“Pagsulbad sa Problema sa Pornograpiya,” Alang sa Kalig-on sa mga Kabatan-onan, Hunyo 2023.
Ako Makahimo sa Tanan nga Butang pinaagi ni Kristo
Pagsulbad sa Problema sa Pornograpiya
Litrato sa maayong kabubut-on ni Smith Alley
Nagsugod kadtong tanan sa usa ka pagkanganga. Ang akong mama mosulti nga kyut kadto, apan intawon dili ko mouyon. Sa unang adlaw sa unang ang-ang, nagsulti ang magtutudlo kanamo nga tagsa-tagsang motindog ug mopaila sa among kaugalingon. Sa dihang akoa nang turno, mitindog ko ug diha-diha dayon gikulbaan ko atubangan sa daghang tawo.
“H-h-h-hi, a-a-a-a-a-ako si Smith.”
Naulaw ko nga nagkasayop ko atubangan sa akong klase. Milingkod ko, ug ang batang babaye mitan-aw nako diretso sa akong mata (mura og mitan-aw siya sa akong kalag) ug miingon, “Nganong dili man ka makasulti og tarong?”
Nianang adlawa midesisyon ko nga lahi ko ug, tungod kay lahi ko, ako mas dili kaayo importante kay sa tanan.
Paglabay sa panahon, ang akong pagtamod sa kaugalingon nagkagrabe. Ako wala motuo nga makabaton ko og mga higala nga tinuod nga nagpakabana nako. Ako wala motuo nga ako igo na aron mahimo nga mapasigarbohon nako ang akong mga ginikanan. Ug sa kataposan, ako wala motuo nga adunay Dios nga mipadala sa Iyang Anak ug namatay alang kanako.
Sa edad nga nuebe nabantang ko sa pornograpiya sa internet. Wala ko nangita sulagma lang nga nakit-an nako. Apan tungod kay nagtuo ko nga dili ko importante, naghunahuna ko nga kon akong sultihan ang akong mga ginikanan, sila maulawan tungod nako. Hinayhinay kining midala kanako sa dalan sa pagkaadik.
Sa dihang 10 anyos na ko, miapil ko sa social media diin nakahatag nako og dugang mga agianan nga makakita og pornograpiya. Sa samang higayon, misugod ko sa pagtandi sa akong kaugalingon sa “perpekto” nga mga kinabuhi diha sa social media. Nakakita ko og post sa mga tawo nga nagbakasyon o nagkuyog sa mga higala sa dihang wala ko imbitaha. Nakakita ko og mga tawo nga naa niining “perpekto” nga mga lawas, ug naghunahuna ko nga ang akong lawas dili igo ang kamaayo. Tungod niining pagbalik-balik sa pagkasilag sa kaugalingon ug pagkaadik, ang akong kinabuhi nahimong negatibo sa hunahuna, pagbati ug sa kinaiya. Sa 14 anyos, nagplano ko sa paghunos sa akong kaugalingong kinabuhi.
Sa adlaw nga ako mibati nga ang tanang butang sa akong kinabuhi sayop, nahibaloan sa akong mga ginikanan ang akong mga pagsulay ug migiya kanako ngadto sa Manluluwas ug sa Iyang Pag-ula. Mao kadto ang mahinungdanong punto sa pag-usab sa akong kinabuhi. Nakigkita ko sa akong bishop, ug siya ug ang akong papa mihatag nako og panalangin. Mao kadto ang unang higayon sa unom ka tuig nga akong nabati ang Espiritu. Nabati ang katinuod niini.
Motutok sa Kalipay, ni Michael Malm
Nagkinahanglan kadto og panahon ug paningkamot, apan tungod sa akong Manluluwas, si Jesukristo, nakahimo ko sa paghinulsol ug molambo nga mas lig-on isip usa ka tawo. Nakakita ko og maanindot nga mga milagro sa akong kinabuhi nga mao ang direkta nga resulta sa makaluwas nga gahom sa Pag-ula ni Jesukristo.
Ako karon migahin sa akong panahon isip usa ka mamumulong sa publiko, magbiyahe sa nasod ug mamulong sa mga grupo sa kabatan-onan, sa mga eskwelahan, sa mga komunidad kabahin sa makadaot nga mga epekto sa social media ug pornograpiya. Ako nagtudlo kabahin sa kaimportante sa mental nga kahimsog ug sa panginahanglan alang sa paglikay sa hikog. Naghimo ako og usa ka platform sa social media nga akong magamit sa kaayohan. Bag-o lang ko migraduwar sa high school. Nag-abli ko og duha ka patigayon ug lig-on nga relasyon niadtong akong gimahal. Labing importante, akong nakaplagan og usab ang Dios. Ako adunay sigurado nga pagpamatuod sa Dios nga Amahan, sa Iyang Anak, si Jesukristo, ug sa Ilang gahom ug impluwensiya.
Walay usa niini nga nahitabo tungod kay ako adunay sobra nga lahi nga mga talento o talagsaon nga mga abilidad. Pinaagi sa Pag-ula ni Jesukristo, ako nakahimo sa paghinulsol, nakabuntog sa mga hagit, ug nakakaplag og kalinaw ug pagkaayo. Kon sa imong hunahuna nahilayo na kaayo ka, ang akong tubag kanimo mao nga nasayop ka. Ako andam sa pagtugyan ngadto sa matubsanon nga gahom ni Jesukristo. Kamo usab.
Smith Alley, Utah, USA