“Pagpundok––Ayaw Pagkatag,” Alang sa Kalig-on sa mga Kabatan-onan, Hulyo 2023.
Dali, Sunod Kanako
Pagpundok––Ayaw Pagkatag
Ang Dios wala magpakita og pinalabi taliwala sa katawhan, ug ni kita kinahanglang mopakita.
Paghulagway ni Travis Constantine
Pila ka semana human ako miabot sa Germany isip usa ka misyonaryo, ang akong trainer ug ako mituktok sa pultahan sa usa ka mas tigulang nga babaye, kinsa miuyon nga kami motudlo kaniya.
Sa among unang leksiyon, gidapit namo siya sa pagbasa og kusog sa usa ka kasulatan. Pinaagi sa baga nga antepara, mibasa siya uban sa dakong kalisod, nagkanga-kanga sa mga pulong. Ug ang iyang mga tubag sa among mga pangutana mugbo ra. Wala kami masiguro kon unsa ka dako ang iyang nasabtan.
Gihangyo namo siya sa pagbasa og pipila ka tudling diha sa Basahon ni Mormon sa dili pa ang among sunod nga pagbisita. Sa dihang kami mibalik, nabasa niya apan ingon og wala masabti kini. Gihunahuna namo kon aduna ba kaha siyay pipila ka mga hagit sa pagkat-on. Gihunahuna namo kon kinahanglan ba kaming magpadayon sa pagtudlo kaniya. Apan kami mipadayon sa pag-adto.
Sa among sunod nga pagbisita, natingala kami sa dihang siya miingon nga gusto siya nga magpabunyag. Unya, samtang kami mipadayon sa pagtudlo kaniya, among namatikdan nga ang iyang pagbasa sa pagkatinuod mas nagkamaayo. Ang iyang mga tubag sa among mga pangutana mga mugbo gihapon apan ingon og mas maayo ug mas siguro.
Sa wala madugay nabalhin ako ngadto sa laing siyudad, apan ang akong trainer misulat kanako sa kadugayan sa pag-ingon nga kini nga babaye nabunyagan ug gisuportahan sa mga miyembro sa branch. Kon kamo nangutana kanamo sa unang mga semana kon kinsa sa tanan namo nga mga kontak ang may kalagmitan nga mabunyagan ug mahimong miyembro sa Simbahan, dili gayod siya ang mag-una sa among lista.
Ug busa nakakat-on kami og usa ka karaang leksiyon––sama nga leksiyon nga nakat-onan ni Apostol Pedro dugay na kaayo ug nga matag usa kanato kinahanglan nga kanunayng makat-onan: “Ang Dios wala diay pinalabi sa mga tawo” (Mga Buhat 10:34).
Usa ka Dakong Kausaban
Gipangulohan ni Pedro ang tibuok Simbahan sa usa ka malisod nga panahon. Misulti ang Manluluwas sa Iyang mga Apostoles, “Panglakaw kamo sa tibuok kalibotan, ug iwali ninyo ang Maayong Balita ngadto sa tibuok nga kabuhatan” (Marcos 16:15). Apan hangtod niana sila kanunay nga nagsangyaw ug nagbunyag lamang taliwala sa mga Judeo.
Dayon pila ka talagsaong mga butang nahitabo. Usa ka Romano nga kapitan nga ginganlan og Cornelio––usa ka Hentil, dili usa ka Judeo, usa ka sundalo kinsa misul-ob og samang uniporme niadtong kinsa milansang ni Jesukristo––nakakita og usa ka anghel diha sa usa ka panan-awon. Ang anghel misulti ni Cornelio nga ipakuha ang usa tawo nga ginganlan og Pedro sa pagtudlo kaniya. Wala madugay human niana, si Pedro dihay panan-awon diin iyang nakita ang pagkaon nga gidili ubos sa balaod sa Judeo, apan gisultihan siya sa pagkaon niini tungod kay ang Dios mihimo niini nga limpyo. Human gyod dayon niining panan-awon ni Pedro, ang sulugoon ni Cornelio miabot ug mihangyo kaniya sa pagkuyog kanila. Ang Espiritu misulti ni Pedro sa pag-adto.
Human makigkita ni Cornelio ug nakita kon unsa ka maayo ug ka tinuod siya, nahibalo si Pedro sa kahulogan sa iyang panan-awon. Ang ebanghelyo kinahanglan nga moadto sa mga Hentil sama ni Cornelio usab. Mao nga niana si Pedro miingon, “Sa pagkatinuod naila ko nga ang Dios walay diay pinalabi sa mga tawo: hinonoa nga sa matag usa ka nasod iyang pagahimut-an ang bisan kinsa nga magakahadlok kaniya ug magabuhat sa matarong iyang dawaton” (Mga Buhat 10:34–35). Gitudloan ni Pedro si Cornelio mahitungod ni Jesukristo ug midapit kaniya ug sa iyang sakop sa panimalay nga magpabunyag. (Tan-awa diha sa Mga Buhat 10.)
Ang pagdala sa ebanghelyo ngadto sa mga Hentil mitimaan og usa ka dako nga kausaban alang sa unang Simbahan. Pipila sa katawhan dihay malisod nga panahon sa pagdawat niini nga kausaban. Apan kini mao ang hustong butang, ug kini mitudlo og usa ka sukaranan nga kamatuoran mahitungod sa Dios ug sa atong mga isig ka tawo.
Walay Pinalabi
Kon Siya nagpanalangin sa Iyang mga anak, ang Dios dili magpakita og pinalabi base sa pagkanasudnon, kaliwatan, sekso, katigayonan, edukasyon, abilidad, hitsura, o bisan unsa nga mga kalainan nga nagbahin sa katawhan.1 Siya “nagtamod sa tanan nga mga tawo nga managsama; siya nga matarong pinalabi sa Dios” (1 Nephi 17:35). Ang tanan makaduol ngadto Kaniya, kay “ang tanan managsama ngadto sa Dios” (2 Nephi 26:33). Siya “nagatan-aw sa kasingkasing” (1 Samuel 16:7). Dawaton Niya kadtong kinsa “nagbuhat sa minatarong, … naghigugma sa kalooy, ug … naglakaw nga mapainubsanon” (Micah 6:8).
Bisan kinsa makapili sa pagduol ngadto ni Jesukristo, makahimo og mga pakigsaad uban sa Langitnong Amahan, ug makasunod diha sa Ilang mga paagi. Ug kini nga kamatuoran kinahanglan nga mogiya kon sa unsang paagi kita makigbahin sa ebanghelyo sa Ginoo ug sa Iyang gugma.
Dili lamang kita makatan-aw sa gawas nga mga kinaiya sa usa ka tawo ug maghunahuna nga sila dili ang “angayan” alang sa ebanghelyo. Dili lamang kita makagamit og kalibotanong mga ngalan [label] ngadto sa mga tawo ug maghunahuna niadtong mga ngalan nga dili makapadawat kanila nga malakip sa simbahan. Dili lamang kita makahukom sa dili pagserbisyo sa usa ka tawo tungod lamang kay sila adunay lahi nga mga opinyong politikanhon, mga kalingawan, o mga gusto gikan kanato.
Wala magtan-aw ang Dios sa usa ka tawo isip usa ka koleksiyon sa mga ngalan nga nagrepresentar og lainlaing mga grupo o mga hiyas. Nagtan-aw Siya sa usa ka indibidwal—Iyang anak. Ug ingon niana kinahanglan kita motan-aw sa matag tawo––isip usa ka talagsaong indibidwal nga adunay patas nga kahigayonan ug kasarang sa pagduol ngadto sa Dios.
Magpakahimong usa ka Tigpundok
Miawhag kanato si Presidente Russell M. Nelson sa pag-apil diha sa pagpundok sa Israel.2 Apan kon kita, dili sama sa Dios, nagpili nga mahimong “mga may pinalabi sa mga tawo” kon kini kalabot sa pagpakigbahin sa ebanghelyo ug paglakip sa mga tawo sa simbahan, mahimong kita mas nagkatag o nagbahin kay sa kita nagpundok ug naghiusa.
Maghimo kita og usa ka pasalig: wala nay pagkatag. Magpakahimo nga usa ka tigpundok. Paghigugma, pakigbahin, ug pagdapit.
Ang akong kompanyon ug ako dili siguro kon ang babaye nga among gitudloan sa Germany may kalagmitan ba gayod nga mabunyagan. Wala kami masayod sa iyang kasingkasing, apan ang Dios nahibalo. Nalipay ako nga kami mibati nga naaghat sa pagpadayon og tudlo kaniya.
Samtang ikaw maninguha sa pagsunod sa Espiritu ug maninguha nga walay pinalabi sa mga tawo, ikaw pagagiyahan sa pagtabang niadtong naglibot kanimo sa pagduol ngadto ni Kristo, sa walay pagsapayan sa ilang mga kalainan.