“I kam long Ol Leta mo i go long Ol Laef Strim,” Blong Ol Yut Oli Kam Strong, Ogis, 2023.

Stap Rere from Jeneral Konfrens

I kam long Ol Buk mo i go long Ol Laef Strim

I Kam long David A. Edwards

Ol Magasin blong Jos

Komunikesen we i kam long ol lida blong Jos i kam longwe, be stamba tingting blong hem i stap semmak.

Pikja

Pol i stap raetem wan leta

Kolosap 2000 Yia I Pas

Taem Hem i stap long wol ia, Jisas Kraes i oganaesem Jos blong Hem. Afta we Sevya i laef bakegen mo i gobak antap long heven, Ol Aposol blong Hem oli lidim Jos wetem atoriti mo revelesen, mo insperesen we Hem i bin givim long olgeta.

Long ol dei ia, ol lida blong Jos oli toktok wetem ol memba blong Jos long plante defren ples tru long ol leta.

Niu Testeman i gat ol leta we Pol, Pita, Jemes, mo Jon oli raetem. Ol leta ia oli raetem long han, oli givimaot long han, oli kopi tru long han mo oli ridim.

Ol Jos lida ia oltaem oli gat semmak stamba tingting blong raetem ol leta ia. Oli lukaotem blong:

Serem testemoni mo tijim gospel blong Jisas Kraes.
Leftemap tingting, givim insperesen mo mekem oli glad.
Rimaenem yumi long ol komanmen mo ol kavenan.
Luksave ol jalenj we i stap.
Givim woning long ol denja.
Stretem eni mistek we i kam insaed long Jos.
Mekem Jos i kam wan.

Pikja

Russell M. Nelson

Tedei

Lukluk i kambak 2000 yia afta mo bae yu luk i gat fulap samting i jenis, be sam samting i stap semmak.

Jisas Kraes i putumbak Jos blong Hem i kambak long wol ia mo i gat bakegen ol profet mo ol aposol blong oli lidim. Be long taem blong ol leta, komunikesen blong teknoloji i kam antap plante—blong oli printim, afta i go long redio, afta i go long televisen, afta i go long intanet.

Ol lida blong Jos naoia oli save givim mesej long jeneral konfrens blong ful Jos i lukluk long semtaem. Iven oli sendem i go tru long satelaet mo laef strim onlaen long sam lanwis long sem taem. Afta sam dei, ol teks oli postem onlaen blong sam lanwis, mo oli printim blong sendem i go long Jos raon long wol.

Taem yu stap rere from konfrens we i stap kam maet bae yu tingting bak i go long olgeta leta blong Niu Testeman. Long taem ia oli defren, mo teknoloji oli defren tumas. Be ol mesej blong konfrens oli mekem i hapen ol semmak impoten stamba tingting. Taem yu stap eksperiensem ol mesej blong konfrens, maet yu wantem tingbaot olsem wanem olgeta oli:

Serem testemoni mo tijim gospel blong Jisas Kraes.
Leftemap, givim insperesen mo mekem oli glad.
Rimaenem yumi long ol komanmen mo ol kavenan.
Luksave ol jalenj we i stap.
Givim woning long ol denja.
Stretem eni mistek we i kam insaed long Jos.
Mekem Jos i kam wan.