Ako Makahimo sa Tanan nga Butang pinaagi kang Kristo

Ang kabatan-onan nagpaambit kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Iya Kong Gitabangan sa mga Panahon sa Kagul-anan

Wala koy gusto nga moapil sa Young Women camp sa miaging tuig. Tulo ka tuig sayo niana ang akong lolo namatay, ug gusto lang ko nga mag-inusara ug magpalayo sa tanan. Pag-abot namo didto, mibati ko nga maayo pa og wala lang ko miadto.

Bisan pa man, sa unang adlaw, ang among ward adunay debosyonal nga dili nako makalimtan. Usa sa mas magulang nga batan-ong babaye misulti kabahin sa pagkaplag og kalipay. Sa sinugdanan akong giliraw ang akong mga mata. Unsaon nako sa pagkaplag og kalipay kon walay kalipay?

Apan misulti siya og usa ka butang nga wala nako mahunahunai: Kon mobati nga morag wala nato makaplagi ang kalipay bisan asa, makaplagan nato kini diha sa Manluluwas. Usahay ang atong mortal nga mga kinabuhi napuno sa kasubo, depresyon, kasuko, mga pagsulay, ug kanunay nga lisod nga mga hagit. Usahay lisod ang pagkaplag og kalipay gawas lang diha Kaniya.

Bisan og ang akong kasinatian sa girl’s camp dili perpekto, nakaplagan nako ang kalipay. Nakaplagan ko kini pinaagi sa akong pagdangop ngadto sa Manluluwas—diha sa mga kasulatan, sa kinaiyahan, ug diha sa hilom nga mga takna diin makaampo ko ngadto sa Langitnong Amahan. Kini nga baroganan nakapalahutay kanako sukad niadto sa daghang pagsulay. Mapasalamaton kaayo ko sa kahibalo nga ang hingpit nga gugma sa Manluluwas makaabot kanato bisan kon mobati kita nga walay kalipay.

Elise B., Missouri, USA