Stap Faenem Pis blong Yuwan
Samfala Pat
Tedei bae mi tokbaot wanem mi bin lanem abaot merikel blong stap faenem pis blong yuwan, nomata long wanem situesen blong yu. …
Mi bin lanem faef trutok aot long tijing blong Sevya.
Faswan, presen blong pis oli givim afta we yumi gat fet blong obei long ol komanmen blong Hem. …
Nambatu, Tabu Spirit bae i kam mo stap wetem yumi. …
Nambatri, Sevya i promesem yumi se taem yumi holemtaet ol kavenan blong yumi, yumi save filim lav blong Papa mo Pikinini blong wanwan long yumi mo yumi. …
Nambafo, stap obei long ol komanmen blong Lod i nidim moa long fasin blong obei. Yumi mas lavem God wetem evri hat, strong paoa, maen, mo sol blong yumi. …
Nambafaef, hem i klia se Lod i lavem yumi inaf blong pem praes blong ol sin blong yumi mekem se—tru long fet blong yumi long Hem mo fasin blong sakem sin, tru long paoa blong Atonmen blong Hem—gat presen blong pis we “i bitim save blong yumi,” [Filipae 4:7], long laef ia mo wetem Hem blong taem we i no save finis. …
Ol memba blong Jos raon long wol oli bin filim presen blong pis we Lod i givim. Hem i stap leftemap tingting blong evriwan blong helpem ol narawan blong gat ol janis blong kam long Hem mo kwalifae from semmak pis ia blong olgetawan. Mo olgeta bae oli jusum blong lukaotem insperesen blong save olsem wanem oli save pasem presen ia i go long ol narawan.
Jeneresen ia we i stap kam antap, bae oli kam ol man ia blong lukaot long jeneresen we bae i kam biaen. Ol efot blong olgeta bae i mekem wan merikel. Bae i go olbaot mo gro taem i stap go, mo kingdom blong Lod long wol bae i redi mo welkamem Hem wetem ol singaot blong hosana. Pis bae i stap long wol.