“Panaghiusa ang Atong Tumong,” Alang sa Kalig-on sa mga Kabatan-onan, Hunyo 2023.
Panaghiusa ang Atong Tumong
Si Tia ug si Alice talagsaon. Apan ang ilang kinadak-an nga tinguha susama—mamahimong usa ni Kristo.
Mga litrato pinaagi ni Richard M. Romney
Uban sa gikusgon sama sa usa ka mubo og lupad nga rocket, ang bola sa soccer (football) kusog kaayo nga nagpadulong sa suok sa net. Apan andam na ang goalie. Hingpit nga nakatutok, si Tia J. milukso sa kataposang posible nga higayon. Iyang gipaling ang rocket (aw, ang bola) nga nagpadulong.
Sa laing duol nga field, si Alice J. miatake. Gipasa niya ang bola ngadto sa usa ka kauban, kinsa mipasa niini og balik. Mipatid si Alice. Ang bola kusog kaayong milahos sa gituyhad nga mga kamot sa goalie. Goal!
Susama apan Lahi
Ang managsoong babaye nga si Tia, 16, ug si Alice, 15, ganahan og soccer. Apan ang soccer usa lamang sa daghang butang nga komon kanila. Ganahan sila sa tanang matang sa sport. Ganahan sila og musika. Silang duha natawo didto sa China ug gisagop sa pareho nga pamilya diha sa Idaho, USA. Natawo sila hapit usa ka tuig ang gintang, mao nga sulod sa duha ka semana sa usa ka tuig “pareho” sila og edad. Si Tia ug si Alice maayong mosagubang sa pisikal nga mga hagit. Silang duha nahigugma sa ilang pamilya. Ug silang duha nahigugma sa ebanghelyo.
Apan lahi usab sila sa usag usa. Si Alice anaa diha sa usa ka klase sa eskwelahan nga ulahi og usa ka tuig kang Tia. Diha sa dulaanan sa soccer, si Tia ganahan og depensa ug si Alice ganahan og opensa. Sa musika, si Tia motukar sa saxophone ug clarinet, ug si Alice motukar sa keyboard ug percussion. Si Tia dos anyos nga miabot sa pamilya ug nakahinumdom sa dihang gisagop si Alice nga nuybe anyos. Si Tia natawo nga adunay kulang nga bahin sa iyang bitiis. Siya molakaw ug modagan ug magdula og soccer gamit ang usa ka prosthetic (usa ka artipisyal nga bitiis). Ug si Alice natawo nga walay mga ear canal. Makadungog siya salamat sa mga himan sa pagpaminaw nga gihuptan pinaagi sa mga magnet nga gibutang diha sa iyang bagolbagol pinaagi sa pag-opera.
Pagtinabangay sa Usag Usa
Samtang magpundok sila uban sa ilang mga ginikanan aron sa pagtuon sa Dali, Sunod Kanako, si Tia ug si Alice maghisgot kon unsay makapahimo nila nga lig-on isip managsoon nga babaye ug unsay makapalig-on sa ilang pamilya.
“Ang pagkaanaa og usa ka igsoon nga babaye nga sunod nako og edad nakatabang kanako,” miingon si Tia. “Ako adunay usa ka tawo nga nakasabot pa og gamay kanako. Maayo nga tigpaminaw si Alice, ug usahay mao kana ang unsay inyong gikinahanglan, usa ka tawo nga anaa sa inyong sama nga lebel kinsa maminaw. Kon ang inyong igsoon nga babaye mao usab ang inyong higala, kini mohimo sa panimalay nga usa ka mas maayo nga dapit.”
“Nindot gayod kaayo nga magkanaa og suod nga igsoon nga babaye,” miingon si Alice. “Makapakatawa siya nako. Ganahan mi nga magpasiaw-siaw. Maghisgot mi mahitungod sa sports, eskwelahan, mga butang nga sama niana. Ug usahay lutoan ko niya og pamahaw. Maayo siya nga moluto.”
Usa ka Team sa Pamilya
“Ang akong papa mao ang akong coach sa soccer,” miingon sa Tia. “Apan murag kataw-anan kana tungod kay siya mao usab ang akong ‘coach’ sa kinabuhi. Ug mao usab si Mama. Siguro kana mohimo ni Alice nga akong kauban sa team.”
Sa pagkatinuod, ang pagtandi sa pamilya ngadto sa usa ka team tukma sa daghang paagi. “Mag-ampo kami og dungan, magtuon kami sa ebanghelyo og dungan, mosimba kami og dungan,” miingon si Alice. “Sama kini og pagbansay. Adunay mga butang nga magkauban ninyong buhaton nga mas makapalig-on kaninyo sa indibidwal nga paagi ug isip usa ka team.
Ug dayon adunay mga butang nga sama kaayo nga anaa sa dula. Si Alice naghimo og lista:
-
Pagpili sa unsay husto
-
Pagserbisyo sa uban
-
Maningkamot nga mahisama ni Jesus
-
Paghinulsol
“Nindot kaayo ang paghisgot mahitungod sa ebanghelyo,” miingon siya. “Apan kinahanglan ninyo usab kining buhaton.”
“Sama usab kana sa sports,” miingon si Tia. “Usa ka butang ang paghisgot mahitungod sa pagdula. Laing butang nga mahimong anaa didto sa field.”
Aron Mahimong Usa
Sama sa nahibaloan ni Tia ug ni Alice, usa sa labing importannte nga bahin sa usa ka nindot kaayo nga team mao ang panaghiusa. Ang mga magdudula indibidwal nga mopalambo og mga kahanas ug pagsabot, apan dayon dungan silang magbansay ug magdula. Ug ang matag usa motampo ngadto sa kalamposan sa pundok.
Apan, kon kalabot sa pundok sa pamilya diha sa ebanghelyo, adunay mas taas nga tumong: “Paghiusa” (Doktrina ug mga Pakigsaad 38:27).
“Managlahi ang matag usa sa atong pamilya,” miingon si Alice. “Apan kon motutok kita sa pagsunod ni Jesukristo, kita adunay komon nga tumong.”
Ug tinuod kana alang sa managsoon nga babaye, mga pamilya, mga klase ug mga korum, mga ward ug mga stake, ug sa tanan diha sa Simbahan. Sama lang nila ni Tia ug Alice, talagsaon ang matag usa kanato ug lahi gikan sa usag usa sa pipila ka paagi. Tingali managlahi ang atong mga kaagi, ingon man ang atong mga gasa, mga talento, mga interes, ug mga hilig. Apan kon kita magkahiusa ug maningkamot nga mamahimong usa ni Jesukristo, makadawat kita og kalig-on aron sa pagkab-ot sa atong labing importante nga mga tumong.