11 ka Mugbo Kaayo nga mga Istorya mahitungod sa Pagpakigbahin sa Ebanghelyo

Ug kamo makahimo sa pagpakigbahin usab niini!

Ipakita Kon Unsaon nga Makatabang ang Ebanghelyo

Usa ka adlaw ako diha sa klase naglingkod tupad sa akong higala. Kami nangandam sa pagkuha og eksamen, ug misulti siya kanako nga siya sa tinuod gikuyawan. Akong gibati nga kinahanglan nako siyang tudloan kon unsaon pag-ampo. Dayon giduko namo ang among mga ulo ug sa hilom nag-ampo alang sa panabang sa eksamen. Ako mapasalamaton nga ang pag-ampo makatabang sa pagkalma sa mga nerbyos sa akong higala.

Abigail, Uruguay

Pangalagad ngadto sa mga Tawo nga Nanginahanglan

Kami adunay mas tigulang nga babaye sa among ward kinsa dili makaanha sa miting sa sakramento tungod sa mga kabalaka sa panglawas. Ang akong amahan ug ako mihangyo sa bishop kon kami makadala ba sa sakramento ngadto sa iyang balay matag semana. Ang iyang bana, kinsa dili kaayo aktibo, misugod sa pag-ambit usab sa sakramento. Ang pagpundok sa Israel nagpasabot nga kita nagkinahanglan nga modapit sa uban nga mas magpaduol ngadto ni Jesukristo. Ang pagpangalagad dako nga bahin niini.

Shion, Utah, USA

Dapita ngadto sa usa ka Kalihokan

Nagsakay ako og bisekleta agi sa usa ka simbahan sa dihang akong nakita ang daghang tawo didto nga nanagsayaw. Mitawag ako ngadto sa usa ka batan-ong lalaki (ginganlan og Courage) ug nangutana kaniya kon unsay ilang gibuhat. Miingon siya nga nagtambongan sila og mga klase nga gitawag og seminary. Misulti siya kanako nga adunay usa ka kalihokan diha sa simbahan ug nangutana kon ako mokuyog ba kaniya. Si Courage, isip akong higala, sa tinuod miusab sa akong kinabuhi pinaagi sa pagtabang kanako nga mahibalo mahitungod sa ebanghelyo.

David, Ghana

Pagpakahimong Panig-ingnan [Ehemplo]

Nakakat-on ako og daghan pinaagi sa pagbantay sa akong magulang nga igsoong lalaki. Ako gusto og mga dula sa video ug soccer, ug, sa tinuod, tingali akong buhaton kadtong mga butanga sa tanang panahon kon dili pa tungod kaniya. Gusto usab niya kadtong mga butanga, ug sa daghang higayon mag-uban kami sa pagdula niini, apan siya sa kanunay naggahin og panahon sa pagtubo ug paglambo. Dili gayod nako makalimtan nga giagni sa paggamit og mga druga didto sa eskwelahan. Dayon akong gihunahuna ang akong igsoong lalaki ug nahibalo kon unsay iyang pilion; tungod kay ako gusto nga mahisama kaniya, gihimo nako ang hustong pagpili ug mibalibad.

Emilio, Tennessee, USA

Tabangi ang Uban nga Mobati sa Gugma ni Kristo

Atol sa usa ka komperensiya sa AKK [FSY], gibati nako ang hilabihang pag-inusara. Nag-ampo ako sa matag adlaw, naghinaot nga mobati sa Espiritu ug sa gugma ni Jesukristo. Human sa usa sa mga pakigpulong, ang usa ka batan-ong babaye nga ako wala kaayo makaila miduol ug migakos kanako. Gibati nako ang gugma ni Kristo diha sa iyang paggakos, ingon og Siya misulti kanako nga Siya nahigugma kanako.

Natalie, Chile

Sunda ang mga Pag-aghat

Usa ka adlaw ako dihay usa ka espirituhanong pag-aghat nga ako kinahanglang modapit sa akong labing suod nga higala gikan sa eskwelahan ngadto sa usa ka debosyonal. Ako gustong mobaliwala sa pag-aghat, apan sa kataposan ako mipadala kaniya og text sa miaging adlaw. Samtang kami nagtupad og lingkod diha sa debosyonal, ginerbyos ako. Apan sa dihang nahuman ang miting, siya dihay dakong pahiyom sa iyang nawong. Kana usa ka pahinumdom ngari kanako nga ang Dios nahibalo sa Iyang mga anak kay kanako ug nga ako kinahanglang kanunay nga mosunod sa mga pag-aghat sa pagpakigbahin sa ebanghelyo ni Jesukristo.

Eliza, Minnesota, USA

Pag-ampo mahitungod sa Unsay Isulti

Ang akong igsoong babaye ug ako mao lamang ang miyembro sa Simbahan sa among eskwelahan. Nakamatikod ang mga tawo nga kami lahi ug kanunay nangutana. Sa una ginerbyos ako sa pagpakigsulti ngadto kanila, apan ako nag-ampo nga makahimo sa pagsulti sa hustong butang, ug sila naminaw ug mitahod sa akong mga pagpili.

Ruben, Norway

Pakigbahin og mga Kamatuoran sa Ebanghelyo sa Online

Alang sa usa ka tumong, akong gitan-aw ang Dali, Sunod Kanako ug nakakaplag og mga kasulatan ug mga kinutlo nga ipakigbahin diha sa social media. Akong nadawat ang daghang komentaryo gikan sa mga tawo nga nag-ingon nga ilang gibati ang Espiritu pinaagi sa akong mga gi-post. Ang pagpakigbahin sa ebanghelyo makatabang sa uban sa mga paagi nga kita dili makahanduraw niana nga higayon.

Raquel, Brazil

Pagmamugnaon

Diha sa usa sa akong mga klase sa eskwelahan, nagbasa kami og usa ka basahon nga misaway sa Simbahan. Nahibalo ako nga kinahanglan akong mosulti mahitungod sa mga kamatuoran sa gipahiuli nga ebanghelyo. Busa ako mipataas sa akong kamot. Gitawag ako sa magtutudlo, apan ako wala mahibalo kon unsay isulti. Tungod sa pipila ka rason, misugod ako sa pagkanta sa mga awit sa Mga Artikulo sa Hugot nga Pagtuo. Sa akong kahibulong, usa ka lawom nga ligdong nga pagtahod mipuno sa kwarto. Human dihay minos nga kalibog, ug ang akong magtutudlo ug mga kauban sa klase midumala sa panaghisgotan sa klase ug kanako uban ang dugang nga respeto.

Monique, Massachusetts, USA

Pagkamahimong usa ka Kahayag

Sa dihang ako 15, mihukom ako nga magsugod ako sa pagpangita alang sa usa ka simbahan nga tambongan. Pila ka adlaw ang milabay, nahimo akong higala sa usa ka batang babaye sa eskwelahan kinsa ingon og adunay kahayag nga naglibot kaniya. Duha ka semana ang milabay, midapit siya kanako ngadto sa iyang balay. Sa dihang miabot ako didto, ang iyang pamilya midapit kanako sa pag-apil kanila alang sa home evening. Nahimo akong interesado sa Ang Simbahan ni Jesukristo sa mga Santos sa Ulahing mga Adlaw, kasagarang pinasikad kon unsa ka malipayon ang pamilya sa akong higala nianang gabhiona.

McKaylie, Colorado, USA

Pakigbahin Tungod sa Gugma

Giawhag ako sa akong ig-agaw sa pakigkita sa mga misyonaryo, ako naghunahuna, tungod kay siya gusto kanako nga makapahimulos sa mga panalangin nga gipahimoslan niya niana nga panahon. Gibati nako nga ang akong ig-agaw ug ang akong higala, si Enoch, nahigugma kanako ug gusto sa usa ka butang nga maayo alang kanako. Kini mihimo kanako nga komportable kaayo nga moadto sa simbahan.

Eric, Ghana