“4 Wei blong Mekem Famli blong Yu I Kam Strong Moa,” Blong Ol Yut Oli Kam Strong, Oktoba 2023.
4 Wei blong Mekem Famli blong Yu I Kam Strong Moa
Yu save mekem famli blong yu i kam strong moa mo i kam moa gud olsem we i save, taem yufala i stap laef folem gospel blong Jisas Kraes.
Nomata hamas we famli blong yu strong, oltaem hem i save kasem smol moa paoa. Long ol dei blong tedei, i luk olsem evri taem ol samting i stap spolem ol famli. Hemia i from Setan i save se ol famli oli stamba blong plan blong Papa long Heven. Sapos i gat eni samting we enemi i save mekem blong spolem laef blong famli, i sua se bae hem i traem.
Nomata se i nogat wan famli i stret evriwan, famli blong yu i gat wan samting we i mekem i stap go gud, we i nogat wan nara famli i gat: !hem i yu! Mo yu gat gospel blong Jisas Kraes long saed blong yu. Ol profet mo ol aposol oli bin tijim, “Hapines i save tekem ples insaed long laef blong famle nomo taem yumi stap folem ol tijing blong Lod Jisas Kraes.”1
Hemia sam wei we gospel blong Lod i save mekem famli blong yu i strong mo karem hapines i kam:
-
Ol famli oli save sil blong taem we i no save finis.
-
Ol famli oli save gat gud taem tugeta, givim seves long olgeta wanwan, mo filim se oli pat mo gat wan filing blong tabu aedentiti.
-
Ol famli oli save dipen long paoa blong Jisas Kraes blong stretem ol tingting we oli no andastanem, ol raorao, mo ol jalenj tru long fasin blong sakem sin, fogivnes, mo fet.
Hemia fo wei we yu save mekem famli blong yu i kam strong taem yu stap laef folem gospel:
Ol pikja droing i kam long Lai T. Sheng
1 Leftemap Tingting blong Prea
Ol famli oli save kam moa strong taem oli prea tugeta. Prea i save blesem famli blong yu wetem pis, lav, mo fasin blong stap tugeta. Sapos prea i no wan samting we yufala i stap mekem evri dei long famli blong yu, prea blong save olsem wanem yu save helpem famli blong yu blong stap prea tugeta. Stap rere blong mekem aksen folem ol ansa we yu kasem.
2 Go long Jos Tugeta
Long jos yumi lanem abaot gospel blong Jisas Kraes. Yumi tekem sakramen tu mo mekem kavenan wetem God se yumi wantem blong tekem long yumiwan, nem blong Jisas Kraes mo oltaem tingbaot Hem (luk long Mosaea 18:8–10; Doktrin mo Ol Kavenan 20:77, 79).
Blong stap go long jos olsem wan famli, i help blong karem evriwan i kam moa kolosap long God mo long wanwan long yufala. I nidim komitmen blong stap go evri wik, be God bae i blesem ol traehad blong yu. Sapos famli blong yu i jusum blong no go long jos wetem yu, plis save se atendens blong yu bae i mekem yu kam strong moa mo helpem yu blong faenem ol nara wei blong yu mekem famli blong yu i kam strong moa.
3 Lavem mo Givim Seves
Sevya i tijim se, “Lavlavem yufala, olsem we mi mi lavem yufala” (Jon 15:12). Talem long famli blong yu hamas yu lavem olgeta—nomata sapos yu sua se oli save finis. Blong stap soem lav blong yu long famli blong yu tru long toktok mo aksen, i invaetem Spirit i kam insaed long hom blong yu.
Blong stap givim seves long ol memba blong famli blong yu, i wan impoten wei blong soem lav blong yu. Mo blong stap givim seves long ol narawan tugeta tu, i karem famli blong yu i kam kolosap moa long yufala wanwan mo long Papa long Heven. Yu no nid blong oganaesem wan bigfala seves projek. Seves i save simpol nomo olsem blong redi long fevret kaekae blong wan neba. Blong stap givim seves olsem wan famli i karem glad i kam from, olsem we yumi ridim long ol skripja, “Taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17).
4 Laef folem Gospel
Plante famli oli gat ol memba we oli no ol memba blong Jos, o oli jusum blong stop go long jos. I save had blong tekpat long jos taem i nogat sapot blong famli. Sapos famli blong yu i stap long wan situesen olsem, tingbaot se yu save gohed yet blong stap olsem wan gudfala paoa taem yu laef folem gospel.
Letem famli blong yu i luk yu laef folem wanem we yu biliv long hem. Yu neva save taem oli stap wajem wanem yu stap talem mo mekem. Hemia bae i karem laet blong gospel i kam long famli blong yu. Nomata long situesen blong famli blong yu, ol traehad blong yu blong stap laef folem gospel, i save openem ol doa blong Spirit i gaedem, givim paoa, mo leftemap famli blong yu mo helpem olgeta blong kam moa kolosap long Sevya, Jisas Kraes.