“?Yu Yu Filim Se Yu Taed, Wari, o Harem Nogud?” Blong Ol Yut Oli Kam Strong, Septemba 2023.
Laef Help
?Yu Yu Filim Se Yu Taed, Wari, o Harem Nogud?
Hemia sam samting we yu save mekem.
Tes blong Taet.
?Yu filim se yu harem nogud o taed olsem wanem?
Sapos yu filim se yu no save mekem wan samting, yu seksek, o yu stap wari long taem finis i kam, plis lukaotem help taem yu storian wetem wan adalt we yu trastem. Yu traem sam long ol tingting ia long yelo seksen (!speseli ol besik!), be samtaem yu maet nidim moa help, mo hemia i Oraet nomo.
Sapos yu filim se yu yu gat tingting ia blong tekemaot laef blong yu, askem help kwik taem. Kontaktem lokol imejensi help laen, polis dipatmen o hospital.
Hem i nomol blong filim wari, harem nogud, o taed samtaem. Ol filing ia oli kam taem yumi fesem ol jalenj we i kam mo go taem laef blong yumi i stap jenis. !Traem sam long ol tingting ia we bae i save help!
Ol Besik Samting
-
Tanem yu go long Papa long Heven. Hem i harem mo ansarem ol prea blong yu. Bae Hem i helpem yu long ol jalenj we bae yu fesem.
-
Lukluk Nomo long Kraes “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.1
-
Givim Seves long Ol Narafala Man “Taem we yumi putum yumiwan long seves blong ol narafalawan, yumi faenem laef blong yumiwan mo fasin blong stap glad blong yumiwan.”2
-
Kipim spirit blong yu i helti. Ridim olgeta skripja evri dei, go long tempol taem we i posibol, tekem pat long sakramen, kipim ol kavenan blong yu, mo sakem sin evri dei. Askem prishud blesing taem yu nidim wan.
-
Kipim bodi blong yu i helti. Gat wan gudfala silip, mo obei long Tok blong Waes.
Sapos Yu Filim se Yu Stap Wari Tumas
-
Lukluk long hemia naoia. Bae i no help nating blong wari abaot fiuja o blong harem nogud from ol samting we i pas finis. Ol samting blong naoia nao yu save jenisim.
-
Tekem taem blong spel. “From i no gat nid blong wan man i ron moa kwik bitim paoa we hem i gat” (Mosaea 4:27).
-
Tingting long ol gudfala samting. Ol nogud filing i save mekem nogud tingting i kam. Ol gudfala tingting i save helpem yu no fraet tumas o wari.
Sapos Yu Stap Harem Nogud
-
Yu mas save se ol had taem oli pat blong plan ia. Blong stap go tru long ol had taem i no minim se yu stap mekem ol samting i rong. Trastem se Papa long Heven bae i mekem yu kam strong moa mo se ol jalenj bae oli wok tugeta blong gud blong yu (Doktrin mo Ol Kavenan 90:24; luk tu long Rom 8:28; Doktrin mo Ol Kavenan 122: 5–9).
-
Lukluk nomo long fasin blong talem tangkyu. Raetemdaon ol samting we yu glad long hem evri dei mo tu mekemsua se yu talem tangkyu long Papa long Heven (luk long Doktrin mo Ol Kavenan 98:1).
-
Mekem ol samting we yu laekem blong mekem. Spendem taem wetem ol fren mo famli, traem mekem wan niu samting, lisin long ol miusik we i leftemap tingting, o mekem plan blong gat wan naesfala aktiviti.
Sapos Yu Filim Se Yu No Gud Inaf
-
Yu mas save se yu no nid blong yu kam stret evriwan. “Long wol ia blong kam stret evriwan i stap gohed yet.’”3 No komperem yu wetem ol narafala wan, long laef ia o long sosol media.
-
Toktok kaen long yuwan. Stap kaen long yuwan, olsem we bae yu mekem long wan fren. Tabu Spirit bae i toktok gud long yu mo bae i neva jikim yu o putum yu daon.
-
Yu mas save se Sevya i mekem hemia i defren. Jisas Kraes i bin safa from ol sin mo ol hadtaem blong yumi blong mekem se Hem i save olsem wanem blong helpem yumi (luk long Alma 7:11–12). Sapos yumi putum tingting i stap daon, Hem i promesem blong mekem“ol samting ia we oli no strong long olgeta, bae mi mekem olgeta oli winim mo kam strong long olgeta.” (Ita 12:27). Bae yumi no gud inaf long yumiwan, be yumi save stap gud wetem Hem.
Las Toktok
I gat plante dei we yu filim se yu gat strong tingting mo rere blong fesem ol jalenj blong laef. No mata olsem wanem yu filim gud, mekem sua se yu gohed blong mekem ol besik samting.
Prea long Papa long Heven—iven sapos laef hem i isi. Lukluk nomo long wanem Sevya i mekem blong yu mo long laef blong Hem mo ol tijing blong Hem—iven sapos ol samting i stap gohed gud. Mekem se taem yu eksperiensem ol had filing, yu yu rere gud moa blong fesem olgeta.