“Kon ang mga Pagpili sa Ubang mga Tawo Nagpasakit Kanimo,” Alang sa Kalig-on sa mga Kabatan-onan, Hulyo 2023.
Kon ang mga Pagpili sa Ubang mga Tawo Nagpasakit Kanimo
Ania ang pipila ka mga butang nga hinumdoman kon ang ubang mga tawo naggamit sa ilang kabubut-on sa mga paagi nga nagpasakit kanimo.
Mga paghulagway pinaagi ni Shana Keegan
Ikaw naghimo og tonilada nga mga pagpili matag adlaw––unsa ang isul-ob, unsa ang kaunon sa pamahaw, hain nga mga higala ikaw makigkuyog. Ang kabubut-on o kagawasan sa pagpili ug sa paglihok, mao ang usa sa labing dako nga mga gasa nga gihatag sa Dios kanato.
Ang atong mga pagpili usab adunay mga sangpotanan, ug usahay ang mga pagpili sa ubang mga tawo makapasakit kanato. Kon ikaw nasilotan na tungod sa usa ka butang nga gibuhat sa imong igsoong lalaki, nahibalo gayod ka kon unsa ka mahagiton kini nga makahimo kon ang ubang tawo naggamit sa ilang kabubut-on sa mga paagi nga dili nimo gusto!
Apan usahay adunay mas grabe nga mga butang nga ang mga tawo makagamit sa ilang kabubut-on. Ang gagmayng mga bata sa eskwelahan tingali modaugdaog kanimo, o tingali usa ka sakop sa pamilya naghukom sa pagbiya sa Simbahan. Adunay daghang higayon nga ang kinabuhi ingon og dili patas. Hinoon human ang tanan, ikaw nagsulay sa paggamit sa imong kabubut-on sa paghimo og matarong nga mga pagpili––busa nganong wala sila maghimo?
Dayag lang, dili ka makapugong sa uban. Apan ang maayong balita mao nga ikaw makahimo sa pag-usab sa imong kaugalingon. Ang estratehiya mao ang pag-ilis kon unsa ang imong hatagan og bug-at nga pagtagad ug sa paghimo og maayo nga mga pagpili bisan kon ang uban dili maghimo.
Ania ang pipila ka butang nga hinumdoman mahitungod sa pagpadayon sa unahan uban ang hugot nga pagtuo, bisan kon ang ubang mga tawo naggamit sa ilang kabubut-on sa mga paagi nga nagpasakit kanimo:
-
Si Satanas naninguha sa pagguba sa kabubut-on (tan-awa sa Moises 4:3). Bisan tuod kini malisod sa pagbantay sa uban nga naghimo og ngil-ad nga mga pagpili, ikaw usab libre sa paghimo og maayo nga mga pagpili sa pagsunod ni Jesukristo ug mahimong mas sama Kaniya!
-
Ang imong mga lihok adunay epekto. Hinumdomi, “Gawasnon kita sa pagpili, apan kita dili makapili sa mga sangpotanan.”1 Nagtan-aw kon giunsa pag-apekto sa mga pagpili sa ubang mga tawo diha kanimo makahimo og usa ka maayong pahinumdom alang kanimo sa paghimo og mga pagpili nga dili makadaot sa imong kaugalingon o sa uban.
-
Ang tanan responsable alang sa ilang kugalingong mga pagpili (tan-awa diha sa Doktrina ug mga Pakigsaad 101:78). Dili ka kinahanglan nga mabug-atan uban sa pagbati nga responsable alang sa pag-usab sa ubang mga tawo o sa ilang mga pagpili. Hinoon, ikaw makahatag og gibug-aton diha sa paghimo og positibo nga mga desisyon ug sa pagsunod ni Jesukristo.
-
Ikaw makapili nga magmabination. Ang usa ka tawo tingali mahimong ngil-ad nganha kanimo, apan ikaw makahimo gihapon nga magmaloloy-on ngadto kanila. Nagkinahanglan kini og kaisog nga magmabination ngadto sa mga tawo ug magpasaylo kanila kon sila dili maloloy-on nganha kanimo, apan kana mao ang unsay eksakto nga buhaton ni Jesus (tan-awa diha sa Lucas 23:34).
-
Kinahanglan imong hatagan og gibug-aton ang unsay ikaw makapugong. Ikaw mahimong dili makapahunong sa imong mga ginikanan gikan sa pagbulag, sama pananglitan, apan ikaw makapili sa paghatag og gibug-aton sa pagpabilin diha sa dalan sa pakigsaad, pagtabang sa imong mga igsoon, pagkat-on mahitungod sa maayong mga pakigrelasyon, ug sa paghimo og mga tumong alang sa imong kaugalingong pamilya sa umaabot. Pilia ang pag-usab sa imong mga hagit ngadto sa mga oportunidad sa pagtubo ug sa pagkat-on.
-
Ikaw adunay balaang pagkatawo ug katuyoan. Kon imong mahinumdoman ang imong pagkatawo isip usa ka anak sa Dios ug balikon ang paghatag og bug-at nga pagtagad sa imong mga tumong sa kinabuhi, imong makita ang unsa gayod ang tinuod nga importante. Ang paghatag og bug-at nga pagtagad sa imong katuyoan ug sa pagtan-aw nga kining mga hagit gamay lamang nga bahin sa istorya sa kinabuhi makatabang kanimo sa pagpadayon sa unahan uban ang hugot nga pagtuo.
-
Pinaagi sa hugot nga pagtuo diha ni Jesukristo, ikaw makakaplag og personal nga kalinaw, bisan kon ang mga butang sa imong palibot dili malinawon. Miingon si Presidente Russell M. Nelson, “Kita makabati ug malungtarong kalinaw ug hingpit nga kalipay, bisan atol sa gubot nga mga panahon.”2 Ang kinabuhi usa ka unoson nga dagat, ug kini sayon sa paghinaot nga kalmahon sa Dios kadto nga mga unos alang kanato. Apan usahay kaysa himoong kalma ang dagat, Siya nagkalma kanato, ang mga maglalawig. Duol ngadto Kaniya uban sa imong mga kasamok, ug Siya motabang kanimo.
Ang Dios mihatag kanimo og kabubut-on aron ikaw makapili sa pagsunod Kaniya ug busa mahimong sama Kaniya. Samtang ikaw nagbuhat, ikaw sa yanong paagi nagkat-on gikan sa imong kaugalingong mga pagpili ug mga kasaypanan ug gikan sa mga pagpili sa uban. Bisan tuod kini malisod nga magtan-aw sa mga tawo nga naghimo og mga pagpili nga makapasakit kanimo, ikaw makakat-on gikan niadtong mga kasinatian ug magpadayon sa unahan uban ang katuyoan, hugot nga pagtuo, ug hingpit nga kalipay.