“I-on ang Switch!” Alang sa Kalig-on sa mga Kabatan-onan, Hunyo 2023.
I-on ang Switch!
Adunay usa ka gitagana nga kalig-on nga inyong matawag sa panahon nga mobati kamo og kahaw-ang, kamingaw, o nahisalaag.
Mga paghulagway pinaagi ni Dean Macadam
Atol sa akong kataposang duha ka panahon sa ting-init sa hayskol, gipadala ko sa akong mga ginikanan nga motrabaho alang sa akong uyoan didto sa Idaho. Siya nagdumala sa Budge’s Golden Sunshine Honey, usa ka patigayon sa pamilya nga gisugdan sa akong lolo.
Nasayod ang akong amahan kon unsay akong masinati. Nagdako siya nga “nagtrabaho uban sa mga buyog.” Gusto siyang makat-on ko kon unsaon sa pagtrabaho sama sa iyang gibuhat. Lisod ang trabaho, ug gamay lang ang mga benepisyo, gawas sa usa: usahay tugotan ko sa akong uyoan nga mosakay sa iyang motorsiklo.
Usa ka adlaw, mihukom ko nga mag-motor. Ang bughaw nga kalangitan, ang hayag nga adlaw, ug ang hangin nga naghuyop sa akong buhok makapadasig! Sa makadiyot, ang tanang taas nga oras sa makugihong pagtrabaho ingon og mapuslanon. Kalit lang, nagkanuos ang motorsiklo ug dayon mihunong. Nahutdan ko og gasolina sa tunga-tunga sa hilit nga dapit! Nahitabo kini sa wala pa ang mga cell phone, mao nga nag-inusara ko.
Naghunahuna ko nga masagmuyo ang akong uyoan kon biyaan nako ang motorsiklo ug maglakaw pabalik sa lungsod, mao nga mihukom ko nga itulod ang motorsiklo pauli. Ngitngit na gayod sa panahon nga naabot ko sa lungsod. Sirado na ang gasolinahan. Giuhaw, gigutom, ug gikapoy ko.
Samtang gitulod nako ang motorsiklo latas sa lungsod, nakit-an nako ang trak sa akong uyoan nga nakaparada sa gawas sa sinehan. Nakit-an nako siya ug gisultihan siya sa unsay nahitabo. Ang iyang tubag nakapasorpresa nako.
“Ngano god nga nahutdan ka og gasolina?” nangutana siya.
Milakaw siya paggawas padulong ngadto sa motorsiklo ug gi-on ang usa ka switch. Gi-on niya ang yawe ug gisikaran ang para paandar sa motorsiklo. Sa akong kasorpresa, ang motor mipagawas og dahunog!
“Giunsa na nimo?” Nangutana ko.
“Adunay reserba nga tangke enkaso og mahutdan ka og gasolina,” miingon siya. “Ang buhaton ra gayod nimo mao ang pag-on sa switch.”
Naulawan, misakay ko sa motorsiklo pauli.
Ang Sambingay sa Motorsiklo
Kanunay kong naghunahuna mahitungod sa akong kasinatian sa motorsiklo. Sa paglabay sa katuigan, nahimo kining sama sa usa ka sambingay kanako.
Niining kinabuhia, kita “nahutdan og gasolina,” sa espirituhanong pagkasulti. Gusto kitang mosalig sa atong kaugalingon nga mga kapanguhaan ug kusog aron sa pagsulbad sa atong mga problema. Usahay naglisod kita, apan naulaw kaayo kita nga mangayo og tabang. Apan sa espirituhanon nga paagi, sama kana sa pagsulay sa paglakaw sa motorsiklo pauli nga walay tabang. Wala kita mahibalo nga adunay usa ka switch nga makahatag og gahom.
Imbes nga mosulay sa pagtulod sa atong “motorsiklo” gamit ang atong kaugalingong kusog, kinahanglan natong “i-on ang switch” ug gamiton ang kinadak-an nga tinubdan sa gahom niini nga kinabuhi: ang maulaon nga gahom ni Jesukristo. Aron magamit ang Iyang gahom, kita kinahanglang moduol ngadto Kaniya uban sa usa ka masulub-on nga kasingkasing ug mahinulsolon nga espiritu, maghinulsol, ug motuo (tan-awa sa 2 Nephi 2:7; Alma 26:35). Pinaagi sa Pag-ula ni Jesukristo, mahimo natong i-on ang espirituhanon nga switch nga mohatag kanato sa gahom nga atong gikinahanglan aron makabalik ngadto sa atong langitnong panimalay.1
Siya Anaa Kanunay
Kon kita naglisod tungod sa sala, giklaro sa Ginoo nga kita kinahanglan gayod “maghinulsol o mag-antos” (Doktrina ug mga Pakigsaad 19:4). Siya naghangyo kanato sa pagdawat sa Iyang maulaong sakripisyo. “Ako, ang Dios, nag-antos niini nga mga butang alang sa tanan,” Siya nagsulti kanato, “nga sila unta dili mag-antos kon sila maghinulsol” (Doktrina ug mga Pakigsaad 19:16).
Usahay ang atong paghinulsol mahimong magkinahanglan og seryoso nga “mga pag-ayo” ug tabang sa usa ka “espirituhanon nga mekaniko” sama sa usa ka ginikanan o bishop. Apan kita kinahanglang kanunay nga mangayo og tabang sa Ginoo. Ang iyang kalipay dako kon kita maghinulsol (tan-awa sa Doktrina ug mga Pakigsaad 18:13).
Ako magpamatuod nga anaa si Jesukristo aron sa pagtabang kanato sa tanang higayon ug sa tanang dapit. Dili kita kinahanglang magsalig sa atong kaugalingon nga kusog. Kon kita mangayo og tabang Kaniya ug magsunod sa Iyang mga sugo, Siya malumo nga mogiya kanato “paingon sa kahayag.”2 Bisan sa panahon nga mobati kita nga haw-ang, nag-inusara, ug nahisalaag, kita mahimong “mo-on sa switch” ug makakaplag ug gibag-o nga kusog ug direksiyon.