“Pito ka Adlaw sa Pagpakigbahin,” Alang sa Kalig-on sa mga Kabatan-onan, Hulyo 2023.
Pito ka Adlaw sa Pagpakigbahin
Kamo makahimo sa pagpakigbahin sa ebanghelyo sa normal ug natural nga mga paagi. Andam ka ba alang sa hagit?
Kon kita magsulti mahitungod sa pagpakigbahin sa atong mga pagpamatuod, kanunay kitang maghunahuna sa pagpamatuod diha sa miting sa sakramento o sa ubang pipila ka pormal nga mga sitwasyon. Apan kita giawhag sa “pagpangita og mga kahigayonan sa paghisgot bahin sa inyong hugot nga pagtuo sa natural ug normal nga mga paagi.”1
Diha sa pito ka adlaw nga hagit sa ubos, ikaw makahimo sa pakigbahin sa imong pagpamatuod sa lahi nga paagi matag adlaw sulod sa usa ka semana. Makabuhat ka niini nga mga butang sa bisan unsa nga pagkahan-ay, o gani ikaw makahimo og imong kaugalingong mga ideya! Andam ka ba alang sa hagit?
Mga paghulagway pinaagi ni Emily Davis
Adlaw 1: Simbahan
Hunahunaa ang paghatag sa imong pagpamatuod diha sa puasa ug pagpamatuod nga miting sa simbahan kon kana usa ka butang nga ikaw komportable. Kon dili, makahimo ka usab sa pagpakigbahin sa imong pagpamatuod sa simbahan pinaagi sa pag apil sa imong mga klase sa Dominggo ug sa seminary. Ang mga komentaryo nga imong ipakigbahin didto makabayaw sa uban ug makalig-on sa ilang mga pagpamatuod ingon man usab sa imo.
Adlaw 2: Mga Higala
Unsa ang imong nakat-onan sa simbahan niadtong Dominggo? Nagustohan ba nimo unsay gipakigbahin sa usa ka tawo diha sa miting sa sakramento o diha sa inyong panaghisgotan sa klase? Tingali ang pangbukas nga awit usa sa imong paborito nga mga himno. Sultihi ang usa ka higala mahitungod niini! Dayon pangutana mahitungod sa ilang kataposan sa semana usab.
Adlaw 3: Social Media
Ang social media usa ka nindot nga dapit sa pagpakigbahin og espirituhanon nga mga butang sa normal ug natural nga mga paagi. Alang sa hagit niini nga adlaw, hunahunaa ang pagpakigbahin og usa ka sinulat mahitungod sa:
-
Usa sa imong paborito nga mga tudling sa kasulatan.
-
Usa ka makapabayaw nga kinutlo gikan sa kinatibuk-ang komperensiya.
-
Usa ka espirituhanong panghunahuna o kasinatian.
-
Usa ka butang nga imong gihigugma o gipasalamatan mahitungod sa Manluluwas.
-
Usa ka paagi nga Siya mitabang kanimo bag-ohay lamang o usa ka hiyas nga imong gidayeg diha Kaniya ug ngano.
Adlaw 4: Text o Video
Pagpadala og usa ka makabayaw nga mensahe ngadto sa usa ka higala pinaagi sa text o video. Makahimo ka sa pakigbahin og usa ka pakigpulong sa komperensiya nga ikaw naghunahuna nga tingali ilang magustohan, isulti kanila ang usa ka butang nga ikaw mapasalamaton mahitungod kanila, o pakigbahin mahitungod sa imong hugot nga pagtuo diha ni Jesukristo. Sama pananglitan, sila tingali nagkinahanglan nga mahibalo mahitungod sa gugma sa Langitnong Amahan alang kanila. Ikaw makasulti kanunay kanila sa personal usab!
Adlaw 5: Serbisyo
Mahimong maghunahuna ka kon sa unsang paagi ang pagserbisyo sa uban mahimo nga usa ka paagi sa pagpakigbahin sa imong pagpamatuod. Misulti si Apostol Pablo, “Hinonoa alang sa mga magtotoo, pagkinabuhi ingon nga panig-ingnan sa sinultihan ug sa paggawi, sa gugma, sa pagtuo, sa kaputli” (1 Timoteo 4:12). Busa ikaw makapakita sa imong mga pagtuo pinaagi sa imong ehemplo, pinaagi sa pagserbisyo sa uban sama nga ang Manunubos moserbisyo kanila.
Adlaw 6: Art
Usahay ang mga tawo mogamit sa art isip usa ka lahi nga paagi sa pakigbahin sa ilang mga hunahuna ug mga pagbati. Makagamit ka sa mga pinintura [painting], pagkulit [sculpture], mga balak, musika, o bisan unsa nga matang sa art sa pakigbahin kon unsa ang imong gibati mahitungod ni Jesukristo ug sa Iyang ebanghelyo.
Adlaw 7: Wala Planoha nga mga Panag-istoryahanay
Ayaw kahadlok sa paghisgot sa imong mga tinuohan sa wala planoha nga mga sitwasyon, sama lamang nga ikaw mopakigbahin og bisan unsa nga mga hunahuna nga ikaw aduna mahitungod sa usa ka gihatag nga hilisgotan.
Ikaw makahimo, sa tinuod, sa paghisgot mahitungod sa mga kalihokan sa Simbahan o usa ka kasulatan nga imong nabasa bag-ohay, apan kini mahimo usab gani nga mas wala planoha kay sa niana. Sama pananglitan:
-
Kon gibati nimo nga nadasig sa kinaiyahan, ipahayag ang imong pasalamat sa mga nilalang sa Dios ngadto sa lain nga tawo.
-
Tingali ikaw adunay nindot nga espirituhanong kasinatian bag-ohay. Sultihi ang usa ka higala mahitungod niini kon kini dili kaayo personal.
-
Pangita og mga pagkasusama sa ebanghelyo diha sa usa ka basahon o salida nga imong nagustohan, ug ipakigbahin ang imong mga panabot.
Normal ug Natural
Samtang ikaw mangita og lainlaing mga paagi sa pakigbahin sa imong mga tinuohan, kini mahimong mas natural kaayo alang kanimo sa pagbuhat sa mao. Tingali kini mobati og kabakikaw sa una, apan kana okay ra! Hunahunaa, ang imong pagpamatuod mismo natural na nganha kanimo––kini kabahin kon kinsa ikaw. Ang pagpakigbahin niini mahimo usab nga natural. Ang tanang gikinahanglan mao ang pagpahayag niini og diyotay pa matag adlaw.
Unsaon nimo sa pakigbahin sa imong pagpamatuod karon?