“Laiva, ka Vakarorogo,” Me iSakisaki ni iTabagone, Sepi. 2023.
Laiva, ka Vakarorogo
E a tiko e dua na noqu ituvatuva me‘u rawata kina na noqu tatadra. Ia ni‘u laiva oya ka vakatara na Turaga me dusimaka na noqu salatu, au a vakalougatataki ena sala totoka eso.
Droini mai vei Michael Mullan
N‘iu se qai voleka tiko ni yabaki 17, au a toki ki San Francisco, California, Amerika, me‘u curu ena koronivuli ni cakacaka ni liga. Au a tatadrataka me‘u na dua na daunidroini vei Disney.
Ena koliji, e sega walega ni cakacakaniliga au a vulica, ia e vuqa sara na veika tale eso. Au a vulica se o cei o au vua na Tamaqu Vakalomalagi. Au sa sega oqo ni tiko e vale. E rau sa sega ni tiko na noqu itubutubu me rau vakayadrati au ka kauti au ki lotu ena vei-Sigatabu. E sega ni dua ena kila kevaka au bulataka tiko na kosipeli se sega. Ia au a vakila ni‘u gadrevi Koya. Au a vakasaqara na Lotu i Jisu Karisito ni Yalododonu Edaidai ena ivola ni talevoni. Niu curu yani kina vale ni Lotu ka rogoca “Au sa Kila ni Bula Tu” (Sere ni Lotu, naba 76) ni vakatagitaki, au sa vakila niu sa tiko e vale. Sa tekivu meu kila na ibalebale ni kosipeli vei au kei na ka au vinakata vakaidina.
Cakava me Naba Dua na Turaga ena Nomu Bula
Ena gauna saraga oya, au sa vinakata kina meu sa na vakaitavitaka na Tamaqu Vakalomalagi ena veika taucoko sara au cakava. Me kena ivakaraitaki, au sa tekivu vakatarogi Koya se cava na Nona nanuma me baleta na noqu ituvatuva ni cakacaka kei na vanua me‘u tiko kina. Niu masu ka taroga na veitaro oqo, sa tekivu meu vakila ni gadrevi meu tiko ena dua tani tale na vanua.
A kavoro vakalailai na yaloqu. Au a sa tuvanaka taucoko na noqu tatadra ka vakanamata ki na noqu ituvatuva. Au a nanuma niu sa kila sara tu ga na vanua meu lako kina kei na cava meu na cakava. Ia oqo, au sa kila ni‘u sa vinakata na Turaga me naba dua ena noqu bula, oqori e vakaibalebale vakalevu cake vei au mai na veika tale eso. E dina ga niu kila ni na duidui na noqu salatu mai na kena au a raitayaloyalotaka, au a vakila na Nona loloma vei au, au nuitaka na Nona yalomatua.
Au a gole kina Univesiti na Brigham Young–Idaho kei na Univesiti na Brigham Young e Provo, Utah, mu vakacavara kina na noqu koroi ni droini. Ni voleka sara tikoga me‘u taurivola, au a ciqoma e dua na madigi ni vuli cakacaka ena dua na vanua ni dau caka yaloyalo ni qito ena initaneti ena vanua au a tiko voli kina. Ni oti toka e dua na yabaki, ni oti na noqu sa vakacakacakataki tudei, a volia na Disney na vanua ni caka qito oqo, ka kauta kaya vata mai na vei madigi eso kei na veika ni tubu vakacakacaka.
Ni o sa biuta kaya na veika o nanuma ni dodonu me tiko vei iko, ena vakalougatataki iko na Turaga ena kena gauna donu kei na veika ena vakamarautaki iko vakaidina. O na sega ni kila na vanua ena kauti iko kina na Turaga. Laiva ga, ka vakarorogo.
Biutu me liu na veika e dodonu me liu.
Ena gauna ni vuli, au a wasewasea na noqu gauna ni noqu veikalasi kei na qaravi ni vuli lesoni e vale kei na itavi ena Lotu. Au a cakacakataka se cava na veika meu vakaliuci. Meu lako ka sikovi ira me‘u veiqaravi kina, se meu vuli lesoni me baleta na veitarogi oqo? Au sa wilika beka oqo na noqu ivolanikalou, se meu vakaotia mada na noqu itavi-lesi oqo?
Ena veigauna taucoko au vakaliuca kina na Turaga ka vakayacora na cakacaka a kacivi au kina o Koya me‘u cakava, e dau donu na veika kece, kei na veika tale eso. E dau rokova o Koya na Nona yalayala. Ni da vakaliuca na Turaga, na veika taucoko sara ena donu mai.
Niu gole kina koronivuli torocake ni oti na noqu taurivola, au a sotava na digidigi vata ga. Au a peresitedi voli ni Goneyalewa ena tabanalevu ena gauna oya. Ena dua na siga a sa tu e mataqu e dua na digidigi sa ikoya meu na digitaka na vakavakarau ki na dua na veitarogi se meu vukei ira na goneyalewa me ra tuvanaka e dua na itaviqaravi. Au a digitaka me‘u vukei ira na goneyalewa. Ena gauna galala sa qai vo toka vei au, au a masu ka vuli lesoni ena kena vinaka duadua au a rawa ni cakava. Au a mani pasitaka na veitarogi, ka levu cake sara na kequ maka mai na kena au a namaka.
Laiva Vua me Tuberi iko.
Ena tuberi iko na Tamada Vakalomalagi. E lomani iko o Koya ka kila vakavinaka sara na vanua o tiko kina. E kila vakavinaka sara tu ga o Koya na veika ena vakalougatataki iko vakalevu duadua kei na gauna cava.
Ena noqu bula, sa veisau ka veitosoyaki vakalalai na veika eso. Ia a tiko voli ga kina o Koya ena gauna taucoko. Ni‘u sa muria na Nona veidusimaki vei au, sa totoka sara na veika kece. Sega ni vaka o koya au a namaka, ia e vinaka cake sara.
E vinakata o Koya me tiki ni noda bula. Kevaka eda rawa ni vakatarai Koya me tiki ni noda bula, ena tiko na veika veivakurabuitaki ena waraki keda yadua tiko. Na cava tale e sa vakarautaka tu vei iko o Koya ka o sega ni raica rawa?