“3 Lesen long taem we Josef Smit i Yangfala,” Blong Ol Yut Oli Kam Strong, Septemba 2023.
3 Lesen long taem we Josef Smit i Yangfala
Lukluk long wanem yu save lanem long eksperiens blong Profet 200 yia i pas.
?Yu bin filim se i had blong yu putum yuwan long ples blong ol pipol blong bifo? Olgeta oli laef longtaem finis—?bae olgeta i rili save tijim yu abaot eni samting abaot laef? !Yes! Josef Smit i wan gudfala eksampol. Taem hem i bin gat 18 yia, hem i lanem sam samting abaot blong karem ol ansa tru long prea mo rilesensip blong hem wetem Papa long Heven. Olgeta lesen ia oli save helpem yu tedei.
Lesen #1: Samtaem i tekem taem blong karem ol ansa.
Ol ansa long ol prea oli no kam kwik taem. Blong stap wet i no isi—speseli taem ol kwik ansa oli stap long intanet long evri kwestin.
Sapos yu filim se i tekem longtaem blong God i ansarem yu, yu no stap yuwan. Josef Smit i gat 12 yia taem we hem i stat blong tingting abaot “ol impoten samting long laef blong hem.”1 Hem i faet wetem ol kwestin abaot olsem wanem hem i klin mo ol rabis fasin blong wol blong nekis tu yia. I tekem hem tu yia blong tingting hevi, stadi olgeta skripja mo wok tru long ol kwestin ia bifo God mo Jisas Kraes i kamaot long hem long Tabu Bus.
Hem i semmak long yumi. Tem yumi gat wan kwestin, maet bae i tekem dei, manis o iven yia bifo yumi gat ol ansa. Mo hemia i oraet nomo. Wok we yumi putum blong wet i impoten. Tingbaot wanem Elda Jeffrey R. Holland blong Kworom blong Olgeta Twelef Aposol i tijim: “Sid ia yumi mas lukaotem gud mo wet blong i kam bigwan.”2
Lesen #2: Hem i save nem blong yumi.
Bifo hem i gat 18 yia, God Papa. Jisas Kraes. Mo enjel Moronae oli visitim hem. !Hemia i gud tumas! Mo ol tabu man ia oli save nem blong Josef. !Oli save gud hem!
God i save gud yu tu. Yu yu pikinini blong Hem mo hem i save nem blong yu. God i tijim trutok ia abaot kriesen blong Hem: “Mo i gat plante we oli stanap naoia, mo namba blong olgeta, man i no save kaontem; be mi kaontem evri samting, from se oli blong mi, mo mi mi save olgeta” (Moses 1:35).
Pat long risen from wanem Josef i gat strong tingting blong mekem wanem oli askem hem blong mekem hem i from hem i andastanem se hem pikinini blong God, we i save gud hem.
Lesen #3: Taem yumi sakem sin, yumi openem yumiwan long ol eksperiens long saed blong spirit.
Wan long ol bigfala tingting blong Josef i blong oli fogivim hem long ol sin blong hem. Long semmak risen hem i prea long naet we enjel Moronae i kamaot long hem: “blong kasem fogivnes from ol sin mo ol rong blong mi,” (Josef Smith—Histri 1:29). Hemia i tijim mi tu samting:
Faswan, sapos yumi mekem ol mistek, yumi no tingting se yumi no klin inaf blong prea. Josef i mekem “sin mo rong samting,” be yet hem i save se hem i save prea blong askem fogivnes.
Nambatu, taem yumi sakem sin, yumi filim Spirit i moa strong. Olsem we Elda Jörg Klebingat blong Olgeta Seventi i eksplenem, “Strong tingting long saed blong spirit i kam moa antap taem yu volontia mo wetem glad hat yu sakem ol sin blong yu.”3
Presiden Russell M. Nelson i tijim se blong sakem sin i helpem yumi kam moa olsem Sevya. Taem yumi stap sakem sin, yumi openem ol doa blong heven. “Yumi jusum blong gro long spirit mo kasem glad—glad long fasin blong pemaot man, tru long Hem.”8
Sapos yu nid blong sakem sin long wan samting, !yu mekem! Bae i no karem pis kam long yu mo bae i helpem yu kam moa olsem Sevya, be bae i helpem yu filim Spirit i kam moa strong mo kasem ol ansa long ol prea.
Josef Smit maet i laef long taem finis, be ol lesen we hem i lanem olsem wan yangfala boe i save helpem yu tedei. Hem i wan narafala risen blong yumi talem tangkyu long Profet Josef Smit.