“Naghupot Diha sa Kamatuoran,” Alang sa Kalig-on sa mga Kabatan-onan, Hulyo 2023.
Naghupot Diha sa Kamatuoran
Paghulagway ni Ben Simonsen
Sa unang higayon nga akong nakita ang usa ka gambalay sa Simbahan, nakaingon ako og kini usa ka ospital. Kini limpyo kaayo ug hilom. Nahigugma ako sa ebanghelyo ni Jesukristo sa higayon nga ako mitambong sa mga serbisyo sa Simbahan.
Ang sister nga mga misyonaryo misugod sa pagtudlo kanako, ug ako mihukom sa pagpabunyag. Kadto mao ang labing nindot nga adlaw!
Gipaila-ila ako ngadto sa ebanghelyo pinaagi sa akong silingan kinsa usa ka returned misionary. Gitawag niya ako usa ka buntag sa Dominggo ug mihangyo kanako sa pagsimba uban kaniya ug sa iyang pamilya. Sa sinugdanan, ang akong inahan miingon nga ako dili makaadto tungod kay kami walay kwarta alang sa pamasahe sa bus. Sa dihang akong gisultihan ang akong silingan mahitungod niini, miingon siya nga dad-on ako niya, ug ang akong inahan mitugot kanako sa pag-uban.
Bisan Kon Kita Mag-inusara
Human ako mabunyagi, diha akoy daghang malisod nga mga panahon uban sa akong pamilya. Usahay gusto nila kanako nga magpabilin sa panimalay ma-Dominggo, apan mopili hinoon ako sa pagsimba. Kadaghanan sa panahon kini malisod sa pagpaninguha nga magpabilin diha sa dalan sa pakigsaad.
Pipila sa sakop sa akong pamilya nahimong batok sa Simbahan ug nakasulti kanako nga ako mihimo og sayop nga pagpili sa pagpasakop. Kon sila mosulti kanako niini, ang mga pulong nga moabot sa akong hunahuna: “Ako nahibalo nga ang Langitnong Amahan ug si Jesukristo buhi. Ako nasayod nga ang Simbahan tinuod.” Kini nga mga hunahuna nakatabang kanako sa paghupot diha sa kamatuoran.
Ang Atong mga Lihok Makatandog sa mga Kinabuhi sa Uban
Sa dihang ako nakigbisog nga mahibalo kon unsaon sa pagbayad sa ikapulo, ang akong silingan mipakita kanako kon usaon sa pagbayad niini. Karon kon ang akong inahan naghatag kanako og kwarta para bawon, kanunay akong nagbayad sa akong ikapulo. Ang akong pamilya ug ako nakakita sa mga panalangin gikan niini. Ang akong pamilya gani misugod sa paghatag kanako sa ilang kwarta nga ibayad isip ikapulo! Kana nahimong usa ka sorprisa.
Sa kasagaran moadto ako sa simbahan nga ako ra, apan usahay ang akong inahan mouban kanako. Mihukom ang akong inahan sa pagkat-on og dugang pa mahitungod sa ebanghelyo ug nakakita niini nga malipayon kaayo, bisan tuod siya wala pa mabunyagi.
Ang Pag-ampo ug Hugot nga Pagtuo Nag-usab og mga Kasingkasing
Akong nakita ang kamot sa Ginoo diha sa kinabuhi sa akong pamilya samtang ako nag-ampo alang kanila ug naghangyo sa uban sa pag-ampo alang kanila diha sa templo. Ang akong mga sakop sa pamilya nahimong mas matinabangon, ug sila karon nag-awhag kanako sa pagsimba ug magpakatinuod kon kinsa ako.
Namatay bag-ohay ang akong apohang lalaki, ug akong nakaplagan ang iyang ngalan samtang nagbuhat og family history work. Gihangyo ko si papa kon mahimo ba ang iyang mga ordinansa himoon sa templo. Miingon siya, “Buhata lamang kon kini ang husto nga butang.”
Tinuod nga Hingpit nga Kalipay ug Kamaya
Ang pagbasa sa mga kasulatan ug pagkahibalo mahitungod sa Pag-ula ni Jesukristo nakadala kanako og hingpit nga kalipay, kamaya, kalinaw, ug kahupay.
Ako nahibalo nga pinaagi sa maulaong sakripisyo sa Manluluwas, ako magkauban pag-usab sa akong Langitnong Amahan ug nga ang akong pamilya makauban kanako hangtod sa hangtod kon kami masilyo diha sa templo usa ka adlaw niana.
Ang tagsulat gikan sa Vanuatu ug nagpuyo sa Fiji.