2023
O Vakila na Nuiqawaqawa, Loma Ocaoca, se Rarawa?
Sepiteba 2023

“O Vakila Tiko Niuqawaqawa, Loma Ocaoca, se Rarawa?,” Me iSakisaki ni iTabagone , Sepi. 2023.

Veivuke ni Bula

O Vakila na Nuiqawaqawa, Loma Ocaoca, se Rarawa?

Mai vei Jessica Zoey Strong

Mekasini ni Lotu

Oqo eso na ka e rawa nio vakayacora kaya.

gacagaca ni qiri ena roka duidui eso kei na vei ivakaraitaki ni rairai ni mata

Na Vakatovolei Ni Nuiqawaqawa

E vakaevei beka na nomu nuiqawaqawa se oca?

Kevaka o sotava tiko na yalolailai, lomataqaya, se na loma ocaoca balavu se na nuiqawaqawa, yalovinaka vakasaqara na veivuke ena nomu vosa vua e dua na qase nuitaki. E rawa talega nio tovolea eso na ivakasala ena iwase dromodromo (vakauasivi na veika taumada!), ia ena so na gauna o na gadreva beka mo vukei vakalevu cake, ka donu oya.

Kevaka o vakila nio via vakukuna, mo kere veivuke vakatotolo sara. Veitaratara ki na nomuni tabana veivuke ni leqa tubukoso, tabacakacaka ni ovisa, se valenibula.

Sa kena ivakarau meda dau nuiqawaqawa, rarawa, se loma ocaoca ena so na gauna. Era dau vu na yalo vakaoqo ena ituvaki ni bula e dau yaco mai ka takali yani ni veisau na bula. Tovolea eso na ivakasala e rawa ni veivuke!

Na Yavu Taumada

  • Gole Vua na Tamada Vakalomalagi. Ena rogoca ka sauma mai na nomu masu. Ena vukei iko o Koya mo sotava na vei bolebole eso e yaco mai vei iko.

  • Vakararavi matua vei Jisu Karisito. “Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula.”1

  • Qaravi ira na tamata. “Nida sa vakayali keda ena nodra qaravi na tani, eda na kunea na noda dui bula kei na noda dui bula marau.”2

  • Mo vakabula tikoga na yalomu. Wilika na ivolanikalou e veisiga, lako ki na valetabu kevaka e rawa, vakayagataka na sakaramede, rokova na nomu veiyalayalati, ka veivutuni ena veisiga. Kerea na veivakalougatataki ni matabete ena gauna o gadreva kina.

  • Mo vaka bulabulataka tu ga na yagomu. Moce vakarauta ka vakaukauwa yago, ka talairawarawa ki na Vosa ni Vuku.

Kevaka o Nuiqawaqawa tiko

  • Mo vakanamata ki na gauna sara ga oqo. E sega ni veivuke me lomaleqataki na veisiga ni mataka se lomaocaoca me baleta na veigauna sa oti. Na gauna oqo sa ikoya duadua ga na ka o rawa ni veisautaka dina.

  • “Solia na gauna mo vakacegu kina. “Sa sega ni kilikili vua na tamata me cici vakatotolo cake mai na kaukauwa sa tu vua” (Mosaia 4:27

  • Vakasamataka na veika vinaka. Na yalo ca e rawa ni vu mai na vakanananu ca. Na nomu vakasama vinaka ena rawa ni vukei iko me lailai na nomu rere se lomaleqa.

Kevaka o Vakila Tiko na Yalo Rarawa

  • Mo kila ni veivakatovolei e tiki ni ituvatuva. Na sotavi ni veika dredre e sega ni kena ibalebale ni o cakava tiko e dua na ka cala. Nuitaka ni na vakaqaqacotaki iko na Tamada Vakalomalagi ka na cakacaka na nomu bolebole me baleta na nomu vinaka (Vunau kei na Veiyalayalati90:24; raica talega na Roma 8:28; Vunau kei na Veiyalayalati 122:5–9).

  • Vakanamata tiko ki na vakavinavinaka. Vola na veika o dau vakavinavinakataka ena veisiga, ka raica mo vakavinavinakataka na Tamada Vakalomalagi (raica na Vunau kei na Veiyalayalati 98:1).

  • Cakava na veika o dau taleitaka. Vakayagataka na nomu gauna kei ira na itokani kei na matavuvale, tovolea e dua na ka taleitaki vou, vakarorogo ki na sere ivakatagi veilaveti, se tuva e dua na itaviqaravi lasa.

Kevaka o Sega ni Vakila ni O Vinaka Tu

  • Mo kila ni sega ni gadrevi me da na uasivi sara. “Eke ena bula oqo e sa ‘tu vakawawa’ tu na uasivi sara.”3 Kakua ni vakatauvatani iko vei ira na tani, ena nomu bula se ena itukutuku raraba.

  • Vosa vakavinaka vei iko. Dau yalovinaka vei iko, me vaka o na vakayacora ki vua e dua na nomu itokani. Ena vosa vinaka vei iko na Yalo Tabu ka na sega vakadua ni vakalialiai iko se vosa beci taki iko.

  • Kila ni na vakayaco veisau na iVakabula. A mate o Jisu Karisito ena vuku ni noda ivalavala ca ka colata talega o Koya na noda rarawa, tauvimate, kei na malumalumu (raica na Alama 7:11–12 Kevaka eda sa yalomalumalumu, sa yalataka o Koya me “na vu ni noda kaukauwa na veika malumalumu”(Ica 12:27). Eda na sega beka ni vinaka cake vakataki keda, ia eda na vinaka cake vata kei Koya.

iTinitini

Ena vuqa beka na siga o na yalonuidei ka tu vakarau mo sotava na veibolebole ni bula oqo. Se vakacava sara tu na vinaka ni yalomu, raica mo vakayacora tikoga na veika taumada.

Masu vua na Tamada Vakalomalagi—ena gauna e rawarawa sara tu mada ga kina na bula. Vakanamata ki na veika sa vakayacora ena vukuma na iVakabula ka vakakina ena Nona bula kei na ivakavuvuli—ena gauna mada ga e toso vinaka tu kina na ka. Ena gauna o na qai sotava kina na yalo dredre, o sa na vakarau vakavinaka tu mo qarava.