Mai na iVola kina Kakaburaki Bula

Mai vei David A. Edwards

Mekasini ni Lotu

Na nodra dau soli tukutuku mai o ira na iliuliu ni Lotu esa balavu sara mai, ia na kena inaki e dei tikoga.

iVakatakilakila

E vola tiko o Paula e dua na ivola

Voleka ni 2,000 na yabaki sa oti

Ni a tiko voli o Koya e vuravura, a tauyavutaka o Jisu Karisito na Nona Lotu. Ni oti na Nona tucake tale na iVakabula ka lako cake ki lomalagi, e ratou a liutaka na Lotu na Nona iApositolo ena lewa, ivakatakila, kei na veivakauqeti a solia vei iratou o Koya.

Ena gauna oya, era a dau veitaratara vakawasoma na iliuliu ni Lotu vei ira na lewe ni Lotu ena veivanua duidui eso ena ivola (ivolavolai).

E volai tu ena Veiyalayalati Vou na ivola i Paula, Pita, Joni, Jemesa, kei Juta. Na ivola oqo era a volai e liga, veisoliyaki e liga, lavetaki e liga, ka wiliki ena domo levu.

O ira na iliuliu ni Lotu oqo e dau vakawasoma me tautauvata ga na nodra inaki ena volai ni ivola oqo. Era a segata me ra:

Wasea na nodra ivakadinadina ka vakavuvulitaka na kosipeli i Jisu Karisito
Veivakayaloqaqataki, veivakauqeti, ka veilaveti.
Veivakananumi me baleta na ivakaro kei na veiyalayalati.
Qarava na bolebole ni gauna oqo.
Veivakasalataki ena qaqarauni me baleta na veika rerevaki.
Vakadodonutaka na cala eso e rawa ni basika ena Lotu.
Vakaduavatataka na Lotu

iVakatakilakila

Russell M. Nelson

Nikua

Kauta mai ki liu ni oti e 2,000 na yabaki ka o na raica ni sa veisau e vuqa na ka, ia eso na ka e sa tautauvata tikoga.

Sa vakalesuya mai o Jisu Karisito na Nona Lotu ki vuravura, ka ra sa tu tale eso na parofita kei na iapositolo me ra liutaka. Ia me tekivu mai na gauna ni ivola, sa tosocake na ivakatagedegede ni tekinolaji ni veitaratara—mai na misini ni tabaivola ki na retio ki na retioyaloyalo ki na initaneti.

Sa rawa vei ira na iliuliu ni Lotu ena gauna oqo me ra soli itukutuku ena dua na koniferedi raraba me baleta na Lotu raraba ena dua vata ga na gauna. E sa vakau yani ena setilaiti ka kaburaki bula ena initaneti ena vica vata na vosa ena dua ga na gauna. Ena loma ni vica ga na siga, sa kabi na itukutuku ena initaneti ena vica vata na vosa, ka sa vakau e vuravura raraba e dua na kena ivola tabaki.

Nio vakavakarau tiko ki na koniferedi raraba ka tarava, mo vakasamataka mada na ivola eso ena Veiyalayalati Vou. Oqori ena dua na gauna ka duidui sara, ka duidui talega na kena tekinolaji. Ia na itukutuku ni koniferedi e vakataucokotaka na inaki yaga vata ga oya. Nio rogoca na itukutuku ni koniferedi, o na rawa ni vakasamataka beka na sala era:

Wasea kina na nodra ivakadinadina ka vakavuvulitaka na kosipeli i Jisu Karisito
Veivakayaloqaqataki, veivakauqeti, ka veilaveti.
Veivakananumi me baleta na ivakaro kei na veiyalayalati.
Qarava ni bolebole ni gauna oqo.
Veivakasalataki ena qaqarauni me baleta na veika rerevaki.
Vakadodonutaka na cala eso e rawa ni basika ena Lotu.
Vakaduavatataka na Lotu