“Olsem Wanem Nao Bae Yu Rere from Jeneral Konfrens,” Blong Ol Yut Oli Kam Strong, Septemba 2023.
Stap Rere from Jeneral Konfrens
?Olsem wanem nao bae yu rere from Jeneral Konfrens?
Olgeta yangfala ia oli lanem plante samting aot long jeneral konfrens. ?Olsem wanem nao yu save rere blong gat wan eksperiens we i gat bigfala mining?
Mi Wantem blong Folem Profet
Mi rere miwan blong Oktoba 2022 jeneral konfrens taem mi ridim abaot Atonmen blong Jisas Kraes insaed long Buk blong Momon mo long OlTesteman
Long taem blong konfrens, Presiden Russell M. Nelson i toktok long yumi mo i testifae abaot olsem wanem tempol i impoten.1 Insaed long tempol, ol blesing we i no save finis oli bin promesem, mo yumi bin filim wan naesfala spirit taem yu go long ples ia.
I nogat wan tempol yet long Nikaragwa, be oli bin anaonsem wan finis. Mi hop se mi save folem toktok blong Presiden Nelson mo go insaed long tempol taem i finis.
Taem mi stap wajem konfrens, mi filim Spirit i testifae se mi stap long raet ples. Mi filim se hat blong mi i fulap wetem lav blong God.
Carlos M., Nikaragwa
Hiling I Stap blong Evriwan
Bifo jeneral konfrens long Oktoba 2022, mi luklukbak long ol samting we i jes hapen long laef blong mi. Plante samting i stap long maen blong mi bifo konfrens, mo mi wantem filim kamfot, pis mo paoa.
Long taem blong konfrens, Elda Quentin L. Cook blong Kworom blong Olgeta Twelef Aposol i talem, “ From se Atonmen blong Sevya, hiling i stap blong evriwan.”2
Ol toktok ia i givim pis mo hop long mi. Tru long Atonmen blong Jisas Kraes, taem mi mekem mistek mo ol rong joes, mi save kasem fogivnes mo filim pis. Mo wanem kaen harem nogud we mi stap filim, mi save kam gud bakegen. Evriwan long yumi i filim semmak pis mo hiling taem yumi sakem sin mo traehad blong kam gud evri dei.
Kaye D., Philippines
Rere blong Konfrens blong Yu
Tekem wan minit blong rere from konfrens, mo bae yu gat wan gudfala eksperiens. So, ?olsem wanem nao bae yu rere? !Stat blong raetemdaon ol kwestin blong yu! Tingting hevi long ol kwestin blong yu taem yu stap wajem konfrens, mo bae yu sapraes olsem wanem ol spika i stap toktok stret i kam long yu.