“O na Vakavakarau Vakacava kina Koniferedi Raraba,” Me iSakisaki ni iTabagone, Sepi. 2023.
Vakavakarau kina Koniferedi Raraba
O na Vakavakarau Vakacava kina Koniferedi Raraba
O ira na itabagone oqo e levu sara na ka era rawata mai na koniferedi raraba. O na vakavakarau vakacava mo sotava e dua na gauna vakaibalebale?
Au Vinakata Me‘u Muria na Parofita
Au a vakarautaki au kina koniferedi raraba ni Okotova 2022 ena noqu wilika na veika me baleta na Veisorovaki i Jisu Karisito ena iVola i Momani kei na Veiyalayalati Makawa.
Ena gauna ni koniferedi, a vosa vei keimami o Peresitedi Russell M. Nelson ka vakadinadinataka na bibi ni valetabu.1 Ena valetabu, sa yalataki tu na veivakalougatataki tawamudu, ka na vakilai e dua na yalo vakasakiti nio lako kina.
E sa bera ni dua na valetabu e Nicaragua, ia esa kacivaki oti ni na dua. Au nuitaka niu na rawa ni rogoca na vosa nei Peresitedi Nelson ka lako kina valetabu ni sa tara oti.
Niu sarava tiko na koniferedi, au a vakila ni vakadinadinataka na Yalo niu sa tiko ena vanua donu. Au vakila ni sa vakasinaiti na yaloqu ena loloma ni Kalou.
Carlos M., Nicaragua
Na Veivakabulai esa Vakarautaki Tu me Noda Taucoko
Ni bera na koniferedi raraba ni Okotova 2022, au a vakasamataka lesu na veika a yaco ena noqu bula ena dua na gauna lekaleka sa oti. E vuqa na ka vakaleqa na noqu vakasama ni bera na koniferedi, ka‘u a vinakata me‘u vakila na loma vinaka, na vakacegu, kei na kaukauwa.
Ena koniferedi, a kaya kina o Elder Quentin L. Cook ena iApositolo Le Tinikarua, “Ena vuku ni Veisorovaki ni iVakabula, sa rawa kina na veivakabulai vei keda taucoko.”2
Na veimalanivosa oqori e solia vei au na vakacegu kei na inuinui. Au rawa ni vosoti ka vakila na vakacegu, ena Veisorovaki i Jisu Karisito, ni‘u dau caka cala kei na digidigi cala. Se mosi cava ga au vakila tiko, au rawa ni vakabulai. O keda taucoko eda rawa ni vakila na vakacegu kei na veivakabulai vata oqori ni da veivutunitaka na noda ivalavala ca ka segata me da vinaka cake ena veisiga yadua.
Kaye D., Yatu Filipaini
Nomu Vakavakarau kina Koniferedi
Taura e dua ga na miniti mo vakavakarau kina me baleta na koniferedi, ka na dua na gauna vinaka sara o na sotava. Ia, e rawa vakacava mo vakavakarau? Tekivu ena nomu vola na nomu vei taro eso! Vakasamataka vakatitobu na nomu taro nio sarasara tiko, ko na kurabui ni vakawasoma ena vaka saraga me ra vosa tiko vei iko o ira era vosa.