw Mobati og Kahuyang.” Alang sa Kalig-on sa mga Kabatan-onan, Abr. 2023.
Kon Ikaw Mobati og Kahuyang
Sa unsang paagi ang atong kahuyang mausab ngadto sa kalig-on?
Mga paghulagway pinaagi ni Corey Egbert
Kitang tanan adunay mga kahuyang—pananglitan, usahay mabalaka ko sa mga butang nga dili nako makontrol. Ako usahay motandi sa akong kaugalingon ngadto sa uban. Unsa man pod kamo? Kamo aduna bay mga kahuyang? Tingali kamo nakigbisog sa kahadlok o tentasyon. Tingali kamo adunay pisikal nga kahuyang nga hinungdan sa inyong kasakit o kalisod. Tingali ang inyong kahuyang kay usa ka pakigbisog sa pagpasaylo sa uban, o gani gustong masuko sa Dios tungod sa mga butang nga nahitabo kaninyo. Kitang tanan adunay mga kahuyang.
Gani, si Apostol Pablo adunay pipila ka kahuyang. Si Pablo misulat nga aron dili mahimong mapasigarbohon, gihatagan siya sa Ginoo og “tunok dinhi sa lawas” (2 Mga Taga-Corinto 12:7). Wala kami masayod kon unsa kadto, apan kini usa ka matang sa kahuyang. Si Pablo wala lang mangayo sa Ginoo apan nangamuyo sa Ginoo nga kuhaon kini nga kahuyang. Dili gani kay kausa ra ka higayon siya nagpakiluoy. Siya nangamuyo katulo ka higayon sa Ginoo para kuhaon ang iyang kahuyang (tan-awa sa 2 Mga Taga-Corinto 12:8).
Mahimong ingon niana usab ang inyong gibati. Tingali makadaghan kamo nangayo sa Ginoo nga kuhaon ang usa ka tunok sa inyong lawas. Apan ang Ginoo wala mikuha sa kahuyang ni Pablo. Bisan og si Pablo nagpadayon sa paghangyo nga kini kuhaon, ang Ginoo miingon, “Ang akong grasya igo alang kanimo: kay ang akong gahom ginahingpit diha sa kahuyang” (2 Mga Taga-Corinto 12:9).
Hunahunaa kana nga pahayag. Tinuod ba gyod kini? Makabugti ba gayod ang gahom ni Kristo sa atong kahuyang? Human sa tanan, Siya mipili og usa ka batan-ong lalaki kinsa nagdako uban sa usa ka daotan nga amahan aron mahimong Abraham, ang amahan sa daghang mga nasod. Ug mipili Siya og usa ka binilanggo nga ginganlan og Jose aron mapugngan ang kagutom sa Ehipto ug mipili og laing Joseph, kini usa ka walay kahibalo nga 14 anyos nga batan-ong lalaki, aron sa pagpahiuli sa Iyang ebanghelyo. Gisultihan usab niya si Gideon nga pakunhoran ang iyang kasundalohan ngadto sa 300 sa dihang si Gideon nag-atubang sa dili maihap nga panon, ug iyang gitabangan ang usa ka langyaw nga biyuda nga ginganlan og Ruth sa pagsugod sa usa ka harianong kaliwatan.
Makausab ba gayod ang gahom ni Kristo sa atong kahuyang ngadto sa kalig-on?
Si Elias, sa iyang kaugalingon, nagmadaugon sa kapin sa 400 ka pari ni Baal. Sa dihang si Jeremias gitawag sa Dios, si Jeremias miingon, “Ako dili mahibalo nga mosulti; kay ako usa ka bata lamang” (Jeremias 1:6). Apan nag-alagad siya isip usa ka propeta halos 40 ka tuig. Ug ang Ginoo mibuhat pinaagi sa usa ka Judeo nga ilo nga babaye nga ginganlan og Ester sa pagluwas sa tibuok gingharian. Sa pagkatinuod, ang Ginoo sa tinuoray naghimo og daghang mga milagro pinaagi sa atong kahuyang!
Hinumdomi ang mga pulong sa Manluluwas: “ang akong gahom ginahingpit diha sa kahuyang.” Kon kamo mobati nga huyang tungod sa inyong kaugalingong mga tunok diha sa lawas, hinumdomi nga ang Dios makagamit ug mogamit kaninyo, mga kahuyang ug sa tanan, alang sa Iyang mga katuyoan.
Usa ka higala nako bag-o lang miadto sa templo. Samtang naghulat siya sa chapel, namatikdan niya ang usa ka tigulang nga lalaki nga nagtugtog sa organ. Nakadayeg siya kon unsa ka maayo ang iyang pagtugtog—ug mas nakadayeg pa sa dihang iyang namatikdan nga wala siyay palid sa musika. Nagtugtog siya og daghang mga kanta nga halos hingpit. Siya miingon kanako, “Sa kaulahian akong nahibaloan nga kining tawhana buta. Gipanalanginan ko niya samtang natandog ko sa iyang kinabuhi sa kamapahinungoron.”
Ang gahom ni Jesukristo sa walay kinutoban labaw pa sa bisan unsa nga kahuyang nga lisod nimo o nako. Tingali kon kita mobati nga naluya, kini usa ka timaan nga ang gahom ni Kristo sa dili madugay molihok sa atong kinabuhi kon kita modapit Kaniya.
Ang grasya sa Manluluwas, o ang Iyang makaabag nga gahom, usa ka mahinungdanong bahin sa Iyang Pag-ula. Siya “motabang kanato sa pagkakita ug pagbuhat ug mahimong maayo sa mga paagi nga dili nato mabantayan o matuman gamit ang atong limitadong mortal nga kapasidad.”1
Pinaagi sa Iyang Pag-ula, ang Manluluwas anaa aron sa pagtabang kanato sa paghinulsol sa atong mga sala ug usab sa paglig-on kanato kon kita mobati og kahuyang. Tingali adunay mga butang nga dili mahimo ninyo ug nako—uban sa atong kaugalingong limitado nga mga abilidad—apan uban sa makaabag nga gahom ni Kristo, kita makahimo niini.
Ang Ginoo misulti ni Moroni: “Ikaw nagmatinud-anon; busa, ang imong mga sapot pagahimoon nga limpyo. Ug tungod kay ikaw nakakita sa imong kahuyang ikaw himoon og malig-on, gani ngadto sa paglingkod sa dapit diin Ako nag-andam diha sa mga mansyon sa akong Amahan” (Ether 12:37).
Timan-i nga ang Ginoo wala mosulti ni Moroni, “Ikaw mahimong lig-on niini nga kinabuhi.” Sa sitwasyon ni Moroni, ang hingpit nga pagkalig-on moabot sa sunod nga kinabuhi. Sama sa gitudlo ni Presidente Nelson, alang sa matag usa kanato dinhi sa pagka-mortal, “ang kahingpitan naghulat. Moabot lamang kini sa kahingpitan human sa Pagkabanhaw ug pinaagi lamang sa Ginoo.”2
Human makadawat niini nga mensahe gikan sa Ginoo, si Moroni mitambag sa moderno nga mga magbabasa kon unsaon sa pagpabilin diha sa grasya sa Dios. Siya miingon, “Ug karon, ako modasig kanimo sa pagpangita niini nga Jesus diin ang mga propeta ug mga apostoles misulat, nga ang grasya sa Dios nga Amahan, ug usab ang Ginoong Jesukristo, ug sa Espiritu Santo, nga nagpamatuod kanila, mahimo unta nga mag-uban diha kaninyo sa kahangtoran” (Ether 12:41).
Samtang kita mangita kang Jesus, atong mabati ang Iyang makapalig-on nga gahom nga nagtabang kanato sa mga hagit nga atong giatubang. Kon mobati ka og kahuyang, kana mahimong paagi sa Ginoo sa pagdapit kanimo sa paggamit sa Iyang kusog ug gahom.