Stap Gat Akses long Paoa blong God tru long Ol Kavenan
Samfala Pat
Bifo oli krietem wol ia, God i putum ol kavenan olsem tul ia we yumi, ol pikinini blong Hem i save joenem yumiwan i go long Hem. …
… Yumi mekem wan kavenan nomo taem, yumi wantem blong givim yumi fulwan long wan tru fasin blong kipim kavenan ia. Yumi kam ol kavenan pikinini blong God mo kam olgeta ia we oli gat raet long kingdom blong Hem, speseli taem yumi traehad blong mekem ol kavenan i kam stamba tingting long laef blong yumi.
Toktok ia kavenan rod i stap tokbaot ol kavenan we yumi kam long Kraes mo joen wetem Hem. Tru long kavenan rilesensip ia, yumi gat akses long paoa blong Hem we i no save finis. Rod ia i stat wetem fet long Jisas Kraes mo fasin blong sakem sin, mo afta baptaes mo kasem Tabu Spirit. …
Kavenan rod i lidim yumi i go long ol odinens blong tempol, olsem tempol endaomen. Endaomen hem i presen blong God blong ol tabu kavenan we i joenem yumi moa fulwan i go long Hem. …
Blong stap holemtaet ol kavenan we yumi mekem long taem blong baptaes mo insaed long ol tempol, i givim yumi tu, paoa blong stanap agensem ol tes mo harem nogud blong hat long wol ia. …
Taem yu wokbaot long kavenan rod, stat long baptaes go kasem tempol mo truaot long laef, mi promesem yu paoa ia blong go agensem ol nomol taed blong wol ia—paoa blong lan, blong sakem sin mo kam klin, mo paoa blong faenem hop, kamfot, mo iven glad taem yu go tru long ol jalenj blong laef. Mi promesem yu mo famli blong yu se bae yufala i gat proteksen agensem ol paoa blong enemi, speseli taem yu mekem tempol i wan stamba lukluk long laef blong yufala.