“Ang Imong Manluluwas ug ang Imong Umaabot,” Alang sa Kalig-on sa mga Kabatan-onan, Abr. 2023.
Ang Imong Manluluwas ug ang Imong Umaabot
Si Jesukristo naghimo sa tanang butang nga posible sa imong umaabot dinhi ug sa kahangtoran.
Christ at the Tomb [Si Kristo sa Lubnganan], ni Albin Veselka, gigamit uban sa pagtugot
Ania ka karon sa usa ka madanihon nga panahon sa kasaysayan. Ikaw adunay buluhaton sa eskwelahan, kahigalaan, mga responsibilidad sa pamilya, tingali usa ka trabaho, ingon man usab ubang kalihokan ug mga kalingawan nga makapa-bisi nimo.
Sa samang higayon, tingali maghunahuna ka bahin sa imong umaabot:
Unsay anaa sa imong unahan? Unsay gusto nimong makab-ot? Unsay imong trabaho? Unsa nga mga hagit ang imong atubangon? Ang akong tubag niadto nga mga klase sa pangutana yano lang: Wala ko kahibalo! Wala gayoy nahibalo unsay mahitabo sa umaabot.
Apan ako nasayod nga ang imong umaabot adunay daghang maanindot nga mga oportunidad alang sa imong pagkat-on, pagtubo, ug paglambo. Buot kong mopakigbahin kanimo kon unsaon nimo pagkab-ot sa tanan nimong mahimo sa umaabot dinhi ug maghunahuna sa tanang posible nga mahitabo sa imong mahangtoron nga umaabot sa kinabuhi nga moabot.
Hibaloi ang Imong Mahimayaon nga Umaabot
Ang tanang maayo sa imong umaabot ug ang matag panalangin nga adunay mahangtorong importansya posible tungod sa Manluluwas, si Jesukristo. Labaw sa tanan, Siya ug ang Langitnong Amahan gusto nga ikaw mopili nga mamahimong sama Kanila ug mobalik sa pagpuyo uban Kanila ug makabaton sa matang sa kinabuhi nga Sila nagpuyo.
Kon wala si Jesukristo, kini nga mahimayaon nga oportunidad dili posible. Kon wala Siya, ang kamatayon mao na ang kataposan. Tungod sa Manluluwas ug sa Iyang Pag-ula, ang pagka-imortal—pagpuyo sa kahangtoran—usa ka reyalidad alang sa tanan, ug ang kinabuhing dayon—pagpuyo sa kahangtoran diha sa presensya sa Dios—usa ka posibilidad alang sa tanan kinsa kwalipikado. Ang walay pagkausab nga mga kamatuoran sa napahiuli nga ebanghelyo ni Jesukristo makagiya kanimo ngadto sa tanan nga giandam sa Manluluwas alang kanimo karon ug sa imong umaabot.
Hinumdomi Kon Kinsa Ka
Sa tanan nimong gibuhat karon, ayaw kalimti kon si kinsa ka. Ikaw anak nga lalaki o babaye sa Dios nga adunay walay kinutoban, balaang potensyal. Ang imong espiritu mianhi sa kalibotan diha sa pisikal nga lawas. Manag-uban, ang imong espiritu ug lawas usa ka buhi nga kalag nga makahimo sa pagsinati og pagka-mortal sa mga paagi nga dili unta posible sa laing paagi (tan-awa sa Doktrina ug mga Pakigsaad 88:15). Ang imong buhat mao ang pagtugot sa imong pagkatawo isip anak sa Dios nga moporma sa mga desisyon nga imong himoon karon ug alang sa kahangtoran.
Sabta ang Umaabot sa Imong Kalag
Sa kadugayan ang panahon moabot nga ikaw mamatay. Ang imong lawas ug espiritu magkabulag ug, niana nga kahimtang, “dili makadawat sa usa ka kahingpitan sa himaya” (Doktrina ug mga Pakigsaad 93:34). Apan salamat kang Jesukristo, ikaw mabanhaw. Dili nimo kini mapugngan—ikaw gayod mabanhaw!
Ang imong lawas mahiuli sa hingpit, dili na gayod mahimulag pag-usab gikan sa imong espiritu. Ikaw na dayon mahimong walay kataposan nga kalag. Apan ang imong kalag takos ba sa celestial nga gingharian? Ikaw ang modesisyon pinaagi sa pagpili niining kinabuhia sa pagsunod ni Jesukristo ug pagdawat sa mga gasa nga Iyang gitanyag. Ang mga kasulatan nagtudlo nga kita “maglipay niana diin [kita] mouyon sa pagdawat.” Subo lang, ang uban dili “mouyon sa paglipay niana nga sila unta makadawat” (Doktrina ug mga Pakigsaad 88:32).
Unsa man ang imong gustong dawaton ug tagamtamon? Modawat ka ba sa kalinaw ug kalipay nga gikan sa matinud-anong pagpangita ug pagsunod kang Jesukristo? Magmaya ka ba sa paglaom sa kinabuhing dayon ug “diha kaniya kinsa mao ang naghatag sa gasa”? (Doktrina ug mga Pakigsaad 88:33). Kon ang imong tubag “Oo!” ikaw gusto nga modawat niini nga mga gasa ug sa ubang mga gasa nga andam kaayong gihatag ni Jesukristo diha kanimo ug ngadto sa tanan kinsa modawat niini.
Pangitaa ang Panalangin sa Paghinulsol
Niini nga kinabuhi ikaw usahay matintal ug makasala. Kon mahitabo kini, ang Manluluwas mahigugmaong motanyag kanimo sa abilidad sa pag-usab. Gitawag kini og paghinulsol. Si Satanas gusto nga makita nimo ang paghinulsol isip usa ka butang nga negatibo nga kinahanglang likayan ug kahadlokan nga wala gayoy paagi nga mapasaylo kon makasala. Dili gayod kini tinuod.
Sa kanunay adunay paagi nga mapasaylo. Si Jesukristo mao ang paagi. Dili gayod ikaw layo Kaniya. Siya nagbarog nga bukas ang mga kamot andam ug mauyonon nga moayo, molimpyo, ug mobalaan kanimo. Kon mangayo ka og tabang sa Manluluwas ug maninguha sa paghinulsol, bation nimo kon unsa ka kamahal Niya. Siya mopasaylo kanimo ug mousab sa imong kasingkasing. Salamat kang Jesukristo, ikaw makahimo og maayo ug mamahimong maayo matag adlaw!
Pag-angkon og Kalig-on aron Makalahutay hangtod sa Kataposan
Usahay makasinati ka og kasub-anan ug pag-antos. Niining malisod nga mga panahon, ang Manluluwas makalig-on kanimo sa paglahutay sa kataposan, sama sa Iyang gibuhat.
Si Jesus andam nga midala diha sa Iyang kaugalingon sa tanan nimong sala ug sakit ug milahutay sa tanan nimong kasakit ug pag-antos. Sa tanan niini, Siya wala gayod moundang. Hilabihan ang Iyang pag-antos tungod kay dako ang Iyang paghigugma kanimo! (tan-awa sa 1 Nephi 19:9–10). Siya mihatag sa Iyang kinabuhi, ug human sa tulo ka adlaw, Siya mibuntog sa kamatayon ug nahimong una nga nabanhaw.
Tungod kay ang Manluluwas milahutay hangtod sa kataposan, Siya adunay gahom sa paglig-on kanimo. Siya miingon, “Tan-aw ngari kanako, ug lahutay hangtod sa kataposan, ug ikaw mabuhi; kay ngadto kaniya nga molahutay hangtod sa kataposan Ako mohatag og kinabuhi nga dayon” (3 Nephi 15:9).
Tan-aw ngadto sa Imong Manluluwas
Ako malaomon mahitungod sa imong umaabot. Ikaw adunay daghan nga paaboton sa unahan! Sa imong pagduol ngadto ni Jesukristo diha sa hugot nga pagtuo, makaduol ka sa imong umaabot uban sa pagsalig.
Sa umaabot nga adlaw, ikaw mobarog sa atubangan sa Manluluwas aron hukman. Niana nga higayon, ikaw masanapan sa hilabihang kalipay nga maanaa sa Iyang balaang presensya. Manlimbasog ka sa pagpangita og mga pulong sa pagpasalamat Kaniya alang sa Iyang walay kinutoban, hingpit nga gugma ug maulaong sakripisyo nga nakahimo niini nga posible alang kanimo sa pagpuyo uban Kaniya ug sa imong pamilya sa kahangtoran.
Si Jesukristo mao ang imong Manluluwas. Ako modapit kanimo sa pagtan-aw ngadto Kaniya ug mohimo Kaniya nga sentro sa imong kinabuhi. Siya mohatag kanimo og kahulogan ug paglaom ug mohimo sa imposible nga posible. Uban Kaniya diha sa imong kiliran, makapahingangha nga mga kalamposan ug mga kasinatian nga dili nimo mahunahuna karon mahimong maangkon nimo.
Tungod Kaniya, usa ka katingalahan ug makalipay nga umaabot, dinhi ug gikan karon, anaa sa imong atubangan!