“Ang Makapausab sa Kinabuhi nga Gahom sa Paghinumdom Kaniya,” Alang sa Kalig-on sa mga Kabatan-onan, Hunyo 2023.
Dali, Sunod Kanako
Mateo 26:26–29; Marcos 14:22–25
Ang Makapausab sa Kinabuhi nga Gahom sa Paghinumdom Paghinumdom Kaniya
Pinaagi sa sakramento ug sa Espiritu Santo, kita mohinumdom ni Jesukristo ug makakaplag og kalig-on, kalinaw, ug hingpit nga kalipay.
Sa dihang gipundok ni Jesukristo ang Iyang Apostoles diha sa usa ka kwarto sa itaas didto sa Jerusalem alang sa Kasaulogan sa Pagsaylo, ang Iyang kataposan nga pagkaon uban kanila diha sa mortalidad, Siya nasayod nga, “miabot na ang panahon” (Juan 13:1). Siya sa dili madugay mohalad na sa Iyang walay kinutoban ug mahangturon nga maulaon nga sakripisyo.
Ang Apostoles nakig-uban og panglakaw ug pakig-istorya ni Jesus. Nadunggan nila ang Iyang mga pagtulon-an ug nakakita sa Iyang mga milagro. Karon Siya kinahanglan nga mobiya? Mag-unsa nalang sila kon wala Siya?
Ang Kataposang Panihapon [The Last Supper], ni Simon Dewey
Gipaambit ni Jesus uban kanila kon unsaon nila sa paghinumdom Kaniya kon Siya dili na mag-uban kanila. Siya mipaila sa sakramento ug misaad sa pagpadala sa Espiritu Santo.
Isip mga disipulo sa Ginoo sa ulahing mga adlaw, kita gisugo sa paghinumdom Kaniya sa kanunay. Samtang ako mopakigbahin kon sa unsa nga paagi ang sakramento ug ang Espiritu Santo makatabang kanato sa paghinumdom ug pagsunod ni Jesukristo, ako modapit kaninyo sa pagkonsiderar og mga paagi nga kamo mas maayong makahinumdom Kaniya sa matag adlaw.
Mga Panalangin sa Sakramento
Atol sa Kataposan nga Panihapon, si Jesus mipanalangin sa pan ug mihatag niini ngadto sa Iyang Apostoles, nag-ingon, “Dawata ninyo kini ug kan-a. Kini mao ang akong lawas.” Ug “gikuha Niya ang kopa, ug sa nagpasalamat sa Dios ug gihatag kanila. Inom kamong tanan niini, kini mao ang akong dugo” (Mateo 26:26–28).
Miingon Siya kanila, “Buhata ninyo kini aron paghandom kanako” (Lucas 22:19).
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita gisugo sa pag-ambit sa sakramento sa matag semana (tan-awa sa Doktrina ug mga Pakigsaad 59: 9, 12). Kining balaan nga ordinansa sa pagkapari mao ang usa ka gibalik balik nga imbitasyon sa bug-os nga paghinulsol, sa pagbag-o sa espirituhanong paagi, ug sa paghinumdom ni Jesukristo.
Ang mga buhat sa pagkaon sa pan ug pag-inom sa tubig dili magpasaylo sa mga sala. Apan kon kita mainampoon ug sinsero nga mangandam ug takos nga moapil sa ordinansa, kita mosusi sa atong mga lihok ug mga tinguha sa atong kasingkasing ug hangpon ang imbitasyon sa Ginoo sa paghinulsol (tan-awa sa Moises 6:57). Kon kita mohalad sa mga sakripisyo nga Iyang gikinahanglan—usa ka masulob-on nga kasingkasing ug mahinulsolon nga espiritu (tan-awa sa 3 Nephi 9:20)—kita gisaaran nga kita mahimong kanunayng makabaton sa Iyang Espiritu nga magauban kanato. Ug pinaagi sa makapabalaan nga gahom sa Espiritu Santo isip atong makanunayon nga kauban, kita kanunayng makabaton og kapasayloan sa atong mga sala (tan-awa sa Moroni 6:4).
Human og ambit sa sakramento atol sa usa ka miting sa pagkapangulo, si Presidente Russell M. Nelson miingon: “Mihimo ako og pakigsaad dihang miambit ako sa sakramento nga ako andam nga modala ngari kanako sa ngalan ni Jesukristo ug nga ako andam nga mosunod sa Iyang mga sugo. Sa kasagaran, makadungog ko nga kita moambit sa sakramento aron sa pagbag-o sa mga pakigsaad nga gihimo atol sa bunyag. Samtang tinuod kana, mas labaw kini kay niana. Mihimo ako og bag-ong pakigsaad. Mihimo kamo og bag-ong mga pakigsaad. … Karon agi og balos niini [ang Ginoo] mihimo sa pamahayag nga kita sa kanunay makabaton sa Iyang Espiritu uban kanato. Pagkadakong panalangin!”1
Atol sa sakramento, kita mohinumdom ni Jesuskristo ug kon sa unsa nga paagi “Siya namatay ug nag-antos”2 alang kanato. Ang mahunahunaon nga pagpangandam ug sinsero nga pag-ambit sa sakramento magdala og espirituhanong pagbag-o, langitnong gahom, ug sa gisaad nga mga panalangin sa Ginoo.
Dapita ang Espiritu Santo
Si Jesus misaad sa Iyang Apostoles nga ang Amahan mopadala kanila sa Tighupay, o ang Espiritu Santo, sa pagpanalangin kanila human Siya mibiya kanila (tan-awa sa Juan 14:26).
Ang tahas sa Espiritu Santo mao ang paggiya (tan-awa sa Juan 16:13), pagdirekta (tan-awa sa 2 Nephi 32:5), paghupay (tan-awa sa Juan 14:26), pagpanalipod (tan-awa sa Mosiah 2:36), ug pagbalaan (tan-awa sa 3 Nephi 27:20) kanato. Siya makahimo ug pinaagi lang kanato kon kita sinsero nga magtinguha sa Iyang makanunayon nga pakig-uban ug sa tukma nga paagi moandam ug modapit Kaniya diha sa atong mga kinabuhi.
Sa pagdapit sa Espiritu Santo, tun-i, pamalandongi, ug magbusog sa mga pulong ni Kristo diha sa kasulatan (tan-awa sa 2 Nephi 31:20). Padayon sa pag-ampo. Matinud-anong mag-ampo molihok sumala sa pag-aghat. Magtinguha og limpyo nga hunahuna, mga buhat, ug pinulongan. Mosimba diha sa panimalay, diha sa templo, ug sa simbahan.
Samtang inyong ilakip kining matarong nga mga binuhatan ngadto sa inyong kinabuhi, ang saad sa Ginoo mao nga kamo “mahimong sa kanunay makabaton sa iyang Espiritu uban [kaninyo]” (Doktrina ug mga Pakigsaad 20: 77).
Alma Bangon, ni Walter Rane
Usa ka Gamhanan nga Kausaban
Sa dihang ang usa ka anghel sa Ginoo mitawag ni Alma ug miaghat kaniya sa paghinulsol, si Alma nalup-og ngadto sa yuta ug dili makasulti o makalihok sulod sa pipila ka adlaw.
Niining higayona, siya gisakit sa panumdoman sa iyang mga sala, apan dayon siya nahinumdom nga nakabati sa iyang amahan nga nanagna “mahitungod sa pag-anhi sa usa ka Jesukristo, usa ka Anak sa Dios, aron sa pag-ula sa iyang dugo alang sa mga sala sa kalibotan.” Siya sa kadugayan mirekord, “Samtang ang akong hunahuna naghinuktok niini nga panumdoman, ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako. … Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit” (Alma 36:17–19).
Dili ang pagpakita sa anghel ang nakapausab ni Alma. Ang paghinumdom ni Jesukristo ug sa Iyang maulaon nga sakripisyo ang naggiya kaniya sa paghinulsol ug pag-ampo alang sa kapasayloan ug kalooy, aron mabati ang hilabihan nga kalipay, ug mahimong usa ka mahalaron nga disipulo.
Kon kamo mohinumdom ni Jesukristo ug matinguhaon nga mangita ug mosunod Kaniya, Siya mamahimong labaw pa gayod sa sentro nga karakter diha sa mga istorya sa kasulatan. Ang Iyang pagkabalaan ug pagpakabuhi sa reyalidad makaapekto sa inyong inadlaw-adlaw nga mga desisyon, mopanalangin kaninyo, ug makapadasig kaninyo sa pagkahimong mas sama Kaniya. Kining gamhanang kausaban magsugod kon kamo mohinumdom ni Jesukristo!
Ang Akong Paglaom alang Kaninyo
Ako mopamatuod nga ang Ginoo nga si Jesukristo mopanalangin kaninyo kon kamo mohinumdom Kaniya, dawata sa kanunay ang Iyang ngalan diha kaninyo, ug tumana ang Iyang mga sugo (tan-awa sa Doktrina ug mga Pakigsaad 20:77, 79). Siya miingon, “Ug kon kamo sa kanunay mohinumdom kanako, kamo makaangkon sa akong Espiritu uban kaninyo” (3 Nephi 18:7).
Ako manghinaot nga sa sunod nga higayon nga kamo moambit sa pan ug tubig atol sa sakramento, kamo moingon diha sa inyong kasingkasing: “Ako dili gayod mahikalimot Kaniya o sa Iyang sakripisyo alang kanako. “Ako mohigugma ug mosunod kaniya.” Nanghinaot ko nga kamo modala sa iyang kasulbaran diha kaninyo sa tibuok ninyong kinabuhi.
Hinaot nga kamo mopadayon sa unahan nga adunay kalig-on, kalinaw, ug hingpit nga kalipay nga moabot gikan sa paghinumdom ug sa pagsunod ni Jesukristo sa kanunay.