“Ang Pagbiay-biay Dili Gayod Makausab sa Kamatuoran,” Alang sa mga Kalig-on sa Kabatan-onan, Hunyo 2023.
Ang Pagbiay-biay Dili Gayod Makausab sa Kamatuoran
Kamo mahimong mobarog alang sa unsay tinuod bisan kon kamo kataw-an sa mga tawo.
Paghulagway pinaagi ni David Klug
Kita nabuhi sa usa ka panahon nga nagkadaghan ang mga tawo nga nagbiay-biay ni Jesukristo, sa Iyang mga pagtulun-an, ug sa Iyang mga sumusunod.
Ang pagyubit nagpasabot sa pagbiay-biay, pagbugal-bugal, o pang-insulto. Dili sayon ang biay-biayon, apan ang paagi nga kamo motubag makahimo sa tanang kalainan.
Sunda ang Ehemplo sa Manluluwas
Ang Manluluwas mao ang hingpit nga ehemplo kon unsaon sa pagtubag sa pagbiaybiay. Siya milahutay sa pagbiay-biay niadtong wala motuo Kaniya. Apan ang ilang pagbiay-biay dili gayod makapausab sa kamatuoran: Siya mao ang Anak sa Dios ug nagbuhat sa kabubut-on sa Iyang Amahan. Si Jesus maisugon nga mibarog sa kamatuoran. Ug Siya makatabang kaninyo sa pagbuhat sa ingon.
Barogan ang Kamatuoran
Kon kamo anaa sa usa ka sitwasyon diin kamo makapanalipod ni Jesukristo ug sa Iyang Simbahan, ayaw pagdagan gikan niini. Kana mosangpot ngadto sa pagmahay tungod kay inyong nataligam-an ang oportunidad sa pagpanalangin sa uban sa mahangtoron ug walay pag-usab nga mga kamatuoran nga kinahanglan mahibaloan sa kalibotan.
Ang pagbarog alang sa kamatuoran dili kanunayng sayon, ilabi na kon kamo biay-biayon tungod niini. Kini mahimong mahitabo sa eskwelahan, sa trabaho, uban sa mga higala, o bisan sa pamilya.
Si Jesus gibiay-biay, ang mga propeta gibiay-biay, ug daghan pang uban nga gibiay-biay tungod sa pagdepensa sa kamatuoran. Mahimong dili komportable kon ang ubang tawo mobiay-biay ninyo, apan ang paglaban sa kamatuoran kanunayng husto nga buhaton, tungod kay ang pagbiay-biay dili gayod makausab sa kamatuoran.