Getsemani

Pagkat-on og dugang mahitungod sa dapit diin nagsugod ang mga pag-antos sa Manluluwas alang kanato.

Asa Kini?

Didto sa bakilid sa Bukid sa Oliba, didto sa silangang bahin sa Jerusalem.

Unsa ang Anaa Didto?

Usa ka kakahoyan sa oliba ug tingali usa ka pug-anan alang sa pagkuha sa lana gikan sa mga oliba.

Unsay Nahitabo Dinhi?

Human sa Kataposan nga Panihapon, si Jesukristo miadto uban sa napulo og usa sa Iyang Apostoles ngadto sa Getsemani. Siya miadto dayon sa daplin aron mag-ampo ug gikuha si Pedro, Santiago, ug Juan uban Kaniya.

Gibati “niya ang hilabihang kaguol ug kabalaka.” Miingon siya, “Dako kaayo ang akong kasubo nga [hapit] ikamatay ko” (Marcos 14:33–34).

Siya nag-ampo, “Amahan, kon buot ka, kuhaa kining kopa gikan kanako: Apan, dili ang akong pagbuot kondili ang imo maoy matuman.

“May anghel nga mitungha gikan sa langit nga milig-on kaniya.

“Ug samtang nag-antos siya sa hilabihang kasakit, nag-ampo siya sa labi pa ka mainiton gayod: ang iyang singot sama sa dagkong tulo sa dugo nga nangahulog sa yuta” (Lucas 22:42–44).

Human niining tumang pag-antos sa Manluluwas, Siya giluiban ni Judas ug gidakop sa mga opisyal sa Judeo ug pundok sa mga Romano nga mga sundalo.

Nahibalo Ba Kamo?

Kini nga tanaman sa Bukid sa Oliba mao ang usa ka dapit diin kanunay nga adtoan ni Jesus (tan-awa sa Lucas 22:39; Juan 18:2).

“Sa Aramaic, ang pulong nga Getsemani nagpasabot og “pug-anan sa oliba.’”¹

Kon ang mga oliba unang gidugmok diha sa pug-anan sa oliba, ang lana nga mogawas pula, sama sa dugo.

Sa panahon sa Manluluwas, ang pagpagawas og lana sa oliba usa ka proseso sa pagdugang og kabug-aton sa matag yatak aron sa pagpuga og mas daghang lana kon mahimo:

Ang mga oliba dugmokon nga paligiran kini og dakong bato.
Ang mga kupog nga mga oliba ibutang sa humok, dili kaayo hugot nga pagkalala nga mga basket nga ipatong-patong.
Pagbutang og dakong tuod o kahoy sa ibabaw sa gipatong-patong nga mga basket.
Pabug-atan pa gayod og mga bato sa isig ka tumoy aron mahimo ang kinabug-atang dat-og.²

Ang lana sa oliba gigamit kaniadto alang sa lana sa lampara, lana sa pagluto, pagkaon, sabon, relihiyosong mga seremonya, ug ointment alang sa pagtambal sa mga samad.

Daghang katuigan sa wala pa ang pag-anhi ni Kristo, usa ka anghel misulti ni Hari Benjamin mahitungod sa pag-antos ni Kristo sa Getsemani, nag-ingon, “Ang dugo manggawas gikan sa matag lungag sa iyang mga panit, hilabihan ka dako sa iyang kasubo” (Mosiah 3:7).

Ang pag-antos sa Manluluwas alang kanato naglakip sa Iyang pag-antos didto sa Getsemani ug sa krus, diin Siya namatay. Iyang gidala diha Kaniya ang tanan natong kasal-anan, mga sakit, mga kasakit, mga pagtintal, mga sakit, ug mga kahuyang (tan-awa sa Alma 7:11–12).