“Pag-apil sa Samang Team,” Alang sa Kalig-on sa mga Kabatan-onan, Hulyo 2023.
Pag-apil sa Samang Team
Kining duha ka hayskol nga magkaribal nahimong mga higala sa tibuok kinabuhi.
Mga Litrato pinaagi ni Jeffery Barker Edwards
Si Sister Dil adunay unom na lamang ka semana nga nahibilin sa iyang misyon sa Australia sa dihang iyang nahibaloan nga iyang igahin kadtong kataposang mga semana sa pagserbisyo kauban ni Sister Tuala!
“Mao kini ang butang nga wala nako damha nga mahitabo nako,” nag-ingon si Sister Dil.
Si Sister Dil ug Sister Tuala misugod nga mga magdudula alang sa ilang nanguna nga kompetisyon sa basketball team sa hayskol sa Auckland, New Zealand. Magkaribal sila. Kanunay silang magdula batok sa usag-usa sa kataposang mga bangga, ug kini dili maayo.
“Hatagan ko kamo og gamay nga impormasyon aron masabtan,” nag-ingon si Sister Tuala, “mogula kami sa korte nga may mga garas ug bun-og.”
Migahin og daghang oras si Sister Dil ug Sister Tuala sa pagbansay ug pagdula og basketball. “Ang basketball kaniadto mao ang among kinabuhi,” nagsulti si Sister Dil.
Human mogradwar sa hayskol, silang duha may pagbati nga nadasig sa pagserbisyo og misyon––bisan tuod ni usa kanila mibati nga may tinguha sa pagserbisyo kaniadto.
Paghimo sa Pagpili nga Moserbisyo
Alang ni Sister Tuala, kini nagkinahanglan og panahon sa pagpahiangay sa iyang kabubut-on ngadto sa kabubut-on sa Ginoo. “21 ako sa dihang akong gihimo ang desisyon sa paglihok diha sa pag-aghat,” nag-ingon siya. “Ako ingon og nakigbisog og maayo niini hangtod ako diha na sa eroplano.”
Miabot si Sister Tuala sa iyang misyon sa Australia atol sa COVID-19 nga pandemya, ug bisan tuod kini nahimong malisod, mapasalamaton kaayo siya nga mihukom siya sa pagserbisyo.
“Dili ako makahanduraw nga ako mao gihapon nga Sister Tuala sa dihang ako 21. Sa tinuod gibati ko gyod nga ako nausab.”
Si Sister Dil adunay usa ka “klaro ug direkta” nga pag-aghat sa pagserbisyo og misyon sa dihang nadawat niya ang iyang patriyarkal nga panalangin. Human sa pipila ka panahon, mihukom siya sa pagsunod sa pag-aghat sa pagserbisyo, tungod kay “ang pagbuot sa Ginoo sa kanunay mao ang husto nga paagi ug ang labing maayo nga kapilian.” Ang tawag miabot, ug nag-impake siya sa iyang mga sinina sa pagserbisyo sa Australia.
Pag-apil sa Samang Team … sa Layo
Tungod lang kay nagserbisyo si Sister Dil ug Sister Tuala sa samang misyon wala magpasabot nga mga managhigala na dayon sila. Human sa taas nga panahon nga magkaribal, sila si Sister Dil ug Sister Tuala sa gihapon adunay malisod nga panahon nga magkasinabot sa usag usa sa bisan unsa nga paagi pa.
Sa pagkatinuod, sa unang adlaw nga nakita ni Sister Tuala si Sister Dil, usa sa iyang unang mga hunahuna mao, “Ambot kon kinahanglan bang makagusto ko kaniya.”
Pagtapos sa Panag-away
Busa sa dihang si Sister Tuala ug si Siter Dil gi-assign sa pag-uban og serbisyo, kini sa tinuod katingad-an.
Ang duha adunay mga ideya mahitungod sa usag usa base sa giunsa nila pagdula diha sa basketball court. Ang matag usa mihunahuna nga ang usa agresibo, tigkompetensiya, ug maldita.
Apan ang sitwasyon misugod sa pagkausab samtang sila nakaila sa usag usa. Nakaamgo si Sister Dil nga si Sister Tuala mao ang “hingpit nga kaatbang” sa unsay iyang kanunay nga makita kaniya. “Siya sa tinuod usa ka mahigugmaon kaayo nga tawo––usa sa labing mahigugmaong mga kompanyon nga gikauban ko sa pagserbisyo, nag-ingon si Sister Dil.
Si Sister Tuala adunay susamang kasinatian. Wala niya maamgohi nga ang iyang mga pagbati sa pakig-indigay ngadto ni Sister Dil nahimong “maingon og dili tinuyo sa buot nga panagbangi” sa iyang kinabuhi.
Kadtong negatibong mga pagbati sa panagbangi ug paghukom nailisan uban sa gugma ug pagsinabtanay samtang siya misugod sa pagkakita kon kinsa gayod si Sister Dil. Ug bisan tuod nahunahuna ni Sister Tuala nga hilumon si Sister Dil, nakita niya nga si “Sister Dil makahimo sa pagtabi!”
Diha sa ilang bag-ong nakaplagan nga panaghigalaay, sila ni Sister Dil ug Sister Tuala nakaamgo nga tingali sila dili gayod diay managkaaway.
“Sa basketball ikaw nagtukod diha sa imong hunahuna niini nga ideya nga kinahanglan gayod kita modaog, ug ang matag lain nga team mao ang kaaway,” nag-ingon si Sister Dil. “Unya dayon mahuman ang basketball, ug imong maamgohan, ‘Oy, sila dili na mao ang kaaway. Sila tingali dili gayod sa tinuod ang kaaway.’”
Karon, sila ni Sister Dil ug Sister Tuala nakakita nga sila anaa sa samang “team”––ang team sa Dios.
Christ in the Midst [Si Kristo diha sa Taliwala], ni Judith A. Mehr
Ang Sakripisyo ni Jesukristo alang sa Tanan
Ang duha ka sister mibati sa kamot sa Dios diha sa ilang assignment isip mga kompanyon ug nahibalo nga ang gahom sa Pag-ula ni Jesukristo mitugot kanila sa pagsinati og pagkaayo ug pagkausab.
“Si Jesukristo mihimo niana nga sakripisyo aron tanan niini nga mga butang nga nahimong sayop sa milabay nga panahon mahimong mamaayo, mahimong husto, ug mahimong mas maayo,” nag-ingon si Sister Dil. “Makapasaylo kita. Makalimot kita. Makapadayon kita sa unahan, ug ang mga butang mausab.”
Wala lamang nga si Sister Tuala ug Sister Dil nag-ayo sa ilang panagbangi, apan sila usab nakakat-on kon unsaon pagtan-aw ang uban sama sa pagtan-aw sa Dios kanila.
“Ang pag-anhi dinhi ug nakahimo sa pagkakita sa akong kompanyon ug sa ubang mga tawo sa lahi nga pagtan-aw, ako nakaamgo nga ang istorya sa matag tawo importante,” nag-ingon si Sister Tuala. “Ug ang tanan nagkinahanglan sa Pag-ula ni Jesukristo.”
Nakat-onan nila nga bisan tuod kini mahimong lisod, kini posible alang sa duha ka tawo kinsa makausa nagtan-aw sa usag usa isip nga mga kaaway nga magkauban pinaagi sa gugma.
“Kini dili igsapayan kon pila ang imong edad o unsay imong kaliwatan,” nag-ingon si Sister Tuala, “o kon ikaw ba wala magtuo og Dios o relihiyoso.
“Kon ako makatrabaho kauban sa usa ka tawo kinsa wala gyod akoy maayong relasyon kaniya, ug kaming duha magkauban alang sa usa ka dakong katuyoan, niana ang ubang mga tawo makahimo usab.”