Pakigbahin sa Unsay Imong Gihigugma

Usa ka Mensahe gikan ni Elder Quentin L. Cook

Sa Korum sa Napulog Duha ka Apostoles

Ang imong gugma alang sa ebanghelyo, alang sa uban, ug alang sa Ginoo naghatag kanimo og gahom sa pagpakigbahin sa ebanghelyo.

For This Purpose [Alang Niini nga Katuyoan], ni Yongsung Kim, Havenlight.com

Nabisitahan nako og una ang River Ribble duol sa Preston, England, samtang nagserbisyo isip usa ka batan-ong misyonaryo didto sa British Mission. Didto, ang Apostol ug misyonaryo nga si Heber C. Kimball mibunyag sa unang mga kinabig ngadto sa gipahiuli nga Simbahan ni Jesukristo sa gawas sa Amihanang Amerika kaniadtong Hulyo 1837.

Samtang ako gabarog diha sa taytayan nga gadung-aw sa suba ug gahunahuna mahitungod sa unsay nahitabo didto, nadawat nako ang usa ka gamhanang saksi ni Jesukristo ug sa Iyang gipahiuli nga ebanghelyo.

Ang akong misyon usa ka talagsaon, halandumong kasinatian sa akong kinabuhi. Karon, kasagaran ako mamalandong kon unsa ka malipayon kadto alang kanako sa paggahin og dakong panahon sa akong kinabuhi sa pagpakigbahin sa ebanghelyo ni Jesukristo. Dili ako makahunahuna og bisan unsa pa nga labaw ka mahinungdanon.

Ang Panginahanglan sa Pagpakigbahin sa Ebanghelyo

Handurawa nga ikaw nahimong usa ka disipulo ni Jesukristo sa panahon sa Iyang Pagkabanhaw. Unsa ka talagsaon kaha kadto nga makita Siya ug madungog ang Iyang mensahe?

Ang makapahigmata nga mensahe sa nabanhaw nga Ginoo usa ka pagdapit ug pagmando sa pagpakigbahin sa Iyang ebanghelyo. Miingon Siya, “Busa panglakaw kamo, ug himoa ninyong mga tinun-an ang tanang kanasuran” (Mateo 28:19), ug “panglakaw kamo sa tibuok kalibotan, ug iwali ninyo ang Maayong Balita ngadto sa tibuok nga kabuhatan” (Marcos 16:15).

Gipahayag ni Presidente Russell M. Nelson nga “ang ebanghelyo ni Jesukristo wala pa sukad mas gikinahanglan kaysa karon. … Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa mopatalinghog ug kinsa mopatigbabaw sa Dios diha sa ilang mga kinabuhi.”¹

Ang Ginoo Nagkinahanglan Kaninyo Karon

Kamo nagpuyo sa talagsaon ug labing mahinungdanon nga panahon––ang kataposang dispensasyon sa dili pa ang Ikaduhang Pag-anhi ni Jesukristo. Gipanagna ni Propeta Joseph Smith nga sa dili pa ang Ginoo mobalik pag-usab, “ang kamatuoran sa Dios magpadayon nga maisugon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug makasulti sa matag dunggan, hangtod ang mga katuyoan sa Dios matuman, ug ang Halangdong Jehova moingon nga ang buhat nahuman na.”²

Kinsa ang motabang sa pagkab-ot niini? Kamo!

Dili kinahanglan nga kamo usa ka full-time nga misyonaryo sa pagpakigbahin sa ebanghelyo. Ang Ginoo nagkinahanglan kaninyo karon sa paghimo sa pagpakigbahin sa Iyang malipayon, mahangturon nga mahinungdanong ebanghelyo diha sa pulong ug sa lihok nga usa ka paagi sa kinabuhi ug usa ka bahin kon kinsa ikaw.

Ipunting diha sa Gugma

Ang labing importanting rason nga kita nagpakigbahin sa ebanghelyo mao nga ang Ginoo misugo kanato. Usahay kini mahimong mahagiton, apan ako mosaad nga samtang kamo nagpunting diha ni Ginoong Jesukristo ug unsa ninyo Siya ka gihigugma ug unsa kamo Niya ka gihigugma, kamo pagagiyahan sa inyong mga paninguha.

He is Risen [Siya Nabanhaw], ni Greg Olsen

Tutok diha ni Ginoong Jesukristo ug unsa ninyo Siya ka gihigugma ug unsa Siya ka nahigugma kaninyo.

Ang inyong gugma alang sa ebanghelyo, alang sa uban, ug labing mahinungdanon, ang inyong gugma alang sa Ginoo mohatag kaninyo og gahom sa pagdawat sa Iyang balaan nga pagdapit sa pagpakigbahin sa Iyang ebanghelyo.

Higugmaa ang Ebanghelyo

Ang Ginoo nag-ingon, “Pagkat-on kanako” (Doktrina ug mga Pakigsaad 19:23; Mateo 11:29). Kon ikaw mas magtuon sa ebanghelyo ug magkat-on ni Jesukristo ug sa Iyang sagrado nga misyon isip Manluluwas ug Manunubos, ang inyong gugma alang sa ebanghelyo mas motubo.

Kamo makigbahin sa inyong gugma alang sa ebanghelyo samtang kamo nagpuyo niini. Gitudlo ni Apostol Pablo, “Pagkinabuhi ingon nga panig-ingnan sa sinultihan ug sa paggawi, sa gugma, sa pagtuo, sa kaputli” (1 Timoteo 4:12). Kasagaran ang mga tawo madawaton sa ebanghelyo tungod kay sila adunay positibo nga mga kasinatian sa mga miyembro sa Simbahan. Palihog ayaw pagpuyo og espirituhanong pagtakoban. “Pasigaa ninyo ang inyong kahayag” (Mateo 5:16) ug ipakita sa uban nga ang ebanghelyo usa ka mahinungdanong bahin kon kinsa kamo ug unsa ang inyong gibuhat.

Higugmaa ang Uban

Paghunahuna sa inyong mga higala. Makigbahin ba kamo sa mga salida, musika, ug pagkaon nga inyong gusto ngadto kanila? Makigbahin ba kamo sa inyong mga talento ug mga kalingawan? Tingali kamo naghunahuna kon sila motubag ba sa ebanghelyo kon inyong ipakigbahin kini ngadto kanila. Dili gayod kamo mahibalo hangtod kamo mosulay. Si Presidente Nelson nagtudlo, “Ang tanan angayan nga hatagan og kahigayonan nga mahibalo mahitungod sa gipahiuli nga ebanghelyo ni Jesukristo.”³

Tabangi pinaagi sa gugma ang inyong mga higala, mga sakop sa pamilya, mga silingan, mga kauban sa klase, ug ang uban––maghinumdom nga sila inyong mga igsoong lalaki ug mga igsoong babaye ug hinigugmang mga anak sa inyong Amahan sa Langit––ug inyong makita kini nga mas sayon ang pagpakigbahin sa ebanghelyo ngadto kanila.

Higugmaa ang Ginoo

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, ang atong mensahe sa kalibotan mao nga si Jesukristo buhi! Siya mihimo niining posible alang sa matag usa kanato sa pag-angkon og kaluwasan ug kahimayaan.

Kamo mobati sa gugma sa Ginoo alang kaninyo samtang kamo mamalandong sa tanan nga Iyang nabuhat alang kaninyo. Ang inyong kalag mapuno sa gugma alang Kaniya, ug inyong makita nga kamo dili makahimo kondili makigbahin sa talagsaong mga kamatuoran nga inyong nadawat gikan Kaniya.

Dako Kaayo ang Inyong Hingpit nga Kalipay

Ang akong makadasig nga espirituhanong kasinatian didto sa taytayan ibabaw sa River Ribble isip usa ka batan-ong misyonaryo midala kanako og mahangturong hingpit nga kalipay nga gisaad ngadto niadtong kinsa makigbahin sa ebanghelyo (tan-awa diha sa Doktrina ug mga Pakigsaad 18:15).

Isip usa ka Apostol ni Ginoong Jesukristo, ako mas nakasiguro gani karon nga ang pagpakigbahin sa ebanghelyo usa ka hingpit nga kalipay ug usa ka lawom nga pagpahayag sa atong gugma alang sa gipahiuli nga ebanghelyo, alang sa mga anak sa Dios, ug alang sa Ginoo.

Si Elder Quentin L. Cook nakigsulti sa batan-on nga mga bakwit sa Taal Volcano sa Batangas, Plipinas, kaniadtong Enero 15, 2020.

Ako nagpamatuod nga samtang kamo nagdawat sa pagdapit sa Ginoo ug nakigbahin sa unsay inyong gihigugma, kamo nagtabang Kaniya sa pagtukod sa iyang Simbahan ug sa pag-andam sa kalibotan alang sa Iyang pagbalik, sa panahon nga “Siya mohari isip Hari sa mga Hari ug … Ginoo sa mga Ginoo.”⁴ Nag-ampo ako nga kamo mosunod Kaniya ug makigbahin sa Iyang ebanghelyo sa tibuok ninyong kinabuhi.

Ila-ilaha si Elder Cook

Mihimo og usa ka mahinungdanon kaayong tahas diha sa pagluwas sa upat ka misyonaryo kinsa gikidnap.

Midula sa kampeonato nga mga dula sa estado sa football ug basketball sa hayskol.

Sa dihang gitawag nga mahimong usa ka Apostol, miingon siya nga nalipay siya sa pagkadungog sa balita pinaagi sa tawo kaysa diha sa telepono, tungod kay siya maghunahuna unta nga kini usa ka komedya nga tawag.

Usa sa iyang mga kauban sa misyon mao si Elder Jeffrey R. Holland.

Nahimong presidente ug CEO sa usa ka dakong kompaniya sa pag-atiman sa panglawas.

Mubo nga mga Sulat

1. Russell M. Nelson, “Pagsangyaw sa Ebanghelyo sa Kalinaw,” Abr. 2022 nga kinatibuk-ang komperensiya (Liahona, Mayo 2022, 6).

2. Mga Pagtulun-an sa mga Presidente sa Simbahan: Joseph Smith (2007), 547-548.

3. Russell M. Nelson, “Pagsangyaw sa Ebanghelyo sa Kalinaw,” 7.

4. Tan-awa diha sa “Ang Buhi nga Kristo: Ang Pagpamatuod sa mga Apostoles,” ChurchofJesusChrist.org.