“Buhata nga Mahimong Tubag ngadto sa Pag-ampo sa Usa ka tawo,” Alang sa Kalig-on sa mga Kabatan-onan, Hulyo 2023.

Dali, Sunod Kanako

Buhata nga Mahimong Tubag ngadto sa Pag-ampo sa Usa ka Tawo

Ni Stephanie E. Jensen

Mga Magasin sa Simbahan

Ang pagsunod sa mga pag-aghat nagtabang kanato sa paghimo og usa ka kalainan.

Sila si Pedro ug si Juan miayo sa usa ka lalaki didto sa templo.

Mahimong bation nimo nga ikaw walay daghang ikahatag. Apan ikaw adunay hugot nga pagtuo diha ni Jesukristo, ug ang imong hugot nga pagtuo diha Kaniya igo sa paggiya ngadto sa pipila ka nindot kaayo hinuon nga mga butang.

Wala madugay human sa pagkamatay ug Pagkabanhaw ni Jesukristo, miadto si Pedro ug si Juan sa templo, diin usa ka lalaki nga bakol milingkod lamang sa gawas ug nangayo kanila og hinabang.

Si Pedro miingon ngadto sa lalaki, “Ako walay salapi o bulawan, apan sa ania kanako hatagan ko ikaw; Sa ngalan ni Jesukristo nga Nazaretnon paglakaw” (tan-awa diha sa Mga Buhat 3:6; empasis gidugang).

Gipatindog siya ni Pedro. Sa unang higayon sa iyang kinabuhi, ang lalaki nakatindog. Milakaw siya ug gani milukso tungod sa kalipay. Ang hugot nga pagtuo ni Pedro diha ni Kristo mihatag kaniya og kaisog sa pag-ayo sa lalaki pinaagi sa gahom sa pagkapari.

Magmatinuoron kita, hinoon. Dili tingali ikaw mang-ayo sa tanang pisikal nga mga sakit sa tanang panahon. Apan ang imong hugot nga pagtuo makatabang sa uban nga mga paagi. Sama ni Pedro, unsay anaa kanimo, ikaw makahatag.

Imahe

batan-ong mga lalaki

Litrato gikan sa Getty Images

Paghimo og Kalainan

Giampo ba nimo sukad nga dili kaayo mobati og kamingaw? O nga usa ka tawo mahimo nimong higala?

Aduna bay usa ka tawo sukad nga mipakita, mitawag, o mi-text kanimo niana nga higayon? Tingali sila nagsunod og pag-aghat ug naninguha sa paglambo, sama lamang kanimo. Ang tanan nilang gihimo mao ang paggamit sa ilang gamay nga oras sa matinud-anong paagi, pipila sa ilang kaisog, ug usa ka gamay nga kamabination––sa laing pagkasulti, unsay anaa kanila. Ikaw usab makahimo sa imong hugot nga pagtuo sa pagdasig kanimo sa paglihok sa mga pag-aghat.

Gitudlo ni Elder Ronald A. Rasband sa Korum sa Napulog Duha ka Apostoles: “Kita adunay sagradong responsibilidad nga magkat-on sa pag-ila [sa Espiritu Santo nga] impluwensiya diha sa atong kinabuhi ug molihok.”¹

Dili ka sa kanunay makamatikod kanus-a o kon ikaw nakahimo ba og kalainan sa adlaw sa usa ka tawo, busa kini mahimong lisod sa pagtan-aw sa katuyoan sa pagsunod sa mga pag-aghat.

Hinoon, ang paninguha sa pagserbisyo––pagbuhat unsay ikaw makahimo––mohimo kanimo nga mobati og kalipay ug nakatuman bisan kon ikaw dili sa kanunay makakita sa mga resulta. Samtang ikaw naminaw ngadto sa mga pag-aghat, ang Espiritu Santo motabang kanimo sa pagkat-on sa pagserbisyo sa uban, bisan sa nagkapuliki nga iskedyol. Sama sa gitudlo ni Elder Jeffrey R. Holland sa Korum sa Napulog Duha ka Apostoles: “Ang mga pag-ampo tubagon … kasagaran … sa Dios nga naggamit sa ubang mga tawo. Nan, ako mag-ampo nga Siya mogamit kanato. Ako mag-ampo nga kita mahimong tubag ngadto sa mga pag-ampo sa mga tawo.”²

Hingpit nga Kalipay alang sa Tanan

Pinaagi sa pagbuhat og maayo, ikaw makabuhat nga mahimong tubag ngadto sa mga pag-ampo sa uban ug makakaplag og hingpit nga kalipay subay sa agianan––ug didto sa mga kahangtoran. Sumala sa gitudlo ni Elder Rasband: “Ang hingpit nga kalipay moabot isip kalinaw taliwala sa kalisdanan o kasakit. Naghatag kini og kahupayan ug kaisog, mopasabot sa mga kamatuoran sa ebanghelyo, ug mopalambo sa atong gugma alang sa Ginoo ug sa tanang mga anak sa Dios.”³ Sa laing pagkasulti, ikaw usab mahimong mas mahisama kang Kristo.

Hatag lamang sa unsay ikaw makahimo, magsugod sa usa ka gamay nga panahon ug sa pagkamasulundon.

Usahay, sa tinuod, ikaw ang usa kinsa nagkinahanglan og dugang nga gamayng tabang. Ania usab, ang usa ka mahigugmaong Langitnong Amahan nagpadala og mga pag-aghat ngadto sa uban. Makakaplag sila og hingpit nga kalipay samtang nahimong tubag ngadto sa imong mga pag-ampo, sama lamang kanimo nga mahimong tubag ngadto sa ilaha. Kana nagpasabot nga adunay binilyon nga posibleng mga tubag, ug ang sunod mao ang paglakaw sa dalan, padulong na hapit sa pagsulti og kumusta.