“Ang Inyong Tanaman sa mga Posibilidad,” Alang sa Kalig-on sa mga Kabatan-onan, Hulyo 2023.
Ang Inyong Tanaman sa mga Posibilidad
Kon unsa inyong gitanom mao usab kamo.
Mga paghulagway pinaagi ni Katie Dockrill
Mga sambingay sa kasulatan ug ang pagpatubo sa mga tanom magdungan sama sa tsokolate ug peanut butter. (O jam ug toast, kon gusto nimo. O tingali hangin ug mga tabanog, o mga baybayon ug mga kastilyong balas?)
Kamo adunay sambingay sa magpupugas (tan-awa sa Lucas 8), ang pasumbingay sa maayo ug sa ihalas nga mga kahoy nga oliba (tan-awa sa Jacob 5), ug ang analohiya sa hugot nga pagtuo nga nagtubo sama sa usa ka turok nga liso (tan-awa sa Alma 32). Anaa ang sambingay sa liso sa mustasa (tan-awa sa Mateo 13), ang liso nagtubo sa hilom (tan-awa sa Marcos 4), ug ang mga mamumuo sa ubasan (tan-awa sa Mateo 20). Dunay daghan niini.
Siyempre, kanunayng adunay luna alang sa usa pa ka sambingay sa tanom, dili ba? Atong itandi ang nagtubo nga tanaman ngadto sa nagtubo nga tulo ka importanting estratehiya kon unsaon ninyo paggamit ang media.
Estratehiya 1: Tuyoon ang Pagpili
Diha sa tinuod nga tanaman, bisan kon gusto ninyo nga magpatubo og kamatis lang, adunay daghang klase nga labaw pa sa inyong mahunahunaan nga posible nga gitinguha nga patuboon sa inyong kinabuhi. Ug, siyempre, makapatubo kamo og bisan unsang liboan pa ka utanon, mga berry, mga kahoy nga mamunga, o mga bulak. Ang mga posibilidad walay kahumanan.
Apan bisan pa niana nga gidaghanon sa mga opsiyon layo ra sa gidaghanon sa mga pagpili nga inyong giatubang diha sa media. Dugay nang milabay ang panahon nga gisulti sa inyong mga apohan kabahin sa panahon nga lisoon pa ang dial sa telebisyon o sa radyo aron pangitaon ang limitado nga numero nga anaa sa mga channel. Karon kamo hapit adunay walay kinutoban nga mga opsiyon diha sa telebisyon, mga podcast, social media, pagstream sa internet, ug daghan pa—usa ka hingpit nga kapistahan sa mga posibilidad.
Si Presidente Dallin H. Oaks, Unang Magtatambag sa Unang Kapangulohan, mitudlo: “Maayo ang motan-aw og maanindot nga kalingawan o makabaton og makapaikag nga impormasyon. Apan dili tanan niana nga matang takos sa porsiyon sa atong kinabuhi nga ihatag aron maangkon kini. Ang ubang mga butang mas maayo, ug ang uban labing maayo.”1
Sama lang gayod sa pagpili kon unsa ang itanom diha sa yuta, ang inyong mga estratehiya sa media pagasugdan sa paghimo og tinuyo nga pagpili kabahin kon asa igahin ang inyong panahon. Ayaw itugot nga ang mga oras aksidenting molabay lang pinaagi sa bisan unsa lang diha sa media. Ang inyong oras bililhon! Gamita kini sa labing maayong mga opsiyon.
Estratehiya 2: Pangitaa ang Unsay Gusto Ninyong Palamboon
Lisod hunahunaon nga adunay tawo nga mopili sa pagpakabana alang sa usa ka tipik sa makahilo nga oak o stinging nettle. Ang kalibotan puno sa mga sagbot nga makadaot kanato, ingon man adunay daghang matang sa makadaot nga media. Ang pornograpiya usa niadtong mga sagbot, apan kini dili mao lang usa.
Aron malikayan ang mga sagbot diha sa usa ka tanaman, duha ka kinatibuk-an nga pamaagi ang makatabang. Ang una mao ang unsa ang kalagmitan nga atong hunahunaon sa kasagaran: ibta ang mga sagbot gikan sa yuta. Sa pornograpiya o uban nga negatibong media, ang kapareho mao ang pagbutang og mga panalipod aron mahunong ang inyong pagkakita o paggamit niana nga media.
Apan adunay ikaduha, menos nga gihisgotan nga solusyon nga makahimo ug kinahanglan gamiton dungan sa pag-ibot sa mga sagbot: buboan ug amumahon ang maayo nga mga tanom. Diha sa usa ka tanaman, kon kamo mogahin og kusog ngadto sa maayong mga tanom nga gusto ninyong patuboon, kini molabong ug mawala na ang dapit alang sa wala kinahanglana nga mga tanom paglabay sa panahon. Ang nagsurangsurang nga mga sagbot magsugod sa pakigbisog alang sa tubig ug kahayag sa adlaw samtang sila gibuntog sa mga maayong tanom nga imong giamuma.
Tinuod usab kini sa dili maayo nga mga nabatasan ngadto sa media. Kon imong susihon ang imong mga pagpili sa media, pangitaa ang maayong mga opsiyon sa media—makapabayaw nga musika, dekalidad nga mga podcast, makapadasig nga mga video—nga makatabang sa pagtangtang sa mga dili maayo.
Kon nagkinahanglan kamo og bisan unsa nga mga sugyot kon unsaon pagpili niadtong maayong mga opsiyon sa media, si Presidente Oaks nagpahinumdom kanato nga “gikinahanglan ang pagpalabay sa ubang maayo nga butang aron makapili sa uban nga mas maayo pa o labing maayo tungod kay nagpalambo kini og pagtuo kang Ginoong Jesukristo ug naglig-on sa atong mga pamilya.”2
Estratehiya 3: Itisok og Lawom ang mga Gamot sa dili pa Moabot ang Kainit
Sa ubang panahon sa kinabuhi morag naglawig nga walay dakong paningkamot sa inyong bahin. Atol sa maong panahon mahimo ninyong bation nga ang tanan nagpadayon sa inyong gusto, nga wala’y dagkong mga panglimbasog o mga problema. Alang sa mga tanom, ang panahon nga sama niini mao ang tingpamulak.
Ang mga tanom maggamit niining maayong mga panahon sa maalamon nga paagi. Imbes nga maghinay-hinay, itisok nila og lawom ang mga gamot ngadto sa yuta aron kini mapanalipdan inig-abot sa naglagiting nga kainit sa adlaw.
Gamit ang inyong kaugalingon nga mga estratehiya sa media, hunahunaa ang parehas nga pamaagi. Puntinga ang pagpalambo og maayong mga batasan sa media (ilabi na sa espirituhanon nga makapabayaw nga mga batasan sa media sama sa pagtuon sa kasulatan) sa dili pa moabot ang mga panahon sa kaugtas o pagsulay. Unya, kon moabot na kana nga mga panahon, ang inyong maayong pamatasan makatabang kaninyo nga molahutay.
Si Presidente Henry B. Eyring, Ikaduhang Magtatambag sa Unang Kapangulohan, mipahayag niining paagiha: “Ang atong gikinahanglan sa atong adlaw sa pagsulay usa ka espirituhanong pagpangandam.”3 Usa ka bahin sa ingon nga espirituhanong pagpangandam mao ang pagpauswag sa inyong mga batasan sa media aron kamo adunay Espiritu uban kaninyo nga magamit kon ang mga panahon magkalisod.
Ang pagdugang niining pipila ka mga estratehiya sa inyong mga pagpili sa media mahimong magkinahanglan og gamay nga dugang pa nga paningkamot, ilabi na sa sinugdanan, apan ang inyong ani mahimong takos niini!