“Unsaon nako nga makakaplag og mga higala nga motabang usab nako sa pagsunod sa ebanghelyo?,” Alang sa Kalig-on sa mga Kabatan-onan, Hunyo 2023.
Mga Pangutana ug Mga Tubag
“Unsaon nako nga makakaplag og mga higala nga motabang usab nako nga mosunod sa ebanghelyo?”
Pag-ampo ug Pangita
“Una, pag-ampo. Ang pagpangayo og tabang sa Langitnong Amahan mao ang kanunayng unang maayong lakang. Sunod, ibutang ang inyong kaugalingon sa mga dapit diin ang maayong mga tawo mogahin sa ilang panahon. Kon kamo anaa sa makapadasig nga mga dapit, kamo makahimamat og maayong mga tawo. Sa katapusan, pagmahimong andam ka sa pakigtrabaho sa lainlaing matang sa mga tawo. Kamo dili gayod masayod kon si kinsa ang giandam sa Langitnong Amahan nga inyong mahimamat.”
Tate N., 14, South Carolina, USA
Ipaambit ang Gugma sa Dios
“Makasugod kamo pinaagi sa pagtratar sa uban sa paagi nga inyong gusto nga kamo trataron. Tabangi sila nga mosunod sa ebanghelyo ug mobati sa gugma sa Manluluwas. Ang inyong impluwensya makatabang kanila nga mobuhat sa ingon alang kaninyo.”
Sadie M., 13, Utah, USA
Ang Puthaw Mahait pinaagi sa Puthaw
“Kanunay nga magsunod sa inyong mga sumbanan, ug ang husto nga mga tawo mapaduol nganha ninyo. Kon ang inyong mga higala wala magsunod sa sama sa inyong sumbanan, hinumdomi nga kamo mahimong usa ka ehemplo nga sama ni Kristo ngadto kanila. ‘Ang tawo makakat-on gikan sa laing tawo, sama nga ang puthaw mahait pinaagi sa puthaw’ (Mga Panultihon 27:17).”
Clark H., 16, Utah, USA
Pagdapit ug Pagbaton og Kaisog
“Ang pagdapit sa mga tawo aron makadula ug makakaon nakatabang nako nga makahimo og bag-ong mga higala. Makig-istorya usab ko sa mga tawo atol sa panagsayaw diha sa Simbahan. Ako medyo maulawon, busa kasagaran makig-uban ra ko sa akong grupo, apan nalipay ko nga midesisyon nga magbaton og kaisog nga makighimamat sa bag-ong mga tawo, bisan kon kini salikwaot usahay.”
Hannah P., 14, Hawaii, USA
Himoa ang Una nga Lakang
“Himoa ang una nga lakang ug mosulti og ‘kumusta’ ngadto sa usa ka tawo. Mahimo nimong dapiton sila sa inyong balay. Usahay ako mag-ampo, ug kini makatabang nako nga mas masaligon sa kaugalingon enkaso sila dili mosanong.”
Anaya P., 12, Hawaii, USA
Pangitaa ang Kalipay
“Kita kinahanglan mangita sa mga sumbanan sa Simbahan. Mamahimong mga higala niadtong kinsa nagsunod sa Dios. Pangitaa ang uban kinsa malipayon ug naningkamot sa pagsunod sa ebanghelyo.”
Amelie P., 14, Brazil
Mahimong Bukas kabahin sa Imong Tinuohan
“Ang akong pamilya kanunayng mamalhin, busa ako nasayod kon unsa kalisod nga makakita og bag-ong mga higala—ilabi na sa mga higala kinsa makatabang nako nga mosunod sa ebanghelyo. Nakat-on ko nga mahimong bukas kabahin sa unsay akong gituohan. Pahibaloa ang uban kon si kinsa ka ug unsa ang imong gibarogan. Ang mga tawo nga imong maila-ila mahimong dili mga miyembro sa Simbahan, apan sila mahimo gihapon nga talagsaon nga mga higala.”
Sophia N., 15, Philippines