Ol Tijing blong Jisas Kraes
Samfala Pat
Olsem we profet Nifae i bin tijim long yumi, yumi mas “kakae gud long ol toktok blong Kraes; from luk, ol toktok blong Kraes bae i talem long yumi evri samting we yumi mas mekem.”1 … Mesej blong mi tedei i abaot sam toktok blong Sevya we mi jusumaot—wanem Hem i bin talem.
“[Komanmen we i moa bigwan long loa hem i:] yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa,
“Mo narawan we i kolosap i sem mak long hem, i talem se, Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”
“Tufala loa ia i stamba blong Loa we God i givim long Moses, wetem ol tok blong ol profet tu.”2 …
“I tru, i tru, mi talem long yufala, yufala i mas lukaot gud mo prea oltaem, nogud se devel i temtem yufala, mo hem i lidim yufala i gowe olsem prisena.”3…
“From hemia, eni samting we bae yufala i mekem, bae yufala i mekem samting ia long nem blong mi; from hemia, bae yufala i singaotem jos ia long nem blong mi.”4 …
“Nao hemia i komanmen: Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam tabu taem we yufala i kasem Tabu Spirit, blong yufala i save stanap mo yufala i no gat mak long fored blong mi long las dei.”5 …
Yumi biliv long Kraes. Mi klosem toktok blong mi wetem wanem Hem i talem abaot olsem wanem yumi mas save mo folem ol tijing blong Hem:
“Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.”6