“Pagpangita og Kwarta para sa usa ka Misyon,” Alang sa Kalig-on sa mga Kabatan-onan, Abr. 2023.
Ako Makahimo sa Tanan nga Butang pinaagi kang Kristo
Ang kabatan-onan nagpaambit kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).
Pagpangita og Kwarta para sa usa ka Misyon
Sa sinugdanan, dili ko ganahan nga magmisyon. Naghunahuna ko nga adunay daghan pang mga butang nga akong mahimo niining panahona, sama sa pag-eskwela sa kolehiyo o pagtrabaho og maayo aron makapalit og sakyanan. Apan nakadungog ko og pakigpulong gikan sa atong propeta, si Presidente Russell M. Nelson, diin naghisgot siya bahin sa hugot nga pagtuo ug naghisgot og misyonaryo nga pagserbisyo. Naghunahuna ko kon sa unsang paagi nga nakabaton ko og kahibalo sa ebanghelyo tungod lang kay duha ka misyonaryo ang mihukom nga moserbisyo. Busa nakigsulti ko sa akong bishop mahitungod sa pagmisyon.
Ako nakaamgo nga kinahanglan ko nga motrabaho para sa akong misyon, apan ang pagpangita og trabaho atol sa pandemya malisod. Usa ka adlaw naugtas ko bahin sa pagpangita og kwarta. Nakahukom ko nga mag-ampo sa Dios. Samtang namalandong ko, misantop sa akong hunahuna ang mga pulong nga “Pamaligya og tubig nga gisulod sa botelya”. Ang impresyon kusog kaayo! Sa Brazil, ang mga tawo sagad namaligya og mga pagkaon o ilimnon sa mga stoplight. Daghan dayon kog pangutana bahin sa pagpamaligya og tubig, pero nadasig ko unsaon pagbuhat niini. Nag-research ko ug nakahukom nga mamaligya og tubig sa mas propesyonal nga paagi.
Lisod ang pagbaligya og tubig, tungod kay init kaayo. Sa unang adlaw nga nagsugod kami sa pagtrabaho, grabe ang 100 degrees Fahrenheit (38 degrees Celsius) ug hilabihan ka alimuot, ug dili kami makapabilin og dugay diha sa payong tungod kay among gibutang ang mga cooler ilalom niini. Nianang adlawa, kami nagtrabaho sulod sa lima ka oras nga walay hunong ilalom sa nagdilaab nga kainit sa adlaw. Sa tanan niadtong mga orasa nagpadayon ko sa paghunahuna, “Alang kini sa akong tumong. Moadto ko og misyon!” Sa sulod sa akong kasingkasing nasayod ako nga ang Ginoo nag-uban kanako ug panalipdan ako ug tabangan ako.
Ako lamang ang miyembro sa Simbahan sa akong pamilya, mao nga ang nakapadasig nako mao ang akong hugot nga pagtuo diha kang Jesukristo. Nasayod ko nga bisan ako nag-inusara sa pipila ka paagi, Siya anaa para kanako. Ug kon buhaton nato ang Iyang gisugo, mosalig Kaniya, Siya motabang nato nga makaadto kon asa kita kinahanglang moadto.
Bisan tuod kita adunay daghang unos sa kinabuhi, ako nasayod nga ako makapili sa paglig-on sa akong pagtuo diha sa mga kalisdanan. Si Jesukristo adunay gahom sa pagtabang kanako nga maduol ngadto Kaniya ug makasaksi sa mga milagro nga dili unta nako masaksihan kon wala ang kalisdanan. Kon ako mosunod Kaniya ug maghinulsol sa akong mga sayop, ang tanan nakong mga sakripisyo alang sa usa ka dakong katuyoan, ug kana makahatag kanako og kalinaw.
Ítalo O., Brazil