4 ka Paagi sa Pagsuporta og mga Higala nga Dili Miyembro ang Uban nga mga Sakop sa Pamilya,” Alang sa Kalig-on sa Mga Kabatan-onan, Hulyo 2023.
Tabang sa Kinabuhi
4 ka Paagi sa Pagsuporta og mga Higala nga Dili Miyembro ang Uban nga mga Sakop sa Pamilya
Ikaw makatabang sa tanan nga mobati nga gihigugma ug giamuma diha sa simbahan sa walay pagsapayan sa ilang mga sitwasyon.
Ang mga pamilya daghan og mga matang. Ang mga tawo nga imong makita diha sa simbahan, sama pananglitan, mahimong adunay mga sakop sa pamilya kinsa dili mga miyembro sa Simbahan o kinsa mipili sa pagpalayo gikan sa Simbahan. Ang pagkawalay suporta sa pamilya, makahimo kini og kalisod alang sa mga tawo sa pag-apil sa simbahan, o gani sa pagbati nga sila nahisakop.
Kana mao diin ikaw motabang!
Ikaw makahimo og usa ka importante nga tahas sa pagpanalangin sa tanang matang sa mga pamilya, diha sa tanang matang nga mga sitwasyon. Ania ang pipila ka paagi nga ikaw makatabang:
Mga paghulagway pinaagi ni Oksana Grivina
Pag-ampo alang sa mga Paagi sa Pagtabang
Pag-ampo nga mahibalo kon unsaon nga ikaw makatabang niadtong kinsa mosimba ug sa ilang mga pamilya. Pangandam sa paglihok sa mga tubag nga imong madawat.
Ila-ilaha ang Pamilya
Kon posible, paninguhaa nga maila-ila ang tibuok pamilya sa imong higala. Kini motabang kanimo nga mahibalo kon unsa nga suporta aduna ang imong higala diha sa panimalay ug unsay naghimo sa pag-apil sa simbahan nga malisod alang kanila. Samtang imong gi-ila-ila og mas maayo ang pamilya, ikaw madasig sa pagtabang sa piho nga mga paagi nga gikinahanglan.
Siguroha nga ikaw Makanunayong Nagpuyo sa Ebanghelyo
Daghang tawo ang mahimong interesado sa Simbahan kon sila makakita og mga miyembro nga nagpuyo sa unsay ilang gituohan. Dili ka gayod mahibalo kon kinsay nagbantay. Ikaw makatuman og daghang maayo sa yanong paagi nga pagpuyo sa ebanghelyo. Ang pagbuhat sa mao mopanalangin sa imong kinabuhi ug makatabang sa pagdala sa kahayag sa ebanghelyo ngadto niadtong naglibot kanimo.
Sa Yanong Paagi Pagmabination
Ayaw og ipakaubos kon sa unsang paagi ang yanong pagkamabination makahimo og dako nga kalainan. Sama pananglitan:
Kon ikaw makakita og usa ka tawo nga naglingkod nga nag-inusara sa simbahan, lingkod tupad kanila o itanyag nga palingkuron sila uban sa imong pamilya.
Kon dili sila makaadto sa simbahan o sa ubang mga kalihokan sa ilang kaugalingon, itanyag ang paghatag kanila og masakyan o dapita sila sa pag-adto uban sa imong pamilya.
Importante usab kini ang pag-apil sa imong mga higala diha sa mga kalihokan. Ang pagdapit ngadto sa usa ka ward o pamilya nga kalihokan maingon og gamay, apan kini makatabang sa imong higala sa pagpili nga magpabiling duol ngadto sa Manluluwas ug sa Iyang Simbahan kon gibati nila nga sila naapil.