“7 ka Tinago nga mga Benepisyo sa Pagkat-on,” Alang sa Kalig-on sa mga Kabatan-onan, Abr. 2023.
Tabang sa Kinabuhi
7 ka Tinago nga mga Benepisyo sa Pagkat-on
Ang tibuok kinabuhi nga pagkat-on adunay mga kaayohan—ang pipila dili tingali nimo mahunahunaan!
“Oy! Kanus-a pa man intawon nako magamit kining problema sa math?” Kitang tanan nakaagi na niana. Ma-math man kini, pagsulat, o biology, kita usahay maghunahuna kon aduna ba niining atong gipaningkamotan og maayo sa pagkat-on ang makatabang nato sa umaabot nga kinabuhi.
Kasagaran kanato nakasabot sa koneksiyon tali sa mga oportunidad sa edukasyon ug panarbaho. Bisan pa man, kon maghisgot kita og pagkat-on, ang pipila ka mga panalangin moabot sa mga paagi nga wala nato damha. Aniay pipila sa wala kaayo mahibaloi nga mga benepisyo sa pagkat-on.
1. Ikaw adunay mas daghang maistorya kon makigkita ka og mga tawo.
Kini dili lang mag-istorya sa dili kaayo importanteng mga butang. Kon daghan kamo og makat-onan niini nga kinabuhi, mas daghang paagi nga makakonektar ka sa laing tawo nga bag-o pa nimong naila-ila.
2. Makatigom ka og kwarta.
Kon mas nakahibalo ka kon unsaon, mas dili ka mobayad og laing tawo nga mobuhat niini para nimo.
3. Mas makaserbisyo ka og maayo sa uban.
Kon ang imong higala natanggong sa pikas bahin sa dalan kay mihiyos ang ligid sa iyang sakyanan, ug kahibalo gyod ka kon usaon sa pag-ilis o pag-ayo sa mihiyos nga ligid, mamahimo ka nilang bayani! Si Presidente Russell M. Nelson sa makausa nagtudlo, “Ang edukasyon mao ang kalainan tali sa paghandom nga makatabang kamo sa ubang tawo ug sa paghimo aron makatabang kanila.”1
4. Ang pagkat-on og bag-o nga butang mahimong mosangpot ngadto sa makapadasig nga kalingawan sa kinabuhi.
Ang pagkat-on og dugang—sama sa pagtan-aw unsaon sa paghimo og hand-blown glass—mahimong mosangpot og bag-ong kalingawan alang kanimo. Ug ang mga kalingawan maayo alang sa kahimsog sa pangisip!
5. Ang imong kinabuhi adunay daghang kalainan.
Kon magpalit og pan, kutob ra ka sa unsay ilang gibaligya sa tindahan. Apan pagkat-on unsaon sa pagluto og pan ug dili ka mahutdan og bag-ong mga opsiyon nga sulayan!
6. Kon daghan ka og makat-onan, mas mahimo ka nga sama sa Dios.
Tan-awa sa Doktrina ug mga Pakigsaad 93:36; Abraham 3:19.
7. Naghatag ka sa imong kaugalingon og bag-ong pagsugod sa sunod nga kinabuhi.
Dili nimo madala ang imong mga katigayonan human niini nga kinabuhi (tan-awa sa Alma 39:14). Apan ang kahibalo nga imong gihagoan sa tibuok kinabuhi ang maimoha sa kahangtoran (tan-awa sa Doktrina ug mga Pakigsaad 130:19.).