“Wan Taem blong Danis,” Blong Ol Yut Oli Kam Strong., Septemba 2023.
Wan Taem blong Danis
Ol yut ia oli faenem glad taem oli winim ol fraet blong olgeta mo serem ol talen blong olgeta wetem ol narafalawan.
Foto i kam long Cristy Powell
Emo’onahe Y. mo Jax C. tufala i gat wan samting we i semmak: tufala tugeta i stap danis long sam long ol BYS konfrens so long Provo, Yuta.
Danis yuwan long fored blong taosen blong ol yut i no isi long tufala. Be taem oli stap lukaotem blong developem mo serem ol talen blong olgeta, olgeta oli kasem revelesen mo oli kam antap long ol wei we i helpem olgeta “i kam moa olsem Jisas Kraes, mo mekem [olgetawan], nara pipol, mo iven wol ia, i kam gud moa ” (Divelopmen blong Yuwan: Gaedbuk blong Ol Yut [2019], 1).
Danis wetem hup Emo’onahe
Emo’onahe (eh-moh-oh-nah) i disaed blong serem talen blong hem blong danis wetem hup, we i pat blong kalja blong hem we i blong Amerika blong bifo. “Wan long ol fren blong mi we i go long BYS bifo mi, i talem long mi se oli gat wan talen so mo mi mas tekpat long hem.
“Mi bin fraet smol, mekem se mi traem blong no lukluk nomo long fulap man ia.” !Be i had smol blong mekem hemia! Hem i talem, “Mi save harem evriwan i mekem plante noes.” “!Oli mekem tumas noes nao mi nomo save harem miusik, mekem se mi no save folem bit blong miusik!”
Emo’onahe i wok had blong kam gud long danis blong hup. Hem i talem, “I tekem taem blong mi danis gud.” Be taem hem i praktis moa, hem i lanem moa abaot hemwan.
I Gud blong Talem Stori
Hup danis i wan wei blong talem wan stori blong yuwan. “Yu statem wetem wan hup we i soem stat blong yu, mo yu gohed blong ademap ol hup blong soem moa samting abaot laef blong yu. Emo’onahe i talem, long danis blong mi yu save luk wan bataflae, wan igel, mo wan kaoboe.” “Taem mi stap talem stori blong mi, mi filim se mi stap talem stori blong olgeta we mi lan long olgeta mo ol eksperiens we mi bin gat.
Emo’onahe i kam long ol traeb blong Shaian mo Arapaho long Oklahoma, mo tu hem i blong Fot Pek Su mo Assinapoen. Hem i talem, “Bifo mi stap filim se mi defren long evriwan,” mo samtaem, “hemia i mekem mi no filim gud.” Be hup danis i soemaot wanwan man mo woman. Wanwan man woman we i danis i mekemap danis blong hemwan, hem i talem, “hemia nao i mekem wan i spesel mo hem i blong yu nomo.”
Talen I Save Mekem I Kam Strong Moa
Emo’onahei filim se hem i stap kolosap moa long God taem hem i prea, ridim olgeta skripja mo traehad blong folem Jisas Kraes. Hem i filim kolosap long God taem hem i traehad blong mekem ol talen blong hem i kam moa gud. “Taem mi pikimap ol hup blong mi blong danis, mi save filim glad.” Hem i talem: “Faenem ol samting we yu lavem mo faenem ol gudfala pipol we bae i helpem yu blong yu save yusum ol talen blong yu blong mekem yu kam strong moa mo ol narawan. Givim seves long ol narawan i save help yu mekem testemoni blong yu long Jisas Kraes i kam strong moa tu.”
Danis blong Iris wetem Jax
Jax i fraet tumas blong soem talen blong hem we i danis blong ol man Iris, long talen so blong BYKS. “Mi bin fraet tumas.” Hem i talem, “I olsem we mi stap insaed long wan hol we i fulap long ol snek .” Mi talem wan prea bifo mi go antap. “Taem miusik i stat mi fraet yet. Mi mekem olsem we i nogat wan man i stap. Mo mi stat blong danis.”
Jax i hop mo i muvum ol leg blong hem long tradisen wei blong ol Man Iris. Wetem glad fes blong Jax, plante man bae oli no luk hadwok blong hem.
Developem wan Talen blong Manejem Wari
Jax i talem se, “long 2020 mi wari tumas mo mi stap tingting blong tekemaot laef blong mi.” “Mi bin stap long hospital blong tingting blong wan manis. Mi faenemaot se mi bren blong mi i solap mo mi faenemaot tu se mi mi otostik. Hem i had tumas.”
Taem Jax i kasem tritmen from sik long tingting, mami blong hem i leftemap tingting blong hem blong faenem wan samting blong manejem wari blong hem. Hem i disaed blong lukaotem revelesen blong hemwan long wanem hem i save mekem.
“Mi prea from mo askem help blong Lod,” hem i talem. “Mo tingbaot se anti blong i stap tijim Iris danis. Mekem mi statem klas bifo Krismes we hem i bigfala so blong mifala. Mi lanem faef danis long wan wik, mekem se bae hem i gud tumas.” Afta hemia, Iris danis i kam wan bigfala blesing long laef blong hem. “I rili katemdaon ol wari blong hem mo ol rabis tingting,” Hem i talem
Stap Serem Talen blong Hem
Long BYS, kampani blong Jax i askem hem sapos hem i gat wan talen blong soem long talen so blong olgeta. Mekem se i danis long saed blong rod blong olgeta. Taem oli talem long hem blong hem i danis, fas samting we Jax i tingting long hem i, “O no” Be hem i disaed blong serem talen blong hem iven we hem i fraet.
Naoia we Jax i luk ol vidio blong hem i stap danis long BYS, hem i jes laf nomo. “Hem i se fes blong mi i strong nomo log fas pat,” hem i talem. “Be taem ol pipol oli stat blong singsingaot, mi stat blong smael.”
Blong ol yut we oli stap traehad, hemia i advaes blong Jax: “Hem i moa gud blong toktok long wan man bitim we hemia blong yu haedem olsem we mi bin mekem. Lod i save huia yu, mo bae Hem i stap from yu. God i wantem blong helpem yu.”
Antap long evri samting, Jax i filim se blong lanem danis blong ol man Iris i wan blesing blong Papa long heven.
Yu Yu Spesel
Yu neva save—taem yu tanem yu go long Lod, mebi bae yu kasem insperesen ia blong developem wan niu talen tu.
Olsem Emo’onage mo Jax, Tabu Spirit bae i save helpem yu luksave ol talen ia. Taem yu stap developem ol talen ia mo serem olgeta, yu save faenem help taem yu stap traehad blong kam moa olsem Sevya.
?Wanem ol talen yu save developem mo serem?