I Nidim Ol Man blong Putum Pis
Samfala Pat
Olsem ol disaepol blong Jisas Kraes, yumi mas stap ol eksampol long hao blong toktok wetem ol narawan—speseli taem yumi no agri wetem wan samting. Wan long ol isi wei blong luksave wan tru man blong folem Jisas Kraes, hem i olsem wanem man ia mekem gud wan nara man wetem lav mo sore. …
… Ol tru disaepol blong Hem oli bildim, leftemap, leftemap tingting, pulum intres, mo givim insperesen—nomata se situesen i had olsem wanem. Ol tru disaepol blong Jisas Kraes oli man blong mekem pis. …
Atonmen blong Sevya i mekem se yumi save winim evri ivel—we i tekem tu fasin blong raorao. …
Ol dia brata mo sista blong mi. !Hao yumi tritim yumi wanwan i impoten tumas! Hao yumi toktok long mo abaot ol nara man long hom, jos, wok, mo onlaen i impoten tumas. Tedei, mi stap askem yumi blong gat kontak wetem ol nara man long wan wei we i moa hae mo moa tabu. …
Jareti i meresin blong fasin blong raorao. Jareti i presen ia long saed blong spirit we i helpem yumi blong sakemaot man blong wol, we i selfis, protektem hemwan, fulap long hae tingting, mo jalus. Jareti hem i top fasin ia nao blong wan tru man blong folem Jisas Kraes. Jareti i soem man blong putum pis. …
… Mi invaetem yu blong tingbaot Jisas Kraes. Prea blong gat strong tingting mo waes blong talem o mekem wanem we bae Hem i mekem. Taem yumi folem Prins blong Pis, bae yumi kam ol man blong Hem blong putum pis. …
… Tedei mi invaetem yu blong fiksim fasin blong yu blong stap olsem wan disaepol speseli long wei ia blong stap tritim ol nara man. Mi blesem yu blong stretem ol fasin we i nidim blong yu save bildim respek, mo ripresentem wan tru man blong folem Jisas Kraes.