Ang Sunod nga Lebel

Ni David A. Edwards

Mga Magasin sa Simbahan

Gusto ba kamo og kalamposan sa inyong pagtuon sa ebanghelyo? Sulayi kini nga sugyot.

bidyo nga dula

Paghulagway pinaagi ni Emily Jones

Sa bidyo nga pagdula [video gaming], kamo “mosaka ang lebel” kon inyong mapildi ang usa ka lebel sa usa ka dula ug mobalhin ngadto sa sunod. Kini mahimong magdala og pagbati sa kalamposan. Maong hunahunaa lang kon unsa ka makatagbaw ang mabati nga mouswag ngadto sa sunod nga lebel sa usa ka butang nga mas mahinungdanon gayod—sama sa inyong pagsabot sa ebanghelyo.

Aniay usa ka sugyot aron sa pagtabang kaninyo nga “mosaka ang lebel” sa inyong pagtuon sa ebanghelyo: mouswag sa mas hanas nga lebel.

Ang Gahom sa Yano nga mga Simbolo

Samtang kamo magbasa sa mga kasulatan ug maghunahuna mahitungod sa espirituhanon nga mga butang, usa ka paagi nga mouswag sa mas hanas nga lebel mao ang pagpangita sa mga simbolo.

Ang mga simbolo mao ang yano nga mga butang (mga hulagway, mga kolor, mga butang, mga aksiyon, mga linihokan) nga magpahinumdom kanato sa ubang, mas komplikado nga mga butang (mga ideya, mga pagtulon-an, mga baroganan). Kini motabang kanato nga mas daling makig-istorya ug mas maayong makakat-on.

Ang mga simbolo sa ebanghelyo anaa na sukad sa sinugdanan. Ang Ginoo misulti kang Adan, “Ang tanan nga mga butang adunay ilang pagkasama, ug ang tanan nga mga butang gilalang ug gibuhat aron magpamatuod kanako” (Moises 6:63). Mao nga, ang Ginoo mogamit og mga simbolo aron sa pagtabang kanato nga makakat-on bahin Kaniya ug sa Iyang ebanghelyo.

Aniay usa lang ka ehemplo.

Mga Simbolo diha sa Sakramento

Diha sa sakramento, ang mga naghupot sa pagkapari moandam sa pan ug tubig. Ang ubang mga naghupot sa pagkapari mopikas-pikas sa pan, moluhod, ug mag-ampo. Ang pan ug tubig pagadad-on ngadto sa mga tawo aron kaonon ug imnon.

• Ang pagluhod aron mag-ampo nagpakita og kamapainubsanon ug magpahinumdom kanato sa atong mga pakigsaad ngadto sa Dios (tan-awa sa Doktrina ug mga Pakigsaad 88:131).

• Ang pan magpahinumdom kanato sa lawas ni Jesukristo. Ang katinuod nga ang pan gipikas-pikas nagpahinumdom kanato sa Iyang pisikal nga pag-antos ug kamatayon. Ang paghinumdom sa Iyang lawas makatabang usab kanato sa paghinumdom nga Siya nabanhaw aron ang tanang tawo mabanhaw.

• Ang tubig nagpahinumdom kanato sa dugo nga gipaagas ni Jesukristo alang kanato samtang Siya nag-antos alang sa atong mga sala. Ang paghinumdom sa Iyang pag-antos motabang kanato sa paghinumdom nga pinaagi sa grasya ni Jesukristo, kita makahinulsol ug mapasaylo sa atong mga sala.

• Ang pagkaon ug pag-inom mao ang paagi nga kita moalima sa atong mga lawas. Sa dihang kita mokaon sa pan ug moinom sa tubig diha sa sakramento, kita mapahinumdoman nga si Jesukristo mao ang tinubdan sa espirituhanon nga pag-alima.

(Alang sa dugang pa, tan-awa sa Giya ngadto sa mga Kasulatan, “Sakramento,” ChurchofJesusChrist.org/study/scriptures/gs/sacrament?lang=ceb.)

Pangitaa ang mga Simbolo

Samtang magtuon kamo sa ebanghelyo, makakaplag kamo og mga simbolo nga makatabang kaninyo nga makat-on. Aniay pipila ka paagi nga kamo mas sayon nga makakita ug makasabot niini.

• Pangita og mga istorya, mga sambingay, mga damgo, ug mga panan-awon. Kini sa kasagaran adunay mga simbolo niini.

• Susiha kon ang mga simbolo gipasabot ba diha sa mga kasulatan. Ang Manluluwas mipasabot sa Iyang sambingay sa magpupugas. Si Nephi nakadawat og panan-awon nga nagpasabot sa damgo sa iyang amahan bahin sa kahoy sa kinabuhi. Mahimong makakaplag usab kamo og pagpasabot diha sa Giya ngadto sa mga Kasulatan (scriptures.ChurchofJesusChrist.org).

• Pangita og mga hulagway, mga butang, o mga aksiyon. Kon adunay mga hulagway, mga butang, o mga aksiyon nga labing importante nga bahin sa usa ka butang (sama sa pan ug tubig sa sakramento o pag-unlod diha sa tubig sa bunyag), hunahunaa kon mahitungod sa unsa kadto nga mga butang, unsa ang buhaton niini, sa unsa nga paagi kini gigamit, unsa kini sama, ug uban pa. Kana mahimong mosangpot ngadto sa pipila ka dugang pa nga mga panabot.

• Bantayi kon ang sama nga mga butang mopakita sa lainlaing mga dapit. Mga kahoy, tubig, pan, karnero, mga barko, mga panaw—adunay daghang butang nga mopakita sa pipila ka lainlaing dapit sa tibuok kasulatan. Timan-i kini, ug tingali kamo makahimo og dugang pa nga mga koneksiyon.

Kini mao lamang ang sinugdanan. Samtang kamo mouswag sa mas hanas nga lebel, mahimong mobati kamo nga kamo ingon og “nagsaka ang lebel” diha sa inyong pagtuon sa ebanghelyo. Siyempre, ang labing importante nga pagkat-on moabot pinaagi sa Espiritu Santo, kinsa mogiya kaninyo ug magpamatuod kaninyo samtang mogahin kamo og panahon ug paningkamot sa espirituhanon nga mga butang.