“Pikinini blong God,” Blong Ol Yut Oli Kam Strong, Septemba 2023.
Kam Folem Mi
Ol Pikinini blong God
Long plan blong God blong fasin blong glad, evri yang woman mo ol yang man oli gat tabu stamba tingting, oli lavem wanwan long yufala mo nidim yufala.
Traem pikjarem long maen blong yu se miusik bae i saon olsem wanem sapos evri tul blong miusik oli mekem semmak saon. ?Wanem bae i hapen sapos evri ki we oli plei long piano, oli mekem semmak saon? !Hemia bae i mekem miusik i nogud we!
Be i gud tumas se evri tul blong miusik mo evri kwaea oli gat defdefren voes mo saon. Ol ki long long wan piano oli givim plante miusik, mo ol kwaea oli givim naesfala toktok long wan miusik. Ol franis hon, ol tuba, ol dram, wanwan oli ademap wan spesel saon long miusik blong wan ogestra.
Ol Paoa mo Ol Talen
From, wetem miusik, Papa long Heven i glad long ol defren talen, ol fasin, mo ol eksperiens blong wanwan long ol pikinini blong Hem,evriwan oli ol pikinini boe o gel blong Hem we hem i lavem tumas. Wanem kaen situesen yu stap long hem, weaples yu stap long hem long medel blong ol nesen, ol famli mo ol pipol yu stap long wetem, Papa long Heven i selebretem wanem yu save mekem, huia yu kam tru long fasin blong obei, gladhat mo lav.
Wetem bigfala lav, Hem i invaetem yu blong faenemaot tabu aedentiti mo mekem i hapen tabu stamba tingting blong yu. Hem i leftemap tingting blong yu blong developem ol talen long saed blong spirit, fasin hemia olsem blong god, mo ol narafala samting we i save hapen. Mo Hem i givim wan janis evri dei blong lanem blong luk mo givim sevem long olgeta raon long yu olsem bae Jisas Kraes i mekem.
Long tabu plan blong God, yumi kam long wol ia tru long wan mama mo papa. Ol famli i nidim tugeta. Tugeta, olsem ol patna we i semmak, ol mama mo papa we i lukaot mo sapotem ol famli blong olgeta. Long ol hom blong yumi, ol papa mo ol hasban oli prisaed wetem fasin we i kaen, tingting i stap daon, mo lav we i no save finis—i nidim blong i gat ol man mo woman we i gat kwaliti ia blong stret mo gud fasin. Heven i stap krae, long eni rilesensip, we i gat abius, paoa ova long narawan, i eni kaen fasin blong tantanem tingting blong man o woman. Fasin blong leftemap tingting, fasin blong save wet longtaem, kaen fasin, mo save we i klin, oli ol fasin olsem hemia blong Kraes we yumi stap lukaotem.
I tru, nogat wan i stret evriwan—o iven famli blong hem. Wanem situesen yu stap long hem, givim ona long papa mo mama blong yu mo lavem famli blong yu—famli blong yu we yu gat mo famli we bae yu gat wan dei. Sevya blong yumi i save helpem yu andastanem, fogivim mo leftemap tingting blong olgeta raon long yu. Taem yu mekem bes blong yuwan, Lod bae i helpem mo lidim yu. Plis tingbaot wea ples yu stanap long hem bifo long Lod mo long Jos blong Hem i soemaot tru long fasin blong yuwan mo stret mo gud fasin blong kipim olgeta kavenan blong yu wetem God.
Prishud mo Plan blong God
God i lavem yumi moa, mo i save yumi moa gud bitim we yumi lavem o save yumiwan bakegen. Prishud atoriti blong Hem i givim blong blesem evriwan long ol pikinini blong Hem. Ol brata we oli klin inaf oli gat prishud, be oli no prishud ia. Presiden Russell M. Nelson i tijim se prishud “i impoten tu long [ol woman] semmak long ol man.” Prishud i givim long ol woman mo man “akses long … ol presen we Lod i gat blong ol pikinini blong Hem.”1
Stap Givim Seves Tugeta
Insaed long Jos blong Lod, yumi kaonsel tugeta long wan kaonsel miting taem yumi givim seves tugeta. Long ol kaonsel miting blong yumi, ol lida oli lukaotem ol tingting mo aedia blong evriwan, we i tekem tu hemia blong ol yang woman mo ol yang man. Ol man mo ol woman oli mekem ol moa gud desisen, mo oli gat moa bigfala sakses long seves blong Lod taem oli luk se hamas wanwan kontribusen blong olgeta i impoten mo oli wok tugeta.
Long ol wod mo ol branj blong yumi, ol yang woman mo ol yang man oli lidim ol klas mo ol kworom. Long wod yut kaonsel, ol yut lida tugeta oli helpem wanwan yut blong i konek wetem heven, ol lida blong Jos, mo ol narafala yut. Olsem ol givhan kompanion long ol adalt, ol yang man mo ol yang woman oli go aot blong blesem plante. Long seves blong yumi, yumi evriwan i stanap tugeta.
Hem i wan blesing we ol yang man mo woman oli givim seves olsem wan witnes blong ol gospel odinens blong gospel. Yufala i olwitnes blong baptaes, tugeta blong olgeta we oli laef mo baptaes blong ol bubu we oli ded. Yu givim seves long ol narafala ples long haos blong Lod tu.
Ol Kavenan Blesing wetem God
Wanwan long yumi, yang woman mo yang man i mekem tabu kavenan wetem God. Taem yumi givim ona, ol kavenan blong yumi wetem God i karem ol blesing blong Hem i kam—i bigwan we yumi save pikjarem. Ol kavenan blong yumi wetem God i save mekem i tabu ol tingting mo aksen blong yumi. Ol kavenan blong yumi mo Atonmen blong Kraes i save helpem yumi kam olsem pikinini blong God—tingting i stap daon, save wet longtaem, i fulap wetem lav (luk long Mosaea 3:19). Long evri samting we yumi mekem, i stat wetem Kraes. Yumi jusum Hem faswan long medel blong plante joes blong yumi, mo yumi putum hem faswan long ol joes we yumi mekem.
Lukluk long Sevya.
Yu yu save kasem eksperiens long ol hapi filing long hat blong yu taem we yu putum Jisas Kraes long senta blong stap lanem gospel, givim seves, ol aktiviti mo ol divelopmen blong yuwan mo taem yu jusum gud. Efot blong yu blong putum Kraes i stap long i senta, i save kam wan samtitng we i givim glad mo i wan blesing taem yu helpem ol narafalawan wetem sore mo lav.
Plante gudfala samting i hapen taem ol yang man mo woman oli lavem Lod mo givim sevem tugeta long yuniti mo pis. Hemia i tru taem blong seminari, ol yut aktiviti,mo BYS.
Wetem lav we i no gat en, Papa long Heven i invaetem evri yang woman mo ol yang man “blong kam long Hem mo tekpat long gud fasin blong Hem; mo Hem i no tanem baksaed blong Hem long eniwan we i kam long Hem.”(2 Nifae 26:33).
!Papa long Heven mo Jisas Kraes i lavem yu! Olgeta bae Oli helpem mo blesem yu stap hapi tru. Plis jusum Sevya Jisas Kraes faswan. Trastem God mo stap wan long Jisas Kraes wetem olgeta raon long yu. Olsem wan pikinini blong God, yu save konek mo stap pat long komuniti blong Ol Sent we hem i Jos Ia blong Hem we i bin kambak—Jos Ia blong Jisas Kraes blong Ol Lata-dei Sent. Huia yu mo wanem yu stap kam olsem, oli nidim long wol tedei. Wanem spesel samting yu save mekem long famli blong yu long Jos blong Hem we i kambak finis mo long wol.
Long Jisas Kraes, evri samting we i gud i posibol. Long Jisas Kraes, evri samting we i tru bae oli hapen, long taem mo wei blong God. Olsem wan spesel witnes blong Hem, mi testifae mo promes.