Daulomani ni Kalou

Dua na iTukutuku mai vei Elder Dieter F. Uchtdorf

Ena Kuoramu ni iApositolo Le Tinikarua

iVakatakilakila

Gerrit W. Gong

Ena ituvatuva ni marau ni Kalou, sa tiko na inaki vakalou me baleti kemuni yadua na goneyalewa kei na cauravou, oi kemuni yadua o ni sa lomani ka gadrevi.

iVakatakilakila

Elder Gong kei ira na itabagone

Raitayaloyalotaka mada se na vakacava tu beka na ivakatagi kevaka era rogorogo vata tu ga na iyaya ni vakatagi taucoko. Vakacava ke tautauvata na rorogo ni ki kece ena piano se mera tautauvata na domo kecega ena dua na matasere? Oqo ena vakavuna me vakavucesa dina sara na ivakatagi!

E ka ni marau ni iyaya taucoko ni vakatagi kei na matasere e duidui na kena rorogo kei na irogorogo ni domo. Na ki kece ena piano e vuqa na kena rorogo, kei na matasere era vakarautaka na veitamela vutuniyau. Na davui ni Varanise, na tubas, vaiolini, kei na dramu e duidui na rorogo era solia ki na dua na mataivakatagi.

Kaukauwa kei na iSolisoli

Me vaka na sereivakatagi, e marautaka na Tamada Vakalomalagi na nodra taledi, nodra ivakarau ni bula, kei na veika era sotava na Luvena yadua, o ira yadua na luvena yalewa se tagane lomani. Se cava ga na kemu ituvaki, se vanua cava ga o tiko kina ena kedra maliwa na veimatanitu, veimataqali, kei na tamata, e marautaka na Tamada Vakalomalagi na kemu icavacava tawayalani, ona rawa ni vakataki cei ena talairawarawa, loloma soliwale, kei na loloma.

iVakatakilakila

taba piano livaliva tiko na cauravou

Ena loloma cecere, sa sureti kemuni o Koya mo ni kunea na kemuni ivakatakilakila vakalou ka vakavotukanataka na kemu inaki vakalou. E vakayaloqaqataki iko o Koya mo vakatoroicaketaka na nomu isolisoli vakayalo, na nomu itovonibula vakalou, kei na vakaitamera ni ka e rawa ni rawati. Ka sa solia vei iko o Koya na madigi ni veisiga mo vulica mo raica ka qaravi ira era tu wavoliti iko me vakaga ena vakayacora o Jisu Karisito.

Ena ituvatuva vakalou ni Kalou, eda tadu mai ki na vuravura oqo mai vua e dua na tina kei na tama. Na matavuvale e gadreva ruarua. Vakatautauvata, na itubutubu era veisusugi ka vakarautaka na veika e baleta na nodra matavuvale. Ena noda itikotiko, na tama kei na tagane vakawati era vakatulewa ena ivalavala malumu, yalomalua, kei na loloma e sega ni veivakaisini—na bula dodonu era na gadreva na turaga kei na marama ena noda veimaliwai taucoko. Ena tagi ko lomalagi kevaka, ena dua na loma ni veimaliwai, sa tiko kina na veivakalolomataki, lewa kaukauwa, se veivakasaurarataki ena kena veimataqali kecega, mai vei ira na tagane se yalewa. Na veivakauqeti, vosota vakadede, yalovinaka, kei na kila savasava sa ikoya na itovonibula va-Karisito eda vakasaqara vakayadua.

E dina sara, e sega ni dua e vinaka sara—ka vakakina talega kina e dua na matavuvale. Se cava ga na nomu ituvaki, rokovi rau na nomu itubutubu ka lomana na nomu matavuvale—na nomu matavuvale ena gauna oqo kei na matavuvale o na qai tekivutaka ena dua na siga. Na noda iVakabula e rawa ni vukei iko mo kila tudei, mo veivosoti, ka vakayaloqaqataki ira era tu wavoliti iko. Ni o vakayacora na nomu vinaka duadua, ena vukei iko ka dusimaki iko na Turaga. Yalovinaka ni nanuma tiko na nomuni itutu e mata ni Turaga kei na Nona Lotu ena vakatau mai na nomuni itovonibula kei na buladodonu ena nomuni maroroya na nomuni veiyalayalati kei na Kalou.

iVakatakilakila

sakaramede

Na Matabete kei na iTuvatuva ni Kalou

Sa lomani keda vakalevu sara na Kalou na Tamada Vakalomalagi, ka sa kilai keda vakavinaka cake mai na noda lomani keda se kilai keda vakaikeda. Na Nona lewa vaka matabete e soli me vakalougatataki ira taucoko na Luvena. Era taura tu na matabete na turaga bula kilikili, ia era sega ni matabete. E vakatavulica o Peresitedi Russell M. Nelson ni matabete “esa ka bibi sara vei ira na [yalewa] me vaka ga vua e dua na tagane.” Na matabete e solia vei ira na marama kei na turaga “me ra rawata … na iyau talei kece sara vakayalo sa vakarautaka tu na Turaga vei ira na Luvena.”¹

iVakatakilakila

ira na cauravou kei na goneyalewa ena komipiuta

Veiqaravi Vata

Ena Lotu ni Turaga, eda veivakasalataki ena bose ni da veiqaravi vata. Ena noda matabose, era na vakasaqara na iliuliu na veivakararamataki kei na vakasama mai vei ira yadua, ka oka kina na goneyalewa kei na cauravou. Ena veigauna yadua, eda na tauca na vakatulewa vinaka ka gugumatua cake ena veiqaravi ni Turaga ni da vakamareqeta na noda dui cau ka cakacaka vata, vaka veitacini kei na veiganeni ena Nona cakacaka.

Ena noda tabanalevu kei na tabana, era na liutaka na kalasi kei na kuoramu na goneyalewa kei na cauravou. Ena matabose ni itabagone ni tabanalevu, o ira na noda iliuliu ni itabagone era na vukei ira na itabagone yadua me ra semati ki lomalagi, ki vei ira na noda iliuliu ni Lotu, kei ira na itabagone tale eso. Nira itokani dauveiqaravi vei ira na qase, era sa dodoliga yani na noda cauravou kei na goneyalewa ka vakalougatataka e vuqa. Ena noda veiqaravi, eda na tu vata kece.

iVakatakilakila

era veiqaravi vata tiko na cauravou kei na goneyalewa

Sa dua dina na ka veivakalougatataki ni ra veiqaravi na cauravou kei na goneyalewa vaka ivakadinadina ni cakacaka vakalotu vakalesui mai ni kosipeli. Sa ikemuni na ivakadinadina ni papitaiso, me baleta na papitaiso bula kei na papitaiso me baleti ira na qase e liu ena valetabu. Oni veiqaravi talega ena veivanua tale eso ena vale ni Turaga.

Veivakalougatataki ni Veiyalayalati kei na Kalou

Vakayadudua, na goneyalewa kei na cauravou yadua era vakayaco veiyalayalati tabu kei na Kalou. Nida rokova ena yalodina, na noda veiyalayalati kei na Kalou e kauta mai na Nona veivakalougatataki—e cecere cake mai na kena eda rawa ni raitayaloyalotaka. Na noda veiyalayalati kei na Kalou sa rawa ni vakasavasavataka na noda gagadre kei na ivalavala. Na noda veiyalayalati kei na Veisorovaki i Karisito ena rawa ni vukei keda me da dua na luve ni Kalou—yalomalumalumu, dauvosota, sinai ena loloma (raica na Mosaia 3:19). Ena veika taucoko eda vakayacora, eda na tekivu vei Jisu Karisito. Eda digitaki Koya taumada ena maliwa ni noda digidigi e vuqa, ka da vakaliuci Koya ena digidigi yadua eda vakayacora.

iVakatakilakila

Jisu Karisito

Rai vua na iVakabula

E rawa nio vakila na yalo mamarau, nio biuti Jisu Karisito me itakele ni nomu vulica na kosipeli, na nomu veiqaravi, na nomu itaviqaravi, kei na nomu veivakatorocaketaki vaka yadudua kei na nomu digitaka na vinaka. Na nomu sasaga ka kena itakele na Karisito e rawa ni veivakamarautaki ka veivakacokotaki ni o vukei ira na tani ena yalomalua dina kei na loloma.

E yaco na veika vakasakiti ni ra lomana na Turaga na cauravou kei na goneyalewa ka veiqaravi vata ena duavata kei na lomavata. E dina oqo ena semineri, itaviqaravi tudei ni itabagone, kei na MST (Me iSakisaki ni Tabagone).

iVakatakilakila

goneyalewa

Ena loloma tawayalani, sa sureti ira taucoko na goneyalewa kei na cauravou na Tamada Vakalomalagi mera “lako mai vua ka vakaivotavota ena nona vinaka; ka sa sega ni cakitaka e dua sa lako mai vua” (2 Nifai 26:33).

E rau lomani iko na Tamada Vakalomalagi kei Jisu Karisito. E rau na vukei iko ka vakalougatataki iko mo sotava na marau dina. Yalovinaka digitaka taumada na noda iVakabula o Jisu Karisito. Nuitaka na Kalou ka duabau vei Jisu Karisito kei ira era tu wavoliti iko. Nio dua na luve ni Kalou lomani, e rawa nio sema ka lewena na isoqosoqo ni Yalododonu sa ikoya na Nona Lotu vakalesui mai—Na Lotu i Jisu Karisito ni Yalododonu Edaidai. O cei o iko kei ocei o vinakata mo vakataki koya ena vuravura nikua. Sa dua na duidui vinaka o na rawa ni kauta mai ki na nomu matavuvale, ki na Nona Lotu vakalesui mai, kei na vuravura.

Mai vei Jisu Karisito, sa rawa na ka vinaka kecega. Mai vei Jisu Karisito, na veika dina kecega ena yaco, ena Nona gauna kei na Nona ivakarau na Kalou. Me vaka ni‘u dua na Nona ivakadinadina digitaki, au vakadinadinataka ka yalataka.