“Ang Paglaom ni Jonalin alang sa Templo,” Alang sa Kalig-on sa mga Kabatan-onan, Abr. 2023.
Ang Paglaom ni Jonalin alang sa Templo
Si Jonalin wala maghinam-hinam sama sa uban mahitungod sa usa ka templo nga moabot sa American Samoa—hangtod gihangyo siya nga mamulong sa seremonya sa pagsugod sa pagtukod sa templo.
Mga litrato pinaagi ni Sam Solaita
Usa ka adlaw, nakadawat si Jonalin Y. og wala damhang tawag sa telepono.
Ang seremonya sa pagsugod sa pagtukod sa templo sa Pago Pago American Samoa Temple hapit na, ug ang mga lider sa area mihangyo sa 16 anyos nga si Jonalin sa pagpaambit sa iyang pagpamatuod bahin sa templo atol sa seremonya sa pagsugod sa pagtukod sa templo. Adunay usa lang ka problema. Si Jonalin wala pa gayod sukad makasulod sa usa ka templo. Kanunay siyang gustong moadto aron ma-seal sa iyang pamilya, apan wala siya masayod kon mahitabo ba kana sa dili madugay.
“Sa dihang gipahibalo nila nga ang templo tukoron dinhi, wala ko maghinam-hinam o madasig sama sa uban,” miingon si Jonalin. “Naghunahuna ko nga walay punto nga maghinam-hinam, tungod kay ang akong papa dili miyembro ug dili makauban namo sa templo. Ang templo dili makausab sa kamatuoran nga ang akong pamilya wala ma-seal.”
Ang pamilya sa inahan ni Jonalin sakop sa Ang Simbahan ni Jesukristo sa mga Santos sa Ulahing mga Adlaw sulod sa daghang henerasyon. Ang iyang inahan mitudlo kaniya ug sa iyang upat ka igsoon sa ebanghelyo ni Jesukristo, ug sila nabunyagan sa dihang sila nag-otso anyos. Apan gipili sa iyang amahan nga dili mahimong miyembro.
Sa mahinumdoman ni Jonalin, ang iyang pamilya naningkamot sa pagtabang sa iyang papa nga makabig ngadto sa ebanghelyo ni Jesukristo. Siya ug ang iyang inahan, tulo ka igsoon nga babaye, ug igsoon nga lalaki nagdapit kaniya sa simbahan, ug siya sa kasagaran moadto kon siya walay trabaho. Aduna usab silay home evening ug gidapit siya sa mga kalihokan sa Simbahan. Dili maihap nga mga misyonaryo ang mibisita sa ilang panimalay, apan ang amahan ni Jonalin wala makahukom sa pagpadayon sa ebanghelyo.
Tungod niini, si Jonalin naglibog bahin sa gihangyo nga mamulong mahitungod sa templo. Ingon og ang tanan niyang mga higala mas naghinam-hinam mahitungod sa templo kay kaniya ug dili na makahulat nga moadto didto uban sa ilang tibuok pamilya. “Nahinumdom lang ko nga naghunahuna, ‘Ako ang babaye nga adunay dili miyembro nga amahan. Nganong ako?” Miingon si Jonalyn.
Usa ka Kausaban sa Kasingkasing
Sa wala madugay ang pagbati ni Jonalin mahitungod sa templo nagsugod sa pagkausab. “Ang nakapausab sa akong kasingkasing mao ang pagkapili nga mopakigbahin sa akong pagpamatuod,” siya miingon. “Ingon og kini ang paagi sa Dios sa pagtabang kanako nga makahibalo nga ang templo usa ka panalangin. Nasayod ko nga mao kadto ang Iyang paagi sa paghupay sa akong nagduhaduha nga kasingkasing.”
“Nakadungog ko nga nindot ang templo, kini malinawon,” miingon siya. “Gusto gyod nako nga mabati kana sa akong kaugalingon. Ang pag-andam sa pagpakigbahin sa akong pagpamatuod nakahatag kanako og oportunidad sa paghunahuna kon unsa ka talagsaon nga matukod ang templo nga duol kaayo sa panimalay. Ug naghatag kini kanako og paglaom nga usa ka adlaw, sumala sa panahon sa Dios, ang akong pamilya ma-seal didto sa templo.”
Gibuhat ni Jonalin ang iyang labing maayo nga mosalig sa panahon sa Dios imbes sa iyang kaugalingon. “Ang Dios nagabuhat sa misteryosong mga paagi,” siya miingon. “Siya nakahibalo sa husto nga panahon sa pagtukod og templo sa American Samoa, usa ka panahon nga ang tanan nawad-an sa paglaom tungod sa pandemya, usa ka panahon diin ang templo gikinahanglan sa kadaghanan, ug usa ka panahon nga siya nakahibalo sa akong pangandoy sa akong pamilya nga ma-seal. Ang iyang panahon mao ang perpekto nga panahon. ”
Ang Hingpit nga Kalipay diha sa Ebanghelyo
Usa ka rason nga gusto ni Jonalin nga mabunyagan ang iyang papa mao nga ang ebanghelyo nahimong usa ka panalangin sa iyang kaugalingong kinabuhi. “Ganahan ko nga mogamit sa mga pagtulon-an sa ebanghelyo didto sa eskwelahan, ug nakatabang gyod kini,” miingon si Jonalin. “Mapasalamaton kaayo ko nga nahimong miyembro ug naghinam-hinam nga mahimong kabahin niining mahinungdanon ug talagsaon nga buhat.”
Naningkamot usab si Jonalin sa pagpaambit sa kalipay sa ebanghelyo ngadto sa iyang mga higala, nga kadaghanan kanila mga miyembro sa Simbahan. “Sa matag higayon nga ako mabalaka bahin sa usa ka butang, ako momata og sayo sa buntag ug motan-aw sa langit. Kini makapaayo kaayo, ”ingon niya. “Usahay samtang buhaton nako kini, bation nako nga kinahanglan kong mosulat, sama sa mga leksiyon nga akong nakat-onan gikan sa simbahan. Dayon ipadala nako kanang mubo nga mga sulat ngadto sa akong mga higala sa usa ka group chat. Aduna koy usa ka higala nga dili miyembro, ug makita siya nga motubag sa kinasingkasing—kini nindot kaayo, ug ganahan kaayo ko niini.”
Paglaom sa Umaabot
Samtang gipaambit ni Jonalin ang iyang hugot nga pagtuo sa iyang mga higala, malaomon gihapon siya nga usa ka adlaw ang iyang papa makabig ngadto sa ebanghelyo ni Jesukristo. “Ang Dios nakakita sa akong kasingkasing ug nakahibalo kon unsa ka dako ang akong gusto nga mabunyagan ang akong papa,” siya miingon. Apan nasabtan usab niya nga ang iyang papa adunay kabubut-on sa pagpili. “Adunay mga higayon nga nangutana ko sa Dios kon nganong dugay kaayo modawat ang akong papa. Apan ang tubag sa Langitnong Amahan mao ra gihapon: pagpailob. Busa, magpailob ko.”
“Ako nag-ampo nga usa ka adlaw ang akong pamilya ma-seal alang sa kahangtoran,” miingon si Jonalin. “Ako nasayod nga ang ebanghelyo tinuod. Kini nakapanalangin sa akong pamilya sa daghang mga paagi. Ako mopamatuod nga ang Dios maminaw sa atong mga pag-ampo. Napanalanginan ako nga mahimong kabahin sa Iyang buhat ug magpadayon sa pagpakabuhi sumala sa Iyang kabubut-on.”