“Unsa kaha kon usa ka tawo magsulti kanako nga ang siyensya nanghimakak og usa ka butang nga atong gituohan?” Alang sa Kalig-on sa mga Kabatan-onan, Hulyo 2023.
Direkta sa Punto
Unsa kaha kon usa ka tawo magsulti kanako nga ang siyensya nanghimakak og usa ka butang nga atong gituohan?
Gitudlo ni Presidente Russell M. Nelson: “Ang Dios mao ang tinubdan sa tanang kamatuoran. Ang Simbahan ni Jesukristo sa mga Santos sa Ulahing mga Adlaw mihangop sa tanang kamatuoran nga gipasabot sa Dios ngadto sa Iyang mga anak, nakat-onan man sa siyentipiko nga laboratoryo o nadawat pinaagi sa direkta nga pagpadayag gikan Kaniya” (“Unsa ang Tinuod?” Okt. 2022 nga kinatibuk-ang komperensiya [Liahona, Nob. 2022, 30]).
Kon ang mga tawo mag-ingon nga ang siyensya nagsupak sa usa ka kamatuoran sa ebanghelyo, ania ang mga butang nga hinumdoman:
Kinahanglan nga imong kuhaon ang mga kamatuoran. Pangitaa kon unsa ang tinuod nga giangkon sa siyensya (ug wala angkona), ingon man sa unsa ang giangkon sa gipahiuli nga ebanghelyo ni Jesukristo (ug wala angkona). Hatagi og prayoridad ang pagtuon sa mga kasulatan ug sa mga pulong sa mga propeta.
Ang espirituhanong kahibalo tinuod. Ang siyensya maoy usa ka pamaagi alang sa pagkat-on og mga kamatuoran mahitungod sa pisikal nga kalibotan. Apan adunay pipila ka mga kamatuoran nga ang Dios naghatag kanato pinaagi sa pagpadayag lamang. Ikaw makabaton og hugot nga pagtuo nga ang Espiritu Santo “mamulong sa mga butang ingon nga sila gayod mao” (Jacob 4:13).
Ang hugot nga pagtuo nagkinahanglan og pailob. Ang siyentipikong kahibalo mausab sa paglabay sa mga panahon. Usahay kita kinahanglang maghulat lamang alang sa siyensya nga makaagpas sa gipadayag nga mahangturong kamatuoran. Kita makakupot pag-ayo ngadto sa mas dagko nga espirituhanong mga kamatuoran samtang nagtuon sa mga detalye.